កីឡាអន្តរជាតិ
អន្តរជាតិ
EPL៖ Arsenal ចាញ់ Leicester ក្នុងដីលើកដំបូង នៅ៤៧ឆ្នាំក្រោយ
× Arsenal បានចាញ់ Leicester City ក្នុងលទ្ធផល ១-០ ក្នុងជំនួបក្របខណ្ឌ Premier League នៅយប់ថ្ងៃទី២៥ ខែតុលា។ នេះជាបរាជ័យលើកដំបូងរបស់កាំភ្លើងធំទល់នឹងក្រុមកញ្ជ្រោង នៅទឹកដីខ្លួនក្នុងរយៈពេល ៤៧ ឆ្នាំចុងក្រោយ។ Everton ស្គាល់បរាជ័យលើកដំបូងរដូវកាលនេះ ក្រោមថ្វីជើង Southampton។
នាជំនួបលីគកំពូលអង់គ្លេសសប្តាហ៍ទី៦ នៅកីឡដ្ឋាន Emirates ខ្សែប្រយុទ្ធឆ្នើម Jamie Vardy ជាអ្នករកគ្រាប់បាល់ជ័យជម្នះឲ្យក្រុមរបស់លោក Brendan Rodgers នៅវគ្គទី២ នាទី៨០ ក្រោយប្តូរចូលជំនួស Dennis Praet នៅនាទី៦០។ ១គ្រាប់នេះ បានជួយ Leicester ឈ្នះក្នុងដី Arsenal ជាលើកទីដំបូងបំផុត ចាប់តាំងពីឆ្នាំ ១៩៧៣មក។
Vardy វ័យ ៣៣ ឆ្នាំបានខកខានការប្រកួតចំនួន២លើកមកហើយ ដោយសាររបួសកំភួនជើង ប៉ុន្តែរូបគេនៅតែអាចរកគ្រាប់ទី៧របស់ខ្លួនបានក្នុងលីគរដូវកាលនេះ ដើម្បីការពារស្បែកជើងមាស (Golden shoes) ផងដែរ។ តាមរយៈជ័យជម្នះនេះ Leicester ១២ពិន្ទុ ស្មើ Aston Villa ឈរនៅលេងរៀងទី៤ក្នុងតារាង Premier League តាមពីក្រោយក្នុងកំពូលតារាង Everton និង Liverpool ដែលមាន ១៣ពិន្ទុដូចគ្នា។
ដោយឡែក Everton បានចាញ់ Southampton ២-០ ដែលជាបរាជ័យលើកដំបូងរបស់ពួកគេរដូវកាលនេះ។ ៥ប្រកួតមុខ ក្រុមដែលមានលោក Carlo Ancelotti ជាអ្នកចាត់ការទូទៅនេះ ឈ្នះ៤ និងស្មើ១៕
Tag:
Leicester City
Arsenal
Premier League
© រក្សាសិទ្ធិដោយ thmeythmey.com