ជាតិ
សហភាពអឺរ៉ុបឧបត្ថម្ភកម្ពុជា៤៧ម៉ឺនដុល្លារដើម្បីជួយជនរងគ្រោះដោយទឹកជំនន់
×![]()
ដោយ: ខន ចំប៉ា
សហភាពអឺរ៉ុប បានផ្តល់ជំនួយជាទឹកប្រាក់ចំនួន៤៧ម៉ឺនដុល្លារ ដើម្បីដោះស្រាយបញ្ហាគ្រោះទឹកជំនន់នៅកម្ពុជា។ តាមប្រតិភូសហភាពអឺរ៉ុបប្រចាំកម្ពុជា ជំនួយនេះ នឹងផ្តល់ទៅឲ្យពលរដ្ឋដែលរងប៉ះពាល់ខ្លាំង ហើយត្រូវការដំណោះស្រាយបន្ទាន់ ជាពិសេសនៅក្នុងខេត្ត ឬតំបន់ដែលរងគ្រោះធ្ងន់ធ្ងរ។ 
សហភាពអឺរ៉ុប (EU) បានផ្តល់ជំនួយជាទឹកប្រាក់ចំនួន ៤០ម៉ឺនអឺរ៉ូ ដែលស្មើនឹងប្រមាណ ៤៧ម៉ឺនដុល្លារ ដើម្បីចូលរួមជួយដល់ជនរងគ្រោះដោយសារទឹកជំនន់ នៅកម្ពុជា។ តាមប្រកាសព័ត៌មានរបស់ប្រតិភូ សហភាពអឺរ៉ុប ប្រចាំកម្ពុជា ជំនួយនេះ នឹងផ្តល់ទៅឲ្យពលរដ្ឋដែលរងប៉ះពាល់ខ្លាំង ហើយត្រូវការដំណោះស្រាយបន្ទាន់ ជាពិសេសនៅក្នុងខេត្ត ឬតំបន់ដែលរងគ្រោះធ្ងន់ធ្ងរដោយទឹកជំនន់។
លោក Olivier Brouant មន្ត្រីទទួលបន្ទុកការឆ្លើយតបកិច្ចការមនុស្សធម៌សហភាពអឺរ៉ុប ប្រចាតំបន់មេគង្គ បានមានប្រសាសន៍ថា ជំនួយរបស់សហភាពអឺរ៉ុប នឹងគាំទ្រដៃកម្មវិធីមនុស្សធម៌របស់ខ្លួន ក្នុងសង្គ្រោះជីវិត ក៏ដូចជាជនងាយរងគ្រោះ ដើម្បីធានាថាពួកគេឆ្លងផុតដំណាក់លំបាកនេះ។ លោក Olivier Brouant លើកឡើងដូច្នេះ៖«ការចូលរួមនេះ គឺបង្ហាញពីសាមគ្គីភាពរបស់សហភាពអឺរ៉ុប ជាមួយប្រជាជនកម្ពុជា ដែលរងទុក្ខលំបាក បាត់បង់ផ្ទះសម្បែង ការរស់នៅ និងទ្រព្យសម្បត្តិ ដោយសារគ្រោះទឹកជំនន់»។
គួរកត់សម្គាល់ថា កន្លងមកមានបណ្តាស្ថានទូតបរទេសនៅកម្ពុជា ក៏បានផ្តល់ជំនួយជាថវិកា ការគាំទ្រផ្នែកស្មារតី សារលើកទឹកចិត្ត ដល់រដ្ឋាភិបាល ក៏ដូចជាប្រជាជនកម្ពុជា ដដែលកំពុងរងគ្រោះដោយទឹកជំនន់។ បណ្តាស្ថានទូត ទាំងនោះមានសហរដ្ឋាភិបាល ចិន ជប៉ុន បារាំង ឥណ្ឌា តួកគី វៀតណាម ឥណ្ឌូណេស៊ី និងទីម័រខាងកើតជាដើម។
អត្ថបទទាក់ទង
តាមគណៈគម្មាធិការជាតិគ្រប់គ្រងគ្រោះមហន្តរាយ គិតត្រឹមថ្ងៃទី២៧ ខែតុលា ឆ្នាំ២០២០ មានពលរដ្ឋសរុប៤៤នាក់ បានបាត់បង់ជីវិត ដោយសារគ្រោះទឹកជំនន់ ខណៈដែលពលរដ្ឋជិត៦០ម៉ឺននាក់រងការប៉ះពាល់ ក្នុងនោះមានជាង៤.៧ម៉ឺននាក់ ត្រូវបានជម្លៀសទៅទីទួលសុវត្ថិភាព។ទឹកជំនន់ ក៏បានធ្វើឲ្យផ្ទះជាង១៣.៥ម៉ឺនខ្នងត្រូវជន់លិច សាលារៀនមាន៩៥១កន្លែង និងវត្តអារាមចំនួន៣០៧កន្លែង បានលិចទឹកផងដែរ។ នេះបើតាមគណៈគម្មាធិការជាតិគ្រប់គ្រងគ្រោះមហន្តរាយ ដែលឲ្យដឹងទៀតថា ស្រូវ និងដំណាំកសិកម្មប្រមាណ ៣៨ម៉ឺនហិកតា បានរងការប៉ះពាល់ពីគ្រោះទឹកជំនន់នេះ៕
Tag:
ប្រតិភូសហភាពអឺរ៉ុប
EU
ទឹកជំនន់
ជំនួយ
© រក្សាសិទ្ធិដោយ thmeythmey.com
