សង្គមអន្តរជាតិ
អន្តរជាតិ
លោក ពូទីន ថា លោកជាអ្នកជួយឲ្យមេដឹកនាំប្រឆាំងដែលត្រូវបំពុល ទៅព្យាបាលនៅអាល្លឺម៉ង់ មេដឹកនាំបក្សប្រឆាំងរុស្ស៊ី Alexi Navalny។ រូបភាព៖AFP
× ប្រធានាធិបតីរុស្ស៊ីលោក វ្ល៉ាឌីមៀ ពូទីន អះអាងថា លោកជាអ្នកធ្វើអន្តរាគមន៍ដោយផ្ទាល់ ដើម្បីធានាថាមេដឹកនាំប្រឆាំងរុស្ស៊ី Alexei Navalny អាចទទួលបានការព្យាបាលនៅអាល្លឺម៉ង់។
លោក Alexei Navalny ធ្លាក់ខ្លួនឈឺ និងមិនដឹងខ្លួនកាលពីថ្ងៃទី២០ ខែសីហា និងត្រូវបានដឹកជញ្ជូនតាមយន្តហោះទៅទទួលការព្យាបាលនៅអាល្លឺម៉ង់។ សំណាកឈាមរបស់លោក Navalny ត្រូវបានអង្គការហាមឃាត់អាវុធគីមី (OPCW) អះអាងថា មានផ្ទុកសារធាតុគីមីដែលប៉ះពាល់ដល់ប្រព័ន្ធប្រសាទប្រភេទ Novichok ។ នេះបើយោងតាមទីភ្នាក់ងារព័ត៌មាន Reuters។
ក្រោយទទួលបានការថែទាំ និងដឹងខ្លួន លោក Navalny ចោទរដ្ឋាភិបាលរុស្ស៊ីថា ជាអ្នកបំពុលរូបលោក។ រដ្ឋាភិបាលរុស្ស៊ីតបថា ការចោទនេះជារឿងមិនពិត និងជាការប្រមាថរដ្ឋាភិបាល ។ ថ្លែងក្នុងកិច្ចជំនួប Valdai Discussion Club លោក ពូទីន បញ្ជាក់ថា រូបលោកបានស្នើសុំឲ្យអគ្គរដ្ឋអាជ្ញារុស្ស៊ី អនុញ្ញាតឲ្យលោក Navalny ចាកចេញពីប្រទេសរុស្ស៊ីដើម្បីអាចទទួលបានការព្យាបាល តបតាមសំណើរបស់ភរិយាលោក Navalny។
បើតាមលោក ពូទីន អះអាងថា លោក Navalny ជាប់បំរាមដែលមិនអាចធ្វើដំណើរ ព្រោះលោកស្ថិតក្រោមការស៊ើបអង្កេតដោយតុលាការ និងករណីព្រហ្មទណ្ឌ។ ប្រមុខរដ្ឋរុស្ស៊ី បន្ថែមទៀតថា៖«ទោះជាយ៉ាងណាក្តីខ្ញុំបានធ្វើសំណើទៅអគ្គរដ្ឋអាជ្ញាដើម្បីទទួលបានការអនុញ្ញាត ហើយគាត់ (Navalny) បានចាកចេញពីប្រទេស»។លោក បកស្រាយទៀតថា បើសិនជារុស្ស៊ីចង់បំពុល Navalny នោះរដ្ឋាភិបាលនឹងមិនឲ្យលោកចេញពីប្រទេសឡើយ។
ការធ្លាក់ខ្លួនឈឺដោយសារសារធាតុគីមី របស់មេដឹកនាំប្រឆាំង Navalny ធ្វើឲ្យបណ្តាប្រទេសលោកខាងលិច ថ្កោលទោស និងរិះគន់រុស្ស៊ី ដោយចោទថា ជាអ្នកនៅពីក្រោយ។ សហភាពអឺរ៉ុប និងអង់គ្លេស កាលពីសប្តាហ៍កន្លងទៅ បានដាក់ទណ្ឌកម្មលើមន្ត្រីរដ្ឋាភិបាលរុស្ស៊ីចំនួន៦រូប ដែលរួមមានមន្ត្រីជាន់ខ្ពស់ និងអ្នកស្រាវជាវសារធាតុសារធាតុគីមីពុលនៅមន្ទីរពិសោធន៍រដ្ឋរុស្ស៊ី។
រដ្ឋាភិបាលរុស្ស៊ី ថ្កោលទោសការដាក់ទណ្ឌកម្មទាំងនោះដោយអះអាងថាប៉ះពាល់ដល់ទំនាក់ទំនងទ្វេភាគី និងថា ជាការចោទប្រកាន់ដោយគ្មានអំណះអំណាងត្រឹមត្រូវ។ រុស្ស៊ីក៏អះអាងផងដែរថា នឹងធ្វើការសងសឹកឲ្យសមស្របវិញ។
លោក Alexei Navalny ជាមេដឹកនាំប្រឆាំងនៅរុស្ស៊ី ដែលតែងលើកឡើងពីអំពើពុករលួយក្រោមការដឹកនាំរបស់លោក ពូទីន ។ លោកត្រូវបានគណៈកម្មការរៀបចំការបោះឆ្នោតរុស្ស៊ីហាមមិនឲ្យឈរឈ្មោះបោះឆ្នោត៕
© រក្សាសិទ្ធិដោយ thmeythmey.com