COVID-19
អន្តរជាតិ
អគ្គនាយក WHO ធ្វើចត្តាឡីស័ក ក្រោយប៉ះពាល់អ្នកមាន COVID-19 អគ្គនាយកអង្គការសុខភាពពិភពលោក Tedros Adhanom Ghebreyesus ។ រូបភាព Xinhua
× អគ្គនាយកអង្គការសុខភាពពិភពលោក WHO លោក Tedros Adhanom Ghebreyesus កំពុងដាក់ខ្លួនឯងនៅដោយឡែក បន្ទាប់ពីបានប៉ះពាល់អ្នកផ្ទុកជំងឺ COVID-19 ។ លោក Tedros អះអាងថា លោកមិនមានរោគសញ្ញាអ្វីទេ។
«ខ្ញុំត្រូវបានកំណត់ថា ជាអ្នកប៉ះពាល់បុគ្គលម្នាក់ដែលត្រូវបានធ្វើតេស្តចេញលទ្ធផលវិជ្ជមានជំងឺ COVID-19។» លោក Tedros Adhanom Ghebreyesus សរសេរបែបនេះនៅលើបណ្ដាញសង្គម Twitter នៅយប់ថ្ងៃទី១ ខែវិច្ឆិកា។ លោកបន្តថា លោកមានសុខភាពល្អធម្មតា គ្មានរោគសញ្ញា ហើយត្រូវធ្វើចត្តាឡីស័កតាមការណែនាំរបស់ WHO និងបន្តបំពេញការងារពីផ្ទះ។
លោក Tedros ជាមន្ត្រីជួរមុខក្នុងការទប់ទល់ជំងឺរាតត្បាសាកលមួយនេះ ដែលបានឆ្លងលើមនុស្សច្រើនជាង៤៦លាននាក់ ដោយក្នុងនោះជិត១លាន២សែននាក់ បានបាត់បង់ជីវិត។
នៅលើ Twitter ដដែល អគ្គនាយក WHO បានសង្កត់ធ្ងន់ពីសារសំខាន់នៃការអនុវត្តតាមវិធានសុខាភិបាល។ លោកពន្យល់ថា ការធ្វើបែបនេះជាការបំបែកច្រវាក់ចម្លង COVID-19 និងទប់ស្កាត់វីរុស និងការពារប្រព័ន្ធសុខាភិបាលផង។
អាមេរិក នៅតែឈរលេខរៀងទីមួយតារាងប្រទេសមានករណីឆ្លងច្រើនជាងគេ ដោយមានអ្នកឆ្លងសរុបជាង៩លាន៤សែននាក់ និងស្លាប់ជាង២៣ម៉ឺននាក់។ ករណីឆ្លងនៅអឺរ៉ុប ក៏កាន់តែធ្ងន់ធ្ងរ ដោយប្រទេសជាច្រើនចាប់ផ្ដើមបិទប្រទេសឡើងវិញមានអង់គ្លេស និងបារាំងជាដើម៕
© រក្សាសិទ្ធិដោយ thmeythmey.com