មិនមានកម្មវិធីក្នុងបុណ្យអុំទូក តែអភិបាលខេត្តសៀមរាប ទទូចឱ្យអ្នកដើរកម្សាន្តដោយការទទួលខុសត្រូវ

COVID-19

ជាតិ

បុណ្យអុំទូក

មិនមានកម្មវិធីក្នុងបុណ្យអុំទូក តែអភិបាលខេត្តសៀមរាប ទទូចឱ្យអ្នកដើរកម្សាន្តដោយការទទួលខុសត្រូវ

30, Oct 2020 , 5:59 pm

រូបភាព

រូបភាព៖ ទំព័រហ្វេសប៊ុក លោក ទៀ សីហា អភិបាលខេត្តសៀមរាប

ដោយ: អុីសា រ៉ហានី (Isa Rohany)

សៀមរាប៖ រដ្ឋបាលខេត្តសៀមរាប បានប្រកាសផ្អាករៀបចំពិធីនៅថ្នាក់ខេត្តនាឱកាសបុណ្យអុំទូកឆ្នាំនេះ ដោយសារគ្រោះទឹកជំនន់។ បើទោះបីមិនមានរៀបចំពិធីសប្បាយយ៉ាងណាក្ដី តែភ្ញៀវទេសចរនៅតែជ្រើសរើសខេត្តសៀមរាប ជាគោលដៅដើរកម្សាន្តជាលក្ខណៈគ្រួសារ។ អភិបាលខេត្តសៀមរាប បានបង្ហាញអារម្មណ៍ និងស្វាគមន៍ចំពោះវត្តមានភ្ញៀវទេសចរមកកាន់ខេត្តទេសចរណ៍វប្បធម៌មួយនេះ តែមិនភ្លេចក្រើនរំឭកឱ្យមានការការពារចំពោះជំងឺកូវីដ១៩នោះទេ។

«ទិដ្ឋភាពបងប្អូនប្រជាពលរដ្ឋបានមកលេងខេត្តសៀមរាបយ៉ាងច្រើនកុះករនាព្រឹកនេះ។ សង្ឃឹមថាបងប្អូនប្រជាពលរដ្ឋ និងក្រុមគ្រួសារមកលេងខេត្តសៀមរាប ប្រកបដោយភាពសប្បាយរីករាយ ក្នុងអំឡុងពេលថ្ងៃឈប់សម្រាកនេះ»។ នេះជាសាររបស់លោក ទៀ សីហា ដែលបានបង្ហោះក្នុងទំព័រហ្វេសប៊ុកផ្លូវការរបស់លោកនារសៀលថ្ងៃទី៣០ តុលា ដែលជាថ្ងៃទី១ ថ្ងៃឈប់សម្រាកនៃពិធីបុណ្យអុំទូក។

សារណែនាំចំនួន៤ចំណុច ដែលលោកអភិបាលបានសរសេរទៅកាន់ភ្ញៀវទេសចរទាំងអស់នាឱកាសនេះ ដែលរួមមាន កុំភ្លេចពាក់ម៉ាស់ឬក្រម៉ា កុំភ្លេចលាងដៃ កុំភ្លេចរក្សាគម្លាតសុវត្ថិភាពសង្គម និងបើកបរដោយការប្រុងប្រយ័ត្ន និងគោរពច្បាប់ចរាចរណ៍៕