ជាតិ
ការលែងត្រីប្រភេទជិតផុតពូជ ដើម្បីអបអរទិវា នៃការផ្លាស់ទីមច្ឆជាតិពិភពលោក
ត្រីគល់រាំង ត្រូវបានចាប់ចេញពីស្រះបំប៉ន នៅមជ្ឈមណ្ឌលស្រាវជ្រាវ និងអភិវឌ្ឍន៍វារីវប្បកម្មទឹកសាបដើម្បីយកទៅលែងក្នុងទិវានៃការផ្លាស់ទីមច្ឆជាតិពិភពលោក។ រូបភាព៖ ឈុត ឈាណា
×![]()
ភ្នំពេញ៖ កាលពីថ្ងៃទី២៣ ខែតុលា ឆ្នាំ ២០២០ កន្លងទៅនេះ រដ្ឋបាលជលផលកម្ពុជា និងគម្រោងអច្ឆរិយភាពនៃទន្លេមេគង្គ បានប្រារព្ធទិវានៃការផ្លាស់ទីមច្ឆជាតិពិភពលោក ដោយបានលែងត្រី ពីស្រះបំប៉ននៅមជ្ឈមណ្ឌលស្រាវជ្រាវ និងអភិវឌ្ឍន៍វារីវប្បកម្មទឹកសាប។
មជ្ឈមណ្ឌលនេះ ជាកន្លែងដែលគម្រោងអច្ឆរិយភាពនៃទន្លេមេគង្គ បានកំពុងធ្វើការជាមួយរដ្ឋបាលជលផល ដោយប្រមូលកូនត្រីដែលកំពុងរងគ្រោះជិតផុតពូជ មកថែបំប៉ន និងសិក្សាស្រាវជ្រាវ។ ឯកឧត្តម អេង ជាសាន ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានរដ្ឋបាលជលផលនិង អ្នកស្រី ឡូរ៉ា ឈីស្មូ ប្រធានស្តីទី ការិយាល័យសន្តិសុខស្បៀងនិង បរិស្ថាន នៃទីភ្នាក់ងារជំនួយអាមេរិក ប្រចាំប្រទេសកម្ពុជា បានបើកកម្មវិធីនេះ។ ត្រីគល់រាំង និងត្រីប្រាធំ ដែលប្រភេទត្រីកំពុងរងគ្រោះជិតផុតពូជ ត្រូវបានបំពាក់ស្លាកសញ្ញាមុននឹងលែងចូលទៅក្នុងទន្លេមេគង្គ។
ត្រីគល់រាំង គឺជាមច្ឆានិម្មិត្តរូប នៃព្រះរាជាណាចក្រកម្ពុជា តាមព្រះរាជក្រឹត្យលេខ នសរកត/០៣០៥/១៤៩ ចុះថ្ងៃទី២១ ខែមីនា ឆ្នាំ២០០៥។ វាអាចលូតលាស់ រហូតដល់ប្រវែង២ម៉ែត្រ និងទម្ងន់ ២០០ គីឡូក្រាម។ ត្រីប្រាធំ ជាប្រភេទត្រីធ្វើចរាចរផ្លាស់ទី ដែលរងការគំរាមកំហែង និងជាអាហារដ៏សំខាន់ ដែលពឹងអាស្រ័យលើសុខមាលភាព តំណភ្ជាប់ពីទន្លេនានា ដើម្បីរស់រានមានជីវិត។
ការលែងត្រីគល់រាំង និងត្រីប្រាធំនេះ បានចូលរួមចំណែកបង្កើនការយល់ដឹងពីសារៈសំខាន់ នៃការអភិរក្សធនធានធម្មជាតិនៃប្រទេសកម្ពុជា និងការអភិវឌ្ឍដោយចីរភាពនៃទន្លេមេគង្គ។ សូមចូលទៅទស្សនាវីដេអូនៃសកម្មភាពលែងត្រីនេះដូចតទៅ៖
© រក្សាសិទ្ធិដោយ thmeythmey.com
