បក្សភឿថៃ ដែលជាបក្សប្រឆាំងដ៏ធំបំផុត បានអំពាវនាវឲ្យលោក ប្រាយុទ្ធ ចាន់អូចា ចុះចេញពីតំណែងនៅថ្ងៃទី២៦ តុលានេះ។ ការទាមទាររបស់បក្សប្រឆាំងធ្វើឡើងអំឡុងពេល សភាថៃចាប់ផ្តើមកិច្ចប្រជុំវិសាមញ្ញរយៈពេល២ថ្ងៃ ដើម្បីពិភាក្សាពីវិបត្តិនយោបាយ។
នៅថ្ងៃទី២៦ តុលានេះ សភាថៃបើកកិច្ចប្រជុំវិសាមញ្ញរយៈពេល២ថ្ងៃ ដោយមានការចូលរួមពីសំណាក់តំណាងរាស្ត្រ និងសមាជិកព្រឹទ្ធសភា ដើម្បីជជែកស្វែងរកដំណោះស្រាយបញ្ហានយោបាយ និងការទាមទាររបស់បាតុករ។
«លោកនាយករដ្ឋមន្ត្រីត្រូវតែចុះចេញពីដំណែង»។ នេះជាការលើកឡើងក្នុងរដ្ឋសភារបស់លោកSompong Amornvivat មេដឹកនាំបក្សភឿថៃ ដែលមានសំឡេងច្រើនជាងគេក្នុងរដ្ឋសភា។ លោកSompong ក៏ទាមទារឲ្យដោះលែងបាតុករ ឆ្លើយតបការទាមទាររបស់ពួកគេ ក៏ដូចជាបញ្ឈប់ការពន្យារពេលវិសោធនកម្មរដ្ឋធម្មនុញ្ញ។ នេះបើតាមកាសែត Bangkok Post។
លោក Sompong អះអាងថា លោក ប្រាយុទ្ធ គួរណាស់តែចុះចេញពីតំណែងដើម្បីទទួលខុសត្រូវក្នុងការគ្រប់គ្រងបាតុកម្ម ដែលឈានដល់ការប្រើកាណុងបាញ់ទឹក ហើយថែមទាំងចេញក្រឹត្យអាសន្នដែលមិនសមស្របផង។
ក្នុងសុន្ទរកថា បើកកិច្ចប្រជុំសភាវិសាមញ្ញ លោក ប្រាយុទ្ទ បានបង្ហាញភាពជឿជាក់ថា បើទោះបីជាមាននិន្នាការនយោបាយខុសៗគ្នា ក៏អ្នកនយោបាយថៃនៅតែស្រឡាញ់ប្រទេសដែរ។ តបទៅនឹងការទាមទារឲ្យចុះចេញពីតំណែង តំណាងរាស្ត្ររបស់បក្សកាន់អំណាច លោក Paiboon Nititawan ចេញមកការពារលោក ប្រាយុទ្ធ ថា ប្រទេសថៃត្រូវការថ្នាក់ដឹកនាំដើម្បីអាចឆ្លងផុតវិបត្តិសេដ្ឋកិច្ច និងការពារស្ថាប័នព្រះមហាក្សត្រ។
ខណៈតួអង្គនយោបាយថៃកំពុងជួបជជែកគ្នានៅសភា បាតុករថៃវិញកំពុងរៀបចំការជួបជុំ និងញត្តិដើម្បីដាក់ទៅស្ថានទូតអាល្លឺម៉ង់នៅរសៀលម៉ោង៥ ថ្ងៃទី២៦ តុលានេះ។ ក្នុងញត្តិនោះ បាតុករចង់ឲ្យអាជ្ញាធរអាល្លឺម៉ង់ស៊ើបអង្កេតចំពោះការប្រើប្រាស់អំណាចរបស់មហាក្សត្រ មហា វជិរាលង្ករណ៍ អំឡុងពេលគង់នៅអាល្លឺម៉ង់។ បាតុករអះអាងថា ការហែរញត្តិទៅស្ថានទូតអាល្លឺម៉ង់នេះ ជាការស្តារមកវិញរបបរាជានិយមអាស្រ័យរដ្ឋធម្មនុញ្ញ។
លើសពីនោះ បាតុករក៏ចង់ដឹងផងដែរថា ការធ្វើនយោបាយ និងបំពេញព្រះរាជកិច្ចពីអាល្លឺម៉ង់មក បានបំពានអធិបតេយ្យអាល្លឺម៉ងដែរយ៉ាងណា។ ត្រង់ចំណុចនេះ រដ្ឋាភិបាលអាល្លឺម៉ង់ ធ្លាប់បានបញ្ជាក់ថា ការធ្វើនយោបាយក្នុងទឹកដីអាល្លឺម៉ង់ ជារឿងមិនអាចទទួលយកបាន។ មហាក្សត្រថៃ មានព្រះជន្ម៦៨ព្រះវស្សា ចំណាយពេលវេលារបស់ព្រះអង្គមួយភាគធំក្នុងរដ្ឋBavaria ប្រទេសអាល្លឺម៉ង់។
ទោះមានការជជែកដេញដោលមែន អ្នកប្រឆាំងលោក ប្រាយុទ្ធ និងបក្សប្រឆាំងបង្ហាញសេចក្តីមន្ទិល ថាការពិភាក្សាក្នុងសភា ទំនងមិនអាចដោះស្រាយបញ្ហានយោបាយបានឡើយ។ បក្សភឿថៃ អះអាងថា ក្នុងកិច្ចប្រជុំសភារយៈពេល២៣ម៉ោង ក្រុមខ្លួនអាចនិយាយតែ៨ម៉ោងប៉ុណ្ណោះ ដោយ១៥ម៉ោងដែលសេសសល់នឹងត្រូវចែកទៅរដ្ឋាភិបាល សមាជិកព្រឹទ្ធសភា និងបក្សប្រឆាំងដទៃទៀត។
បន្ថែមពីនេះ វិន័យផ្ទៃក្នុងរបស់រដ្ឋសភាថៃ ក៏មិនអនុញ្ញាតឲ្យលើកឡើងពីបញ្ហាទាក់ទងនឹងព្រះមហាក្សត្រ នៅពេលជជែកដេញដោលឡើយ៕