សង្គមអន្តរជាតិ
អន្តរជាតិ
ប្រធានាធិបតីចិន ស៊ី ជិនភីង ថ្លែងសុន្ទរកថាដើម្បីប្រារព្ធខួបទី៧០ឆ្នាំនៃការចូលធ្វើសង្គ្រាមកូរ៉េ នៅវិមានប្រជាជនចិន នៅថ្ងៃទី ២៣ ខែតុលា ។ រូបភាព៖ Reuters
×![]()
ប្រធានាធិបតីចិន ស៊ី ជិនភិង បានព្រមានអាមេរិកថា ចិនមិនញញើតធ្វើសង្គ្រាមឡើយ ហើយកងទ័ពចិនត្រៀមលក្ខណៈប្រយុទ្ធជានិច្ច។ ការប្រកាសនេះ ធ្វើឡើងក្នុងសុន្ទរកថាដើម្បីប្រារព្ធខួបទី៧០ឆ្នាំដែលកងទ័ពចិនចូលរួមក្នុងសង្គ្រាមកូរ៉េប្រឆាំងកងទ័ពអាមេរិក។ នេះក៏ជាសង្គ្រាមតែមួយគត់ដែលកងទ័ពចិននិងអាមេរិកប្រយុទ្ធគ្នាដោយផ្ទាល់ផងដែរ។
ថ្លែងពីវិមានប្រជាជនចិនក្នុងទីក្រុងប៉េកាំង នៅថ្ងៃទី ២៣ ខែតុលា លោក ស៊ី ជិនភីង លើកឡើងថា ជោគជ័យសង្គ្រាមកូរ៉េឆ្នាំ១៩៥០-៥៣ ជាការក្រើនរំឮកមួយថា ប្រជាជាតិចិនមិនញញើតធ្វើសង្គ្រាមជាមួយប្រទេសណាដែលហ៊ានបង្កបញ្ហានៅមាត់ទ្វារផ្ទះរបស់ខ្លួនឡើយ។
«កាលពី៧០ឆ្នាំមុន ពួកឈ្លានពានចក្រពត្តិនិយម បានបើកការវាយប្រហារនៅមាត់ទ្វារផ្ទះរបស់ប្រទេសចិនថ្មី»។ លោក ស៊ី និយាយបែបនេះ ដោយចង់សំដៅលើសហរដ្ឋអាមេរិក។ លោកបន្តថា ប្រជាជនចិន នឹងមិនបង្កបញ្ហា តែក៏មិនខ្លាចពួកវាឡើយ។
តាមការចុះផ្សាយរបស់ទីភ្នាក់ងារព័ត៌មាន AFP មេដឹកនាំចិនរូបនេះ សង្កត់ធ្ងន់ថា៖«យើងនឹងមិននៅស្ងៀម ហើយឱបដៃឈរមើលគេបំផ្លាញអធិបតេយ្យភាពជាតិយើងឡើយ។ យើងក៏នឹងមិនអនុញ្ញាតឲ្យកម្លាំងណាមួយឈ្លានពាន ឬបំបែកបំបាក់ទឹកដីដ៏វិសេសនៃមាតុប្រទេសយើងផងដែរ»។
កាលពីថ្ងៃទី ២១ ខែតុលា មន្ទីរបញ្ចកោណអាមេរិក បានប្រកាសថា ខ្លួនបានយល់ព្រមលក់មីស៊ីលក្នុងទំហំទឹកប្រាក់១ពាន់លានដុល្លារទៅឲ្យកោះ តៃវ៉ាន់ ។ ចិន គំរាមចាត់វិធានការវាយបកអាមេរិក ហើយចាត់ទុករឿងនេះជាការជ្រៀតជ្រែកកិច្ចការផ្ទៃក្នុងរបស់ចិន ដ្បិតប៉េកាំងតែងចាត់ទុកតៃវ៉ាន់ជាទឹកដីខ្លួន។
ក្នុងសុន្ទរកថាដ៏វែងដដែល ប្រធានាធិបតី ស៊ី ជិនភីង អះអាងថា ចិនត្រូវការពន្លឿនការធ្វើទំនើបកម្មយោធារបស់ខ្លួនដើម្បីកសាងយោធាលំដាប់ថ្នាក់ពិភពលោកមួយ ហើយធានាថា បក្សកុម្មុយនីស្តចិន រក្សាភាពជាអ្នកដឹកនាំផ្ដាច់មុខលើវិស័យយោធា។
សូមបញ្ជាក់ថា សង្គ្រាមកូរ៉េ គឺជាការប្រយុទ្ធគ្នាដោយផ្ទាល់ទ្រង់ទ្រាយធំទីមួយ និងតែម្ដងគត់រវាងកងទ័ពចិននិងសហរដ្ឋអាមេរិក។ យោងតាមរដ្ឋាភិបាលចិន ទាហានចិនជាង ១៩៧ ០០០នាក់ បានស្លាប់អំឡុងសង្គ្រាម៣ឆ្នាំ ដែលបានផ្អាកក្រោយមានបទឈប់បាញ់កាលពីឆ្នាំ១៩៥៣ ហើយជាលទ្ធផលកូរ៉េត្រូវបានពុះចែកជាពីរ ត្រង់ខ្សែបន្ទាត់ទី៣៨៕
Tag:
សហរដ្ឋអាមេរិក
ចិន
ស៊ី ជិនភីង
© រក្សាសិទ្ធិដោយ thmeythmey.com
