COVID-19
អន្តរជាតិ
ចិន ធ្វើតេស្តទ្រង់ទ្រាយធំរក COVID-19 ក្រោយផ្ទុះករណីឆ្លងគ្មានរោគសញ្ញានៅខេត្តស៊ីនជាំង
×![]()
ដោយ៖កង ម៉េងហុង
នៅថ្ងៃទី២៥ ខែតុលា មន្ត្រីរបស់ចិនកំពុងប្រឹងប្រែងលុបបំបាត់ការឆ្លង COVID-19 ដែលផ្ទុះឡើងជាថ្មីនៅភាគពាយព្យនៃប្រទេស បន្ទាប់រកឃើញករណីឆ្លងថ្មីចំនួន ១៣៧។ ការធ្វើតេស្តកំពុងធ្វើឡើងនៅទីក្រុង Kashgar ដែលមានករណីឆ្លងថ្មី។ 
បើតាមសារព័ត៌មាន AFP ការធ្វើតេស្តទ្រង់ទ្រាយចាប់ផ្ដើមតាំងពីល្ងាចថ្ងៃទី២៤ ខែតុលាការ ដោយគ្របដណ្ដប់លើប្រជាជនចំនួន៤,៧៥ លាននាក់នៅក្នុងនិងជុំវិញតំបន់ Kashgar នៃខេត្តស៊ីនជាំង បន្ទាប់ពីកម្មការិនីរោងចក្រកាត់ដេរអាយុ ១៧ ឆ្នាំម្នាក់បានធ្វើតេស្តវិជ្ជមានជំងឺ COVID-19 ។ រដ្ឋាភិបាលតំបន់និយាយនៅក្នុងសេចក្តីថ្លែងការណ៍មួយថា សំណាកជាង ២,៨ លានត្រូវបានប្រមូល ហើយសំណាកដែលនៅសល់នឹងត្រូវប្រមូលបញ្ចប់ក្នុងរយៈពេលពីរថ្ងៃ។
ទូរទស្សន៍រដ្ឋចិន CCTV បានរាយការណ៍ថា ក្រុមគ្រូពេទ្យពិសេសមួយមកពីគណៈកម្មការសុខភាពជាតិនៅទីក្រុងប៉េកាំង ត្រូវបានបញ្ជូនទៅស៊ើបអង្កេតអំពីប្រភពនៃការផ្ទុះឡើង COVID-19 នៅស៊ីនជាំង និង ជួយរកវិធានការបង្ការផងដែរ។
គណៈកម្មការសុខាភិបាលរបស់ខេត្តភាគខាងលិចមួយ អះអាងក្នុងសន្និសីទសារព័ត៌មានមួយនៅថ្ងៃទី ២៥ ថា ករណីថ្មីទាំងអស់ ដែលសុទ្ធតែមិនបញ្ចេញរោគសញ្ញា មានជាប់ទាក់ទងទៅនឹងរោងចក្រមួយក្នុងតំបន់ Shufu ដែលក្មេងស្រីខាងលើ និងឪពុកម្តាយរបស់នាងធ្វើការ។
សម្រាប់ថ្ងៃទី២៥ ខែតុលាដែរ ចិនបានរាយការណ៍ករណីថ្មីចំនួន២០ដែលជាករណីនាំចូលទាំងអស់ និងករណីឆ្លងដែលមិនបង្ហាញរោគសញ្ញាចំនួន១៦១ ដែលរាប់បញ្ចូលករណីនៅ Kashgar ដែរ ។ ក្នុងចំណោមការឆ្លងរោគដែលមិនមានរោគសញ្ញាថ្មីចំនួន១៦១ករណីដែលចិនមិនបានចាត់ថ្នាក់ជាករណីឆ្លង មាន ១៣៨ នាក់បានឆ្លងនៅក្នុងស្រុក៕
Tag:
ចិន
COVID-19
© រក្សាសិទ្ធិដោយ thmeythmey.com
