ជាតិ
សង្គមជាតិ
អាជ្ញាធរខណ្ឌពោធិ៍សែនជ័យ រុះរើសំណង់នៅតាមបុរី ដែលប៉ះពាល់ប្រព័ន្ធបង្ហូរទឹកបង្កឱ្យមានទឹកជំនន់
ក្រុមការងាររបស់រដ្ឋបាលខណ្ឌពោធិ៍សែនជ័យ បន្តសកម្មភាពបាញ់ពាក្យ«រុះរើ»នៅលើសំណង់នានារបស់ពលរដ្ឋ នាព្រឹកថ្ងៃទី២៩តុលា ឆ្នាំ២០២០។ រូបថត៖ រដ្ឋបាលខណ្ឌពោធិ៍សែនជ័យ
×![]()
ភ្នំពេញ៖ អាជ្ញាធរខណ្ឌពោធិ៍សែនជ័យ ចុះរុះរើគ្រប់សំណង់នៅតាមបុរីនានា ដែលពលរដ្ឋបានសាងសង់បន្ថែម ក្រោមហេតុផលថា សំណង់ទាំងនោះធ្វើឱ្យប៉ះពាល់ដល់ប្រព័ន្ធបង្ហូរទឹក និងបង្កឱ្យមានជំនន់ទឹកភ្លៀង ឬទឹកជំនន់។
លោក ហែម ដារិទ្ធិ បានអះអាងថា មានពលរដ្ឋរស់នៅតាមបុរីមួយចំនួន បានសាងសង់សំណង់បន្ថែមនៅលើសំណង់ចាស់ ដែលមានស្រាប់ខុសពីច្បាប់អនុញ្ញាតឱ្យសាងសង់ ហើយមានសំណង់ខ្លះធ្វើបិទអណ្តូងលូ និងប្រព័ន្ធបង្ហូរទឹកថែមទៀត។
លោក ហែម ដារិទ្ធិ បានបញ្ជាក់ក្នុងសេចក្តីជូនដំណឹង កាលពីថ្ងៃទី២៨តុលា ឆ្នាំ២០២០ ថា ការរុះរើសំណង់ខុសច្បាប់ទាំងនេះ គឺដើម្បីស្តារអណ្តូងលូ និងកែលម្អប្រព័ន្ធលូបង្ហូរទឹកឡើងវិញ ជាពិសេសចៀសវាងការជន់លិចដោយសារជំនន់ទឹកភ្លៀង ឬទឹកជំនន់ផ្សេងៗ។
ក្រោយចេញសេចក្តីជូនដំណឹង អាជ្ញាធរក៏ចុះប្រតិបត្តិការការងារនៅតាមបុរីនានា ក្នុងខណ្ឌពោធិ៍សែនជ័យនៅថ្ងៃទី២៩ តុលានេះ ដោយមានសរសេរពាក្យថា «រុះរើ» នៅលើជញ្ជាំងសំណង់បន្ថែមរបស់ពលរដ្ឋទាំងនោះ ។
សារព័ត៌មានថ្មីៗ(ThmeyThmey.com) មិនអាចទាក់ទងទៅលោកអភិបាលខណ្ឌពោធិ៍សែនជ័យ ដើម្បីសុំព័ត៌មានលម្អិតពីការរុះរើសំណង់បន្ថែមរបស់ពលរដ្ឋនេះឡើយ ។
សម្រាប់ លោក សន ជ័យ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជា ក៏មិនជំទាស់នឹងវិធានការអនុវត្តរបស់អាជ្ញាធរដែរ ព្រោះលោកក៏មើលឃើញថា គ្រោះទឹកជំនន់ដែលធ្វើឱ្យលិចបុរីនេះ បណ្តាលមកពីពលរដ្ឋរស់នៅទីនោះ បានសាងសង់សំណង់ផ្សេងៗបន្ថែម ដែលធ្វើឱ្យខូចដល់បណ្តាញលូបង្ហូរទឹក រួមទាំងការចោលសំរាមគ្មានសណ្តាប់ធ្នាប់ធ្វើឱ្យស្ទះប្រព័ន្ធលូបង្ហូរទឹក។ មិនតែប៉ុណ្ណោះ ការសាងសង់លំនៅដ្ឋាន របស់ម្ចាស់គម្រោងឬអ្នកអភិវឌ្ឍ ក៏មិនអនុវត្តឱ្យបានត្រឹមត្រូវតាមបច្ចេកទេសនៃប្រព័ន្ធលូបង្ហូរទឹក។
