ប្រធានាធិបតីរុស្ស៊ីលោកវ្ល៉ាឌីមៀ ពូទីនសង្ឃឹមថា អាមេរិក អាចនឹងជួយរុស្ស៊ីក្នុងការស្វែងរកដំណោះស្រាយដើម្បីបញ្ចប់ការប្រយុទ្ធគ្នា នៅតំបន់ Nagorno-Karabakh ដែលផ្ទុះឡើងកាលពីថ្ងៃទី២៧ កញ្ញា។ ការប្រយុទ្ធគ្នានេះ នៅមិនទាន់ចប់នៅឡើយ បើទោះជាបទឈប់បាញ់ច្រើនលើកក្ដី។
ជម្លោះនៅតំបន់ Nagorno-Karabakh នៅតែបន្តអូសបន្លាយ បើទោះបីជាអាមេនី និងអាស៊ែបៃហ្សង់យល់ព្រមលើបទឈប់បាញ់ដែលរុស្ស៊ីខិតខំបង្កើតឡើងក្តី។ រុស្ស៊ី ដែលព្យាយាមដោះស្រាយជំលោះរវាងប្រទេសទាំង២ អះអាងថា ដំណោះស្រាយដោយប្រើប្រាស់អាវុធ នឹងមិនដោះស្រាយបញ្ហាឡើយ។
ដើម្បីរកដំណោះស្រាយបញ្ចប់បញ្ហា រដ្ឋមន្ត្រីការបរទេសអាស៊ែបៃហ្សង់ និងអាមេនី នឹងជួបជាមួយរដ្ឋមន្ត្រីការបរទេសអាមេរិក ម៉ៃ ប៉ុមប៉េអូ នៅសប្តាហក្រោយ។ មុនជំនួបនេះធ្វើឡើង ប្រធានាធិបតីរុស្ស៊ី វ៉ា្លឌីមៀ ពូទីន និយាយថា អាមេរិក នឹងជួយរកច្រកចេញវិបត្តិមួយនេះ។
«ខ្ញុំសង្ឃឹមយ៉ាងធំធេងណាស់ថា អាមេរិកនឹងធ្វើការរួមគ្នាជាមួយរុស្ស៊ី ក្នុងការស្វែងរកដំណោះស្រាយជម្លោះនេះ»។ លោក ពូទីន ថ្លែងបែបនេះនៅថ្ងៃទី២២ តុលា។ ប្រធានាធិបតីរុស្ស៊ី បានបង្ហើបថា លោក បានសន្ទនាតាមរយៈទូរសព្ទជាមួយប្រមុខរដ្ឋអាមេនី និងអាស៊ែបៃហ្សង់ជាច្រើនដងក្នុងមួយថ្ងៃ ប៉ុន្តែសង្ឃឹមក្នុងការដោះស្រាយជម្លោះត្រូវបានបាត់បង់ដោយសារតែការបន្តវាយប្រហារគ្នាទ្រង់ទ្រាយធំនៅក្នុង និងជុំវិញតំបន់ Nagorno-Karabakh ។
រុស្ស៊ីដែលឃ្លាំមើលជម្លោះនេះយ៉ាងដិតដល់ អះអាងថា មនុស្សយ៉ាងហោចណាស់៥ពាន់នាក់ស្លាប់ក្នុងការប្រយុទ្ធគ្នាជិតមួយខែមកនេះ ដោយភាគីទាំងពីរមានមនុស្សស្លាប់យ៉ាងហោចណាស់២ពាន់នាក់។
នៅលើសមរភូមិជាក់ស្តែង គិតត្រឹមថ្ងៃទី២២ តុលា អាជ្ញាធរតំបន់ផ្តាច់ខ្លួន Nagorno-Karabakh អះអាងថា ទាហានខ្លួនចំនួន៨៧៤នាក់ស្លាប់ និងជនស៊ីវិល៣៧នាក់បាត់បង់ជីវិត។ ចំណែកអាស៊ែបៃហ្សង់ បញ្ជាក់ថា ជនស៊ីវិលរបស់ខ្លួនចំនួន៦៣នាក់ស្លាប់ ខណៈ២៩៣នាក់ទៀតរងរបួស។ អាស៊ៃបៃហ្សង់ ដែលមានជំនួយយោធាពីតួកគីលើកឡើងថា យោធារបស់ខ្លួនកាន់កាប់បានទឹកដីបន្ថែមក្នុងការប្រយុទ្ធចុងក្រោយបំផុតជាមួយកងទ័ពអាមេនី និងទាហានផ្ដាច់ខ្លួន។
ចំពោះវត្តមានតួកីក្នុងការដោះស្រាយជម្លោះ លោក ពូទីន ថារុស្ស៊ី មានការខ្វែងគំនិតគ្នាច្រើនជាមួយតួកគី ប៉ុន្តែនឹងបន្តធ្វើការរួមគ្នាដើម្បីស្វែងរកដំណោះស្រាយ។ លោកពូទីនលើកឡើងថា ប្រធានាធិបតីតួកគីលោក តៃយីប អ៊ែរដូហ្កាន់ ជាអ្នកនយោបាយបត់បែន និងជាដៃគូដ៏គួរឲ្យទុកចិត្តរបស់រុស្ស៊ី។
ចំណែកអគ្គលេខាធិការ NATO លោក Jens Stoltenberg អះអាងថា អាមេនី និងអាស៊ែបៃហ្សង់ជាដៃគូរដ៏មានតម្លៃរបស់NATO ហើយអង្គការលោកមិនកាន់ជើងភាគីណាមួយឡើយ។ សម្រាប់តួកគី លោក Stoltenberg លើកឡើងថា តួកគី ជាផ្នែកមួយនៃដំណោះស្រាយការទូត៕