បឹងកេត ដែលមាន៤០ពិន្ទុ ត្រូវប្រកួតនៅទឹកដី Smart RSN ដោយរំពឹងដណ្តើមបានពានលើកទី៤ក្នុងប្រវត្តិសាស្ត្ររបស់ខ្លួន។ ប៉ុន្តែទោះបីជាយ៉ាងណាក៏ដោយ វានឹងមានផលលំបាកខ្លាំង ដោយសារភ្នំពេញក្រោន ត្រូវការបញ្ចប់រដូវកាលជាមួយនឹងជ័យជម្នះ បន្ទាប់ពីបានធ្លាក់ចេញពីពានរង្វាន់សម្តេច ហ៊ុន សែន។

 

លទ្ធផលយ៉ាងណាក៏ដោយ ភ្នំពេញក្រោន នៅតែរក្សាបាននូវចំណាត់ថ្នាក់លេខ៤ ដោយមាន២៥ពិន្ទុ ក្រោយការប្រកួតជម្រុះរវាងក្រុម Top 6 នៅជើងទី២។ សម្រាប់បឹងកេតវិញ ពួកគេក៏មិនត្រូវភ្លាត់ស្នៀតចាញ់នោះដែរ ខណៈលទ្ធផលត្រឹមស្មើ អាចឲ្យក្រុមលោក គឹម ភក្តី លើកពានបាន បើទោះបីជាលទ្ធផលរវាងក្រុមព្រះខ័នរាជស្វាយរៀង និងណាហ្គាវើលដ៍ ទៅជាបែបណាក៏ដោយ។

 

កាលពីជើងទី១ បឹងកេតឈ្នះភ្នំពេញក្រោន ៣-១ នៅទឹកដីខេមបូឌាអ៊ែវ៉េរបស់ខ្លួន។ ក្រៅពីមានប្រៀបលើព្រះខ័នរាជស្វាយរៀងពីរពិន្ទុ បឹងកេតក៏មានប្រៀបលើរូបមន្ត Head to Head ផងដែរ។

 

រីឯជំនួបនៅកីឡដ្ឋានស្វាយរៀងវិញ ក្រុមម្ចាស់ផ្ទះ ត្រូវប្រឹងយកឈ្នះណាហ្គាវើលដ៍ ប៉ុន្តែត្រូវរង់ចាំលទ្ធផលចប់ពេញម៉ោងរវាងបឹងកេត និងភ្នំពេញក្រោន។ ព្រះខ័នរាជស្វាយរៀង មាន៣៨ពិន្ទុ ដោយចាញ់ប្រៀបបឹងកេត២ពិន្ទុ ។

 

សម្រាប់ណាហ្គាវើលដ៍ ពួកគេមានកាតាព្វកិច្ចដណ្តើមយកតំណែងលេខ៤ ប៉ុន្តែជម្រើសកីឡាកររបស់លោក មាស ចាន់ណា អាចមានការប្រែប្រួលដោយសារតែឈុតកីឡាករខ្មែរ ត្រូវត្រៀមខ្លួនប្រជែងពានរង្វាន់សម្តេច ហ៊ុន សែន ឆ្នាំ២០២០ ជាមួយវិសាខា។

 

រីឯជំនួប១គូទៀត វិសាខាដែលមាន២៥ពិន្ទុស្មើណាហ្គាវើលដ៍ ត្រូវប្រកួតបិទរដូវកាលជាមួយកងយោធពលខេមរភូមិន្ទ ដែលមាន២៤ពិន្ទុ។ 

 

រីឯក្រុម៧ផ្សេងទៀត ដែលនៅក្រៅតំបន់ Top 6 អង្គរថាយហ្គឺរ ឈរលើគេ ពោលគឺស្ថិតនៅចំណាត់ថ្នាក់លេខ៧ ដោយនាំមុខ គិរីវង់សុខសែនជ័យ នគរបាលជាតិ អាស៊ីអឺរ៉ុបយូណាយធីត អគ្គិសនីកម្ពុជា និងសូលទីឡូអង្គរ ខណៈយុវជនបាល់ទាត់បាទី ត្រូវធ្លាក់ចេញ៕