កីឡាជាតិ
ជាតិ
«គរុគុណ»ជាឈ្មោះពានរបស់សហព័ន្ធកីឡាប៉េតង់ ដែលរៀបចំដើម្បីរំលឹកគុណស្ថាបនិក
លោក ស សុខា ថ្លែងក្នុងសន្និសីទសារព័ត៌មានស្តីពីពាន គរុគុណ នៅថ្ងៃទី១ ខែវិច្ឆិកា ឆ្នាំ២០២០
×![]()
សហព័ន្ធកីឡាប៊ូល និងប៉េតង់កម្ពុជា នឹងរៀបចំការប្រកួតដណ្តើមពានរង្វាន់«គរុគុណ»លើកដំបូង ដើម្បីតបស្នង និងរំលឹកគុណដល់សម្តេចវិបុលបញ្ញា សុខ អាន និងសម្តេច ស ខេង ដែលជាស្ថាបនិករបស់សហព័ន្ធ។ ក្រៅពីផ្តល់ឱកាសឲ្យកីឡាករកីឡាការិនីបានបង្ហាញសមត្ថភាព ការពង្រឹងសមត្ថភាពកីឡាករ សម្រាប់ត្រៀមប្រជែងដណ្តើមមេដាយក្នុងព្រឹត្តិការណ៍កីឡាស៊ីហ្គេមឆ្នាំ២០២១ នៅវៀតណាម ក៏ស្ថិតក្នុងគោលបំណងនៃព្រឺត្តិការណ៍នេះដែរ។ 
«គរុគុណ»ជាឈ្មោះពានរង្វាន់ថ្មីរបស់សហព័ន្ធកីឡាប៊ូល និងប៉េតង់កម្ពុជា ដែលត្រូវបានបង្កើតឡើង ដើម្បីតបស្នង និងរំលឹកគុណដល់អតីតប្រធានសហព័ន្ធសម្តេចវិបុលបញ្ញា សុខ អាន ដែលបានទទួលមរណភាព កាលពីថ្ងៃទី១៥ ខែមីនា ឆ្នាំ២០១៧ និងសម្តេច ស ខេង ប្រធានកិត្តិយស។ ស្ថាបនិកទាំងពីររូបនេះ បានលះបង់ទាំងកម្លាំងកាយចិត្តនិងធនធានផ្ទាល់ខ្លួនយ៉ាងច្រើន ក្នុងការរួមចំណែកជួយអភិវឌ្ឍន៍កីឡាប៉េតង់ ឲ្យមានភាពល្បីល្បាញទាំងលើឆាកជាតិ និងអន្តរជាតិ។ នេះបើតាមការលើកឡើងរបស់លោក ស សុខា ប្រធានសហព័ន្ធកីឡាប៊ូល និងប៉េតង់កម្ពុជា។
ពាក់ព័ន្ធនឹងការដាក់ឈ្មោះ«គរុគុណ»លោក ស សុខា បានបកស្រាយថា៖«គរុ មានន័យថា ភាពធំធេង យូរអង្វែង។ ពាក្យធំធេង គឺការលះបង់របស់លោកធំធេងណាស់សម្រាប់សហព័ន្ធ អ្វីក៏ដោយ ខ្ញុំគិតថា បើគ្មានការលះបង់ គ្មានឆន្ទៈទេ គឺមិនអាចទៅរួចនោះទេក្នុងការងាររួម។ ចំណែកពាក្យគុណ គឺសេចក្តីចម្រើន ធម៌ល្អ ក៏ដូចជាការទទួលខុសត្រូវ ហើយជាពិសេសធំបំផុត គឺពាក្យតមស្នងដែលមិនអាចកាត់ថ្លៃបាន»។
ប្រធានសហព័ន្ធរូបនេះ ចាត់ទុកពានរង្វាន់«គរុគុណ» ដែលជាការរួមបញ្ចូលគ្នារវាងពានរង្វាន់សម្តេចវិបុលបញ្ញា សុខ អាន និងសម្តេច ស ខេង ជាសមិទ្ធផល និងជាការបើកទំព័រថ្មីមួយទៀត ដើម្បីរួមចំណែកអភិវឌ្ឍន៍វិស័យកីឡាប៉េតង់នៅកម្ពុជា។ ការរួមបញ្ចូលពានពីរធ្វើតែមួយនេះ គឺសហព័ន្ធចង់ទុកពេលពីការរៀបចំពាននេះ សម្រាប់ធ្វើសកម្មភាពផ្សេងៗទៀត ដែលបម្រើឲ្យការអភិវឌ្ឍកីឡាប៉េតង់។
តែយ៉ាងណា លោក ស សុខា បានបញ្ជាក់ថា សហព័ន្ធកំពុងពិចារណាលើបញ្ហា ថាតើបន្តរៀបចំពានរង្វាន់ទាំងពីរទៀត ឬធ្វើតែពាន«គរុគុណ»នៅឆ្នាំក្រោយ ដ្បិតសហព័ន្ធមានគម្រោងចង់កាត់បន្ថយការប្រកួតនៅរាជធានីភ្នំពេញ។ ក្នុងន័យនេះ យើងអាចវាយតម្លៃបានថា សហព័ន្ធទំនងជាអាចរួមបញ្ចូលពានរង្វាន់សម្តេច សុខ អាន និងសម្តេច ស ខេង តែមួយក្រោយៗទៀត។
