ការជ្រើសរើសប្រធានអង្គការពាណិជ្ជកម្មពិភពលោក(WTO)ថ្មី កំពុងស្ថិតក្នុងសភាពមិនច្បាស់លាស់ បន្ទាប់ពីអាមេរិកច្រានចោលសំណើតែងតាំងអតីតរដ្ឋមន្ត្រីហិរញ្ញវត្ថុនីហ្សេរីយ៉ាដែលអង្គការនេះបានជ្រើសតាំង។រដ្ឋាភិបាលអាមេរិកចោទថា បេក្ខភាពថ្មីនេះមានទំនោរទៅរកចិនថែមទៀត។
បន្ទាប់ពីមានការជជែកពិភាក្សារយៈពេលជាច្រើនសប្តាហ៍ អង្គការពាណិជ្ជកម្មពិភពលោកអះអាងតាំងពីថ្ងៃទី២១ តុលាថា អតីតរដ្ឋមន្ត្រីហិរញ្ញវត្ថុនីហ្សេរីយ៉ាលោកស្រីNgozi Okonjo-Iweala សាកសមនឹងទទួលតំណែងជាប្រធានអង្គការនេះដ្បិតអីលោកស្រីទទួលបានសម្លេងគ្រប់គ្រាន់ពីតំបន់ទាំងអស់។
យ៉ាងណាក៏ដោយ ការតែងតាំងនេះត្រូវបានជំទាស់ដោយរដ្ឋាភិបាលក្រុងវ៉ាស៊ីនតោន ដែលបង្កឲ្យមានបញ្ហាចម្រូងចម្រាស ដ្បិតថា ដើម្បីតែងតាំងប្រធានស្ថាប័ននេះ វាចាំបាច់ត្រូវមានការយល់ព្រមជាកុងសង់ស៊ីសពីសំណាក់ប្រទេសសមាជិកចំនួន ១៦៤។
លោក Keith Rockwell អ្នកនាំពាក្យអង្គការ WTO បានអះអាងថា ប្រទេសទាំងអស់បង្ហាញការគាំទ្រដំណើរការ និងលទ្ធផលនៃការជ្រើសរើសប្រធានថ្មី លើកលែងតែប្រទេសមួយប៉ុណ្ណោះ។ លោកRockwell ចង់សំដៅទៅអាមេរិកដែលជំទាស់នឹងបេក្ខភាពលោកស្រី Okonjo-Iweala។
បើតាមទីភ្នាក់ងារព័ត៌មាន Reuters ប្រធានាធិបតីអាមេរិក ដូណាល់ ត្រាំ ជាអ្នកចេញមុខជំទាស់នឹងបេក្ខភាពនេះផ្ទាល់ ដោយលោក អះអាងថា លោកស្រីOkonjo-Iweala ជាមនុស្សមិនល្អ និងមានទំនោរទៅរកចិន។
ស្របពេលជាមួយគ្នានោះ ការិយាល័យតំណាងពាណិជ្ជកម្មអាមេរិកអះអាងថា ខ្លួនគាំទ្របេក្ខជនមួយរូបផ្សេងទៀតដែលនៅសល់ គឺរដ្ឋមន្ត្រីពាណិជ្ជកម្មកូរ៉េខាងត្បូងលោកស្រី Yoo Myung-hee ។ អាមេរិកអះអាងថា លោកស្រី Myung-hee ជាអ្នកចចារពាណិជ្ជកម្មដ៏ជោគជ័យ និងមានជំនាញក្នុងការដឹកនាំអង្គការពាណិជ្ជកម្ម។
លើសពីនេះ អាមេរិកបានបញ្ជាក់ថា អង្គការ WTO ត្រូវការអ្នកដឹកនាំដែលមានបទពិសោធន៍ផ្ទាល់ ដែលក្នុងន័យនេះអាមេរិកចង់សំដៅជាប្រយោលថា លោកស្រី Okonjo-Iweala ខ្វះចំណេះដឹងក្នុងការចចារពាណិជ្ជកម្មបែបពហុភាគី។
តាមពិតទៅបេក្ខភាពរបស់លោកស្រី Okonjo-Iweala ទទួលបានការយល់គាំទ្រពីសំណាក់ប្រទេសអាហ្វ្រិក ការ៉ាអ៊ីប និងប្រទេសសមាជិកដទៃទៀតក្នុងរយៈពេលបួនខែនៃនីតិវិធីជ្រើសតាំងប្រធានថ្មី។ ចំណែកសហភាពអឺរ៉ុបវិញ ក៏គាំទ្របេក្ខភាពរបស់លោកស្រីដែរ កាលពីថ្ងៃទី២៦ តុលា។
ត្រឡប់មកវិញ មូលហេតុដែលអង្គការ WTO ត្រូវជ្រើសរើសប្រធានថ្មី គឺដោយសារអតីតប្រធានអង្គការនេះ លោកRoberto Azevedo សម្រេចចុះចេញពីតំណែង។ បច្ចុប្បន្ននេះ WTO កំពុងដឹកនាំជាបណ្តោះអាសន្នដោយអនុប្រធានចំនួនបួនរូប។
លោកស្រី Okonjo-Iweala មានវ័យ៦៦ឆ្នាំ ធ្លាប់បំពេញការងារជារដ្ឋមន្ត្រីហិរញ្ញវត្ថុនីហ្សេរីយ៉ា និងធ្លាប់បម្រើការងារនៅធនាគារពិភពលោកផង។ បច្ចុប្បន្ន លោកស្រីជាប្រធានក្រុមប្រឹក្សាភិបាលសម្ព័ន្ធវ៉ាក់សាំងGAVI។ លោកស្រីអះអាងថា WTO គួរដើរតួនាទីយ៉ាងសំខាន់ក្នុងការជួយប្រទេសក្រីក្រឲ្យទទួលបានវ៉ាក់សាំងបង្ការជំងឺកូវីដ-១៩។
ក្នុងករណីលោកស្រីក្លាយជាប្រធាន WTO លោកស្រីក៏នឹងត្រូវជួបបញ្ហាប្រឈមជាច្រើនផងដែរ ជាពិសេសគឺការស្រោចស្រង់ការធ្វើពាណិជ្ជកម្មឡើងវិញអំឡុងពេល និងក្រោយពេលCOVID-19។ បន្ថែមពីនេះ លោកស្រីក៏ត្រូវទប់ទល់នឹងចរន្តពាណិជ្ជកម្ម និងសេដ្ឋកិច្ចគាំពារនិយមដែលសុទ្ធសឹងជាគោលជំហរមួយផ្ទុយទៅនឹងគោលការណ៍របស់ស្ថាប័នពាណិជ្ជពិភពលោកនេះ៕