ដែនជម្រកសត្វព្រៃកែវសីមា មានសត្វព្រៃដែលរងការគំរាមកំហែង ១៣ប្រភេទ និងរុក្ខជាតិ៧៥ប្រភេទ

ជាតិ

ដែនជម្រកសត្វព្រៃកែវសីមា មានសត្វព្រៃដែលរងការគំរាមកំហែង ១៣ប្រភេទ និងរុក្ខជាតិ៧៥ប្រភេទ

30, Oct 2020 , 8:00 am

រូបភាព

ទោចថ្ពាល់លឿង

ដោយ:

ភ្នំពេញ៖ សត្វព្រៃ១៣ប្រភេទ ដែលរងការគំរាមកំហែង និងត្រូវបានចុះក្នុងបញ្ជីក្រហមរបស់អង្គការ IUCN រួមទាំងរុក្ខជាតិកំពុងរងការគំរាមកំហែង ៧៥ប្រភេទ ត្រូវបានរកឃើញមានវត្តមាននៅក្នុងដែនជម្រកសត្វព្រៃកែវសីមា។ នេះបើតាមរបាយការណ៍១០ឆ្នាំ (២០១០-២០២០)របស់ អង្គការសមាគមអភិរក្សសត្វព្រៃកម្ពុជា (WCS) ដែលបានបញ្ជាក់ថា ដែនជម្រកសត្វព្រៃកែវសីមានេះ មានប្រភេទសត្វព្រៃ និងជីវចម្រុះប្រមាណ១,០០០ប្រភេទ ដែលជាចំនួនច្រើនជាងគេបង្អស់ក្នុងចំណោមតំបន់ការពារធម្មជាតិនៅទូទាំងកម្ពុជា។

ដែនជម្រកសត្វព្រៃកែវសីមា ដែលមានភូមិសាស្ត្រក្នុងខេត្តមណ្ឌលគិរី និងក្រចេះ កំពុងមានវត្តមានរស់នៅរបស់សត្វព្រៃចំនួន១៣ប្រភេទ ដែលរងការគំរាមកំហែង និងត្រូវបានចុះក្នុងបញ្ជីក្រហមរបស់អង្គការ IUCN ។ នេះបើតាមលោក នេត្រ ភក្ត្រា អ្នកនាំពាក្យក្រសួងបរិស្ថាន ដែលបានលើកយករបាយការណ៍១០ឆ្នាំ (២០១០-២០២០) របស់អង្គការសមាគមអភិរក្សសត្វព្រៃកម្ពុជា (WCS) មកសំអាង។

អ្នកនាំពាក្យក្រសួងបរិស្ថាន បានឲ្យដឹងទៀតថា សត្វព្រៃទាំង ១៣ប្រភេទនោះរួមមាន ឈ្លូស ទន្សោង ខ្ទីង រមាំង និងប្រើស ស្វាកន្ទុយស ទោចថ្ពាល់លឿង ស្វាព្រាម ស្វាក្ដាម ស្វាត្រោស ស្វាអង្កត់ ក្ងោក ជ្រូកព្រៃ។ ក្រៅពីសត្វព្រៃ រុក្ខជាតិ៧៥ប្រភេទ ដែលកំពុងរងការគំរាមកំហែងដែរនោះ ក៏ត្រូវបានរកឃើញមានវត្តមាននៅដែនជម្រកសត្វព្រៃកែវសីមានេះដែរ។

ការតាំងបង្ហាញប្រភេទសត្វកម្រមានក្នុងដែនជម្រកសត្វព្រៃកែវសីមា

«សត្វជើងបួនងាយ នឹងប្រឈមជាងគេ ដោយសារជាប់អន្ទាក់របស់អ្នកប្រមាញ់»។ នេះបើតាមការអះអាងរបស់លោក លោក នេត្រ ភក្ត្រា ដោយបន្ថែមថា ចំនួនសត្វស្វាកន្ទុយស ទោចថ្ពាល់លឿង ស្វាក្តាម និងជ្រូកព្រៃ នៅថេរ ប៉ុន្តែចំនួនស្វាព្រាម ស្វាអង្គត់ និងថនិកសត្វក្រចកជំពាមមាឌធំ លើកលែងជ្រូកព្រៃ កំពុងមានការថយចុះ។

លោក អូលី ហ្គ្រីហ្វ៊ីន (Olly Griffin) អ្នកវិភាគទិន្នន័យ និងជាទីប្រឹក្សាបច្ចេកទេសនៃអង្គការ WCS បានឱ្យដឹងថា សត្វស្វាកន្ទុយស មានចំនួន ៦ ៧៥៦ក្រុម និងទោចថ្ពាល់លឿងចំនួន ៦៦៩ក្រុម។ រីឯស្វាព្រាមចំនួន ៣៦៤ក្រុម ស្វាក្តាមចំនួន ៤២៤ក្រុម ស្វាត្រោសចំនួន ១ ៤៨៣ក្រុម ស្វាអង្គត់ចំនួន ៥៦ក្រុម ក្ងោកចំនួន ៩៦៦ក្បាល និងជ្រូកព្រៃចំនួន ១ ១៦២ក្បាល។ ដោយឡែក សត្វឈ្លូស មានចំនួន ៧៣២ក្បាល ថនិកសត្វក្រចកជំពាមមាឌធំ ដូចជាទន្សោង ខ្ទីង រមាំង និងប្រើស មិនបានដឹងពីចំនួនពិតប្រាកដទេ។

ក្រសួងបរិស្ថាន និងអង្គការ WCS បានស្នើឱ្យមានការចូលរួមពីគ្រប់ភាគីពាក់ព័ន្ធក្នុងកិច្ចការពារ និងអភិរក្ស ខណៈពពួកសត្វទាំងនេះ នៅតែរងការគំរាមកំហែងដោយការបរបាញ់ ជាប់អន្ទាក់ និងការប្រើសត្វឆ្កែដើម្បីប្រមាញ់ជាដើម៕