ជាតិ
១០ខែនេះ កុមារ និងស្ត្រីជាង៨០ម៉ឺននាក់ បានទៅពិនិត្យ និងព្យាបាលជំងឺ នៅមន្ទីរពេទ្យគន្ធបុប្ផា
× រយៈពេល ១០ខែ ឆ្នាំ២០២០ កុមារ និងស្ត្រី ជាង៨០ម៉ឺននាក់ បានទៅពិនិត្យ និងព្យាបាលជំងឺ នៅមន្ទីរពេទ្យគន្ធបុប្ផា រាជធានីភ្នំពេញ និងសៀមរាប។ នេះបើតាមតួលេខរបស់មន្ទីរពេទ្យគន្ធបុប្ផា។
របាយការណ៍តួលេខរបស់មន្ទីរពេទ្យគន្ធបុប្ផា បានលម្អិតថា កុមារឈឺចំនួន៥៣៧,៧៦៥នាក់ ត្រូវបាននាំមកពិនិត្យព្យាបាល នៅផ្នែកពិគ្រោះជំងឺក្រៅ។ រីឯ កុមារមានជំងឺធ្ងន់ ចំនួន១១៣,០១០នាក់ ត្រូវបានដាក់ឱ្យសម្រាកព្យាបាលនៅក្នុងមន្ទីរពេទ្យ ។
បើតាមលិខិតដដែល កុមារមានជំងឺគ្រុនឈីក ចំនួន១,៣៥០នាក់ ត្រូវបានដាក់ឱ្យសម្រាកព្យាបាលនៅក្នុងមន្ទីរពេទ្យ ដោយភាគច្រើនសម្រាលព្យាបាលនៅមន្ទីរពេទ្យជ័យវរ្ម័នទី៧ ខេត្តសៀមរាប ។ ចំណែកឯ កុមារចំនួន១៩,៤៧៩នាក់ បានទទួលការវះកាត់ និងកុមារ ចំនួន៨៥៦នាក់ បានទទួលការវះកាត់បេះដូង និងឆ្លុះភ្ជិតសរសៃបេះដូង។
ស្ត្រីមានផ្ទៃពោះចំនួន ១១២,០៥៥នាក់ បានមកពិនិត្យតាមដានផ្ទៃពោះ និងសម្រាលកូនបានចំនួន ១៩,៥៩៣នាក់ ។ សូមបញ្ជាក់ថា រាល់ការព្យាបាល នៅមន្ទីរពេទ្យគន្ធបុប្ផា រាជធានីភ្នំពេញ និងសៀមរាប មិនគិតថ្លៃនោះទេ៕
Tag:
មន្ទីរពេទ្យគន្ធបុប្ផា
កុមារ
ស្ត្រី
© រក្សាសិទ្ធិដោយ thmeythmey.com