«អ្វីដែលខ្ញុំចាប់អារម្មណ៍គឺបណ្តាញលូ។ នៅពេលសាងសង់សំណង់ហើយ តើប្លង់មេរបស់ប្រព័ន្ធលូហ្នឹង តម្កល់បានល្អដែរឬទេ។ ហើយអ្នកណា ជាអ្នកទុកដាក់ឯកសារទាំងអស់នេះ នៅពេលដែលពលរដ្ឋឬមហាជនត្រូវការវាដើម្បីដោះស្រាយបញ្ហាពេលមានទឹកលិច»។ នេះជាការលើកឡើងរបស់ លោក សន ជ័យ ដោយបន្តនិយាយប្រាប់សារព័ត៌មានថ្មីៗ បន្ថែមដូច្នេះ«៖យើងសង្ស័យថាលូដែលដាក់នេះ គឺតូចៗពេក។ [លូបង្ហូរទឹក]តូចចឹងទៅ វាងាយធ្វើឱ្យកកស្ទះ»។
បើតាមលោក សន ជ័យ ប្រព័ន្ធបង្ហូរទឹករបស់បុរីក្នុងតំបន់ដែលលោករស់នៅជាង១០ឆ្នាំមកនេះ គឺអាចកកស្ទះនូវសំរាមផ្សេងៗដោយសារប្រព័ន្ធលូតូចពេក ដែលធ្វើឱ្យទឹកជំនន់លិចបុរីកាន់តែខ្លាំង និងមានរយៈពេលកាន់តែយូរ។ ទន្ទឹមនឹងអាជ្ញាធរ កំពុងចាត់វិធានការរុះរើសំណង់បន្ថែមរបស់ពលរដ្ឋនោះ នាយកប្រតិបត្តិនៃសម្ព័ន្ធគណនេយ្យភាពសង្គមកម្ពុជារូបនេះ ក៏ទាមទារឱ្យអាជ្ញាធរពាក់ព័ន្ធទាំងឡាយ ត្រូវពិនិត្យឡើងវិញនូវការគ្រប់គ្រងលូបង្ហូរទឹក ឬបណ្តាញលូ និងបណ្តាញមេបង្ហូរទឹក ជាដើម។
លោកបាននិយាយដូច្នេះ៖«ឆ្នាំនេះ[២០២០] គឺជាឆ្នាំមួយគួរកំចាត់ ការបំពានលើបណ្តាញលូ ការបំពានលើប្រឡាយមេ[បង្ហូរទឹក]ជាដើម និងត្រូវពិនិត្យមើលប្រព័ន្ធគ្រប់គ្រងប្រឡាយ»។ លោក សន ជ័យ បានសង្កត់ធ្ងន់ថា៖«ធ្វើយ៉ាងម៉េចរៀបចំប្រឡាយមេ[បង្ហូរទឹក]ហ្នឹង ឱ្យប្រជាពលរដ្ឋមើលឃើញទឹកហូរឱ្យច្បាស់ៗ។ កុំ ទឹកហូរក្រោមស្មៅ ទឹកហូរក្រោមកំប្លោក ទឹកហូរក្រោមសំរាមដូចសព្វថ្ងៃ»។
កាលពីខែដើមតុលា ឆ្នាំ២០២០ រាជធានី និងបណ្តាខេត្តមួយចំនួនរបស់កម្ពុជាជួបប្រទះនូវគ្រោះទឹកជំនន់ដោយសារភ្លៀងធា្លក់ខ្លាំងយ៉ាងគំហុកជាបន្តបន្ទាប់។ ជំនន់ទឹកភ្លៀងនេះ ក៏បានធ្វើឱ្យផ្ទះឬបុរីនានារបស់ពលរដ្ឋនៅខណ្ឌចំនួននៃរាជធានីភ្នំពេញ ពិសេសខណ្ឌដង្កោ និងខណ្ឌពោធិ៍សែនជ័យ បានជន់លិចយ៉ាងខ្លាំង ។ រហូតដល់សព្វថ្ងៃនេះ ជំនន់ទឹកភ្លៀងនៅក្នុងបុរីទាំងនោះមិនស្រក់អស់បានល្អប្រសើរនៅឡើយ ខណៈទឹកជំនន់នៅតាមតំបន់និងខេត្តផ្សេងៗ គឺស្រកចុះអស់ហើយ៕
Tag:
សំណង់
ជំនន់ទឹកភ្លៀង
ប្រព័ន្ធលូ
ខណ្ឌពោធិ៍សែនជ័យ
© រក្សាសិទ្ធិដោយ thmeythmey.com