«ពានរង្វាន់នេះជាទំព័រថ្មីមួយទៀតសម្រាប់សហព័ន្ធ ដែលយើងមិនមានឱកាសបែបនេះពីមុនមក ខ្ញុំគិតថា នេះជាការវិវត្តមួយដ៏ល្អក្នុងការពិនិត្យពិចារណាក្នុងការរៀបចំពានរង្វាន់សម្តេចក្រឡាហោ ស ខេង និងសម្តេចវិបុលបញ្ញា សុខ អាន ចូលគ្នា ដើម្បីឲ្យយើងសល់ពេលសម្រាប់រៀបចំកម្មវិធីផ្សេងៗទៀត»។ នេះជាការបញ្ជាក់របស់លោក ស សុខា។
នាសន្និសីទសារព័ត៌មានស្តីពីការប្រកួតពានរង្វាន់«គរុគុណ»នៅថ្ងៃទី១ ខែវិច្ឆិកា ឆ្នាំ២០២០ លោក ស សុខា រដ្ឋលេខាធិការក្រសួងអប់រំ យុវជន និងកីឡា ក៏បានបង្ហាញពីគម្រោងផែនការក្នុងការអភិវឌ្ឍន៍វិស័យកីឡាប៉េតង់នៅបណ្តាខេត្តក្រុងផ្សេងៗផងដែរ។ ក្នុងនោះ លោក មានគម្រោងរៀបចំពានរង្វាន់ថ្នាក់ខេត្ត និងពានរង្វាន់ប្រចាំភូមិភាគ ដើម្បីចម្រាញ់រកជើងខ្លាំង ដើម្បីចូលរួមប្រកួតជើងឯកថ្នាក់ជាតិ និងពានរង្វាន់គរុគុណជាដើម។ តែយ៉ាងណា នេះគ្រាន់តែជាគម្រោងតែប៉ុណ្ណោះ។
ក្រៅពីតបស្នង និងរំលឹកគុណដល់ការខិតខំ និងលះបង់របស់សហស្ថាបនិកសម្តេច សុខ អាន និងសម្តេច ស ខេង ពានគរុគុណនេះ ក៏ធ្វើឡើងដើម្បីផ្តល់ឱកាសឲ្យកីឡាករកីឡាការិនី ជាពិសេសយុវជនមកពីតាមបណ្តាខេត្តបានបង្ហាញសមត្ថភាព និងប្រកួតប្រជែងគ្នា ដើម្បីដណ្តើមជើងឯកប្រចាំពានរង្វាន់នេះ។ នេះបើតាមការលើកឡើងរបស់លោក ស សុខា ដែលបានបន្ថែមថា ការប្រកួតនេះ ក៏ជាចលករមួយក្នុងការវាស់ស្ទង់សមត្ថភាពកីឡាករក្នុងដំណើរឆ្ពោះទៅប្រជែងដណ្តើមមេដាយក្នុងព្រឹត្តិការណ៍កីឡាស៊ីហ្គេមឆ្នាំ២០២១ នៅប្រទេសវៀតណាមផងដែរ។
បើតាមលោក សុខ សប្បាយណា អគ្គលេខាធិការសហព័ន្ធកីឡាប៊ូល និងប៉េតង់កម្ពុជា ការប្រកួតនេះ ពុំអនុញ្ញាតឲ្យយុវជនថ្នាលជម្រើសជាតិចូលរួមប្រកួតនោះទេ។ លោក អះអាងថា ការធ្វើបែបនេះ គឺដើម្បីវាស់ស្ទង់សមត្ថភាពយុវជនមកពីក្លិបសមាគមតាមបណ្តាខេត្ត ឬដូចជាលើកទឹកចិត្តពួកគេជាដើម។
លោក សុខ សប្បាយណា អគ្គលេខាធិការនៃសហព័ន្ធកីឡាប៊ូល និងប៉េតង់កម្ពុជា
ការប្រកួតពានរង្វាន់«គរុគុណ» ដែលប្រព្រឹត្តទៅចន្លោះពីថ្ងៃទី៦-៨ ខែវិច្ឆិកា ឆ្នាំ២០២០ មានកីឡាករកីឡាករចំនួន៤៧៨នាក់មកពី៥៥ក្លិបសមាគមចូលរួម ដោយប្រកួតប្រជែងលើ៨វិញ្ញាសា និងមាន៧២មេដាយ។ សម្រាប់ចំនួនវិញ្ញាសាប្រកួត លោក សុខ សប្បាយណា បានបញ្ជាក់ថា សហព័ន្ធបានបន្ថែមវិញ្ញាសាចំនួនពីរ គឺយុវជនអាយុក្រោម១៥ឆ្នាំ និងយុវតីអាយុក្រោម១៥ឆ្នាំ ខណៈពានរង្វាន់សម្តេច សុខ អាន និងសម្តេច ស ខេង ពុំមានវិញ្ញាសាទាំងពីរនេះនោះទេ។
លោក ស សុខា អះអាងថា ថវិកាទ្រទ្រង់ឲ្យការរៀបចំព្រឹត្តិការណ៍ប្រកួតពាន«គរុគុណ»មិនមែនជាថវិការបស់ក្រសួង ឬស្ថាប័នរដ្ឋណាមួយនោះទេ ពោលគឺជាថវិការបស់ក្រុមគ្រួសាររបស់សម្តេច សុខ អាន និងសម្តេច ស ខេង ដែលបានរួមគំនិតគ្នា បង្កើតឲ្យមានការប្រកួតនេះឡើង៕
Tag:
ប៉េតង់
ស សុខា
© រក្សាសិទ្ធិដោយ thmeythmey.com
