សង្គមអន្តរជាតិ
អន្តរជាតិ
ចិនគំរាមសងសឹកវិញ បន្ទាប់ពីអាមេរិកប្រកាសគម្រោងលក់អាវុធឲ្យតៃវ៉ាន់ អ្នកនាំពាក្យក្រសួងការបរទេសចិន Zhao Lijian ។ រូបភាពក្រសួងការបរទេសចិន
×
ដោយ៖ កង ម៉េងហុង
ចិនបានគំរាមចាត់វិធានការសងសឹកប្រឆាំងនឹងការលក់អាវុធចុងក្រោយរបស់អាមេរិកដល់តៃវ៉ាន់។ តៃវ៉ាន់បានស្វាគមន៍ចំពោះកញ្ចប់អាវុធថ្មីនេះ ប៉ុន្តែអះអាងថា ខ្លួនមិនមានបំណងប្រណាំងប្រជែងអាវុធជាមួយទីក្រុងប៉េកាំងទេ។
អ្នកនាំពាក្យក្រសួងការបរទេសចិនលោក Zhao Lijian បាននិយាយក្នុងសន្និសីទសារព័ត៌មានប្រចាំថ្ងៃទី២២ ខែតុលា ថា អាមេរិកគួរតែបញ្ឈប់ការលក់អាវុធអោយតៃវ៉ាន់ ព្រោះវាជាការជ្រៀតជ្រែកកិច្ចការរបស់ចិន ដោយតៃវ៉ាន់ជាទឹកដីចិន។ លោកបន្តថា ការលក់នេះ នឹងធ្វើឲ្យខូចខាតដល់អធិបតេយ្យភាពនិងផលប្រយោជន៍សន្តិសុខរបស់ចិនយ៉ាងធ្ងន់ធ្ងរ ក៏ដូចជាទំនាក់ទំនងចិន-អាមេរិក និងសន្តិភាពនិងស្ថិរភាពនៅច្រកសមុទ្រតៃវ៉ាន់ដែរ។
លោក Zhao ព្រមានបែបនេះ ដើម្បីជាការឆ្លើយតបនឹងការយល់ព្រមរបស់សហរដ្ឋអាមេរិកចំពោះការលក់អាវុធដែលតម្លៃដល់ ១,៨ ពាន់លានដុល្លារដល់តៃវ៉ាន់ ។ បើតាមសារព័ត៌មាន Reuters កញ្ចប់សព្វាវុធថ្មីរួមមាន ឧបករណ៍ចាប់សញ្ញា កាំជ្រួចមីស៊ីល និងកាំភ្លើងធំ។ លើសពីនោះ អាមេរិកក៏គ្រោងលក់យន្តហោះគ្មានមនុស្សបើក ដែលផលិតដោយក្រុមហ៊ុន General Atomics និង កាំជ្រួចប្រឆាំងនាវា Harpoon របស់ក្រុមហ៊ុន Boeing ដើម្បីធ្វើជាខែលការពារច្រកសមុទ្រតៃវ៉ាន់។
«ចិននឹងធ្វើការឆ្លើយតបស្របច្បាប់និងចាំបាច់ យោងទៅតាមការវិវត្តនៃសភាពការណ៍។» លោក Zhao បញ្ជាក់បែបនេះ តែមិនបានផ្តល់ព័ត៌មានលម្អិតពីចំណាត់ការតបវិញទេ។ កន្លងទៅ ចិនបានដាក់ទណ្ឌកម្មលើក្រុមហ៊ុនអាមេរិកចំពោះការលក់អាវុធទៅឱ្យតៃវ៉ាន់ ប៉ុន្តែលើកនេះមិនមានសញ្ញាច្បាស់ពីវិធានការតបឡើយ។
រឿងអាវុធនេះ តៃវ៉ាន់ឯណោះ រីកមុខរីកមាត់ខ្លាំង ព្រោះវានឹងជួយបង្កើនសមត្ថភាពកងទ័ពខ្លួន។ យ៉ាងណាមិញ រដ្ឋមន្ត្រីការពារជាតិតៃវ៉ាន់អះអាងថា អាវុធថ្មី ប្រើសម្រាប់ការពារខ្លួនប៉ុណ្ណោះ។
គួរបញ្ជាក់ថា រដ្ឋបាលប្រធានាធិបតី ដូណាល់ ត្រាំ បានបង្កើនការគាំទ្រដល់កោះតៃវ៉ាន់ តាមរយៈការលក់អាវុធនិងការធ្វើទស្សនកិច្ចរបស់មន្ត្រីជាន់ខ្ពស់អាមេរិក ដែលធ្វើឲ្យភាពតានតឹងរវាងទីក្រុងប៉េកាំងនិងវ៉ាស៊ីនតោនកើនឡើងខ្លាំង បន្ថែមពីដោយការខ្វែងគំនិតគ្នាលើសមុទ្រចិនខាងត្បូង ហុងកុង សិទ្ធិមនុស្ស និងពាណិជ្ជកម្មនោះ៕
Tag:
ចិន
អាមេរិក
តៃវ៉ាន់
© រក្សាសិទ្ធិដោយ thmeythmey.com