សង្គមអន្តរជាតិ
អន្តរជាតិ
កូរ៉េខាងជើង បន្ទោសកូរ៉េខាងត្បូងពីការគ្រប់គ្រងមន្ត្រីក្រសួងនេសាទរបស់ខ្លួនមិនល្អ មេដឹកនាំកំពូលកូរ៉េខាងជើងគីម ជុងអ៊ុន។ រូបភាព៖ AFP។
× កូរ៉េខាងជើង នៅថ្ងៃទី៣០ ខែតុលា បានបន្ទោសកូរ៉េខាងត្បូងជុំវិញការគ្រប់គ្រងមន្ត្រីក្រសួងនេសាទរបស់ខ្លួនមិនបានល្អ ដែលបណ្តាលឲ្យទាហានកូរ៉េខាងជើងបាញ់សម្លាប់។ នេះបើតាមការចុះផ្សាយរបស់ទីភ្នាក់ងារព័ត៌មានកូរ៉េខាងជើង KCNA។
នៅខែកញ្ញាកន្លងទៅ មន្ត្រីកូរ៉េខាងត្បូង បានរាយការណ៍ថា កូរ៉េខាងជើងបានបាញ់សម្លាប់មន្ត្រីក្រសួងនេសាទនៅតំបន់ព្រំដែនសមុទ្រប្រទេសទាំងពីរ និងដុតសាកសពទាំងនោះថែមទៀត។ ជាការឆ្លើយតប មេដឹកនាំកូរ៉េខាងជើង បានផ្ញើសារសុំទោសទៅកាន់ប្រធានាធិបតី និងប្រជាជនកូរ៉េខាងត្បូង។ ចំណែកកូរ៉េខាងត្បូង បានទាមទារឲ្យមានការស៊ើបអង្កេតលើបញ្ហានេះ។
យ៉ាងណាក៏ដោយ កូរ៉េខាងជើង បានចោទកូរ៉េខាងត្បូងជាថ្មី ថាគ្រប់គ្រងមន្ត្រីរបស់ខ្លួនមិនបានល្អ។ តាមការចុះផ្សាយរបស់ទីភ្នាក់ងារព័ត៌មានKCNA ឧបទ្ទវហេតុ ដែលបណ្តាលឲ្យទាហានរបស់ខ្លួនបាញ់សម្លាប់មន្ត្រីក្រសួងនេសាទកូរ៉េខាងត្បូងនេះ គឺដោយសារកូរ៉េខាងត្បូង គ្រប់គ្រងមន្ត្រីរបស់ខ្លួនមិនបានល្អនៅតំបន់ព្រំដែនសមុទ្រ ខណៈកូវីដ-១៩ កំពុងផ្ទុះឡើង។ បើតាមកូរ៉េខាងជើង កូរ៉េខាងត្បូងទេ ដែលបង្កកំហុសនេះមុន។
នៅក្នុងការបាញ់សម្លាប់មន្ត្រីនេសាទ កូរ៉េខាងជើងបានអះអាងថា ខ្លួនបានបាញ់អស់គ្រប់ប្រហែល១០បង់ ហើយបន្ទាប់មកសាកសពនោះបានបាត់ខ្លួនទៅក្នុងសមុទ្រ ដោយកូរ៉េខាងជើង បានបដិសេធថាខ្លួន មិនបានដុតសាកសពនោះឡើយ។ មកទល់ពេលនេះ សកសពមន្ត្រីរូបនោះ មិនទាន់រកឃើញនៅឡើយទេ។
ថ្មីៗនេះ កូរ៉េខាងជើង ក៏បានផ្ញើសារប្រាប់កូរ៉េខាងត្បូងជាថ្មី ដោយអះអាងថា ខ្លួនមិនបានរកឃើញសាកសព និងចូលរួមសោកស្តាយជុំវិញបញ្ហានេះ៕
Tag:
កូរ៉េខាងជើង
កូរ៉េខាងត្បូង
© រក្សាសិទ្ធិដោយ thmeythmey.com