ទណ្ឌិត៦៩៥នាក់ ស្ថិតក្នុងបញ្ជីស្នើសុំបន្ធូរបន្ថយ និងលើកលែងទោសក្នុងឱកាសបុណ្យអុំទូក

ជាតិ

សង្គមជាតិ

ទណ្ឌិត៦៩៥នាក់ ស្ថិតក្នុងបញ្ជីស្នើសុំបន្ធូរបន្ថយ និងលើកលែងទោសក្នុងឱកាសបុណ្យអុំទូក

30, Oct 2020 , 12:59 pm

រូបភាព

រូបភាពពីក្រសួងព័ត៌មាន

ដោយ: ឡាយ សុភាវតី

ភ្នំពេញ៖ ទណ្ឌិត៦៩៥នាក់ ក្នងនោះស្រី ៦៥នាក់ ត្រូវបានដាក់ទៅក្នុងបញ្ជីស្នើសុំលើកលែងទោស និងបន្ធូរបន្ថយទោស នៅក្នុងឱកាសពិធីបុណ្យអុំទូក បណ្ដែតប្រទីប សំពះព្រះខែ និងអកអំបុក ឆ្នាំ២០២០នេះ។ លោក គឹម សន្តិភាព អ្នកនាំពាក្យក្រសួងយុត្តិធម៌ បញ្ជាក់ប្រាប់សារព័ត៌មានថ្មីៗតាមប្រព័ន្ធ Telegram ដូច្នេះ។

ទណ្ឌិតជាង១ពាន់នាក់ មកពីបណ្ដាពន្ធនាគាររាជធានី-ខេត្តចំនួន២៤និងមណ្ឌលអប់រំកែប្រែ៤ បានដាក់សុំស្នើបន្ធូរបន្ថយ និងលើកលែងទោស នាឱកាសពិធីបុណ្យអុំទូក។ ប៉ុន្តែមានតែទណ្ឌិត ៦៩៥នាក់ប៉ុណ្ណោះ ត្រូវបានសម្រេចបញ្ចូលទៅក្នុងបញ្ជីសម្រាប់ស្នើសុំបន្ធូរ និងលើកលែងទោស។ នេះបើតាមលោក គឹម សន្តិភាព អ្នកនាំពាក្យក្រសួងយុត្តិធម៌ ប្រាប់សារព័ត៌មានថ្មីៗតាមប្រព័ន្ធ Telegram នៅថ្ងៃនេះ។

លោក គឹម សន្តិភាព ប្រាប់សារព័ត៌មានថ្មីៗដូច្នេះ៖«រដ្ឋមន្រី្តក្រសួងយុត្តិធម៌ និងប្រធានគណៈកម្មការថ្នាក់ជាតិ បានពិនិត្យ និងវាយតម្លៃបញ្ជីឈ្មោះទណ្ឌិតទាំងនោះ ហើយក៏បានសម្រេចជ្រើសយក ទណ្ឌិត៦៩៥នាក់ សម្រាប់ស្នើទៅសម្ដេច ហ៊ុន សែន ដើម្បីទូលថ្វាយព្រះមហាក្សត្រ ព្រះប្រទានការអនុគ្រោះទោស»។

តាមអ្នកនាំពាក្យក្រសួងយុត្តិធម៌ ក្នុងចំណោមអ្នកទោសដែលស្ថិតក្នុងបញ្ជីស្នើសុំនោះ មានទណ្ឌិតស្ត្រីចំនួន ៦៥នាក់។ លោក គឹម សន្តិភាព ឲ្យដឹងទៀតថា ទណ្ឌិតទាំង៦៩៥នាក់នោះ នឹងត្រូវដាក់ស្នើសុំបន្ថយទោសមួយជីវិត មកនៅ២០ឆ្នាំចំនួន៥នាក់, ស្នើសុំលើកលែងទោស១៩នាក់។ ចំណែកទណ្ឌិត ដែលស្នើសុំបន្ធូរបន្ថយទោស១២ខែ មាន៩២នាក់, ស្នើសុំបន្ធូរបន្ថយទោស៩ខែ មាន៩៥នាក់ និងស្នើសុំបន្ធូរបន្ថយទោស៦ខែ មាន៤៨៤នាក់។ នេះបើតាមអ្នកនាំពាក្យក្រសួងយុត្តិធម៌៕