កម្មករ និងនិយោជិកឥណ្ឌូណេស៊ីរាប់ពាន់នាក់ កាលពីថ្ងៃទី២ ខែវិច្ឆិកា បានចេញមកបាតុកម្មជាថ្មីប្រឆាំងនឹងច្បាប់ការងារ ដែលត្រូវបានអនុម័តកាលពីដើមខែតុលា។ ពួកគេសំអាងថា ច្បាប់ថ្មីនេះដែលសំដៅទាក់ទងអ្នកវិនិយោគបរទេស ធ្វើឲ្យបាត់បង់អត្ថប្រយោជន៍របស់កម្មករនិយោជិកមួយចំនួន និងប៉ះពាល់បរិស្ថាន។
តាមការអះអាងរបស់សហព័ន្ធសហភាពពាណិជ្ជកម្មឥណ្ឌូណេស៊ី (KSPI) កម្មករឥណ្ឌូណេស៊ី បានចូលរួមបាតុកម្មជាច្រើនពាន់នាក់នៅក្បែរវិមានប្រធានាធិបតី និងតុលាការធម្មនុញ្ញនៅក្នុងទីក្រុងហ្សាការតា។ កម្មករ និយោជិកទាំងនោះ តំណាងឲ្យសហភាពពលករចំនួន៣២ ដែលមកពីកោះជ្វាខាងលិច និងខាងកើតរបស់ឥណ្ឌូណេស៊ី។
«ការទាមទាររបស់កម្មករ គឺលុបចោលច្បាប់បង្កើតការងារថ្មី និងបន្តបង្កើនប្រាក់ខែអប្បបរមានៅក្នុងឆ្នាំ២០២១»។ លោក Said Iqbal ប្រធានសហព័ន្ធសហភាពពាណិជ្ជកម្មឥណ្ឌូណេស៊ី បានលើកឡើងបែបនេះ ដោយបន្ថែមថា លោកនឹងស្នើទៅតុលាការធម្មនុញ្ញឲ្យពិនិត្យបញ្ហាគតិយុត្តនៃច្បាប់ការងារនេះឡើយវិញ។
នៅក្នុងច្បាប់ឥណ្ឌូណេស៊ី តុលាការធម្មនុញ្ញ គឺជាអង្គការបកស្រាយច្បាប់ ការពារច្បាប់ អនុវត្តច្បាប់ និងបញ្ជាក់ពីអធម្មនុញ្ញភាពរបស់ច្បាប់។ ដូចនេះហើយ ទើបបាតុករទៅដល់ដល់មុខតុលាការនេះដែរ។
ក្រៅពីបាតុកម្មនៅទីក្រុងហ្សាការតា បាតុកម្មប្រឆាំងនឹងច្បាប់ការងារថ្មី ក៏កើតមាននៅទីក្រុងផ្សេងទៀតរបស់ឥណ្ឌូណេស៊ីផងដែរ ក្នុងនោះមានដូចជា ទីក្រុង Yogyakarta, ទីក្រុង Banda Aceh, ទីក្រុងMedan និង Makassar ។
ច្បាប់ការងារថ្មី ដែលកើតចេញពីការធ្វើវិសោធនកម្មច្បាប់ចំនួន៧៩ ត្រូវបានសភាឥណ្ឌូណេស៊ីអនុម័ត នៅថ្ងៃទី៥ ខែតុលាកន្លងទៅ ក្នុងគោលបំណងកែលម្អប្រសិទ្ធភាពការិយាល័យធិបតេយ្យរបស់ឥណ្ឌូណេស៊ី ជំរុញការទាក់ទាញអ្នកវិនិយោគបរទេស និងដោះស្រាយបញ្ហាផ្សេងទៀតជាដើម។ បើទោះបីជារដ្ឋាភិបាលឥណ្ឌូណេស៊ី អះអាងថាច្បាប់នេះល្អ និងផ្តល់ផលប្រយោជន៍ដល់កម្មករឥណ្ឌូណេស៊ីក្ដី មនុស្សមួយចំនួនជឿថា វានឹងបន្ថយអត្ថប្រយោជន៍របស់កម្មករ និយោជិក និងប៉ះពាល់ដល់បរិស្ថានជាដើម។
សូមបញ្ជាក់ បន្ទាប់ពីច្បាប់នេះត្រូវបានអនុម័ត ប្រជាជនឥណ្ឌូណេស៊ីជាច្រើនពាន់នាក់បានចេញមកបាតុកម្មរួចម្ដងហើយ ដើម្បីទាមទារឲ្យប្រធានាធិបតីលុបចោលច្បាប់មួយនេះ បើទោះបីជាមានបម្រាមជួបប្រជុំគ្នា ដោយសារ COVID-19 ។ ការប្រឈមមុខ ក៏ឈានទៅដល់ការបាញ់ឧស្ម័នបង្ហូរទឹកភ្នែកពីកម្លាំងប៉ូលិស ហើយផ្នែកខ្លះនៃបាតុកម្មឈានទៅដល់កុបកម្មថែមទៀត។
កន្លងមក ប្រធានាធិបតីឥណ្ឌូណេស៊ី លោក ចូកូ វីដូដូ ក៏បានចេញមុខការពារច្បាប់ថ្មីនេះដែរ ដោយសំអាងថា ច្បាប់ការងារថ្មីនឹងបង្កើតការងារសម្រាប់និស្សិតទើបបញ្ចប់ពីសកលវិទ្យាល័យ និងអ្នកគ្មានការងារធ្វើ។ បើតាមលោកប្រធានាធិបតី បាតុកម្មប្រឆាំងនឹងច្បាប់ថ្មីនេះ បានកើតឡើងដោយសារតែការផ្សព្វផ្សាយព័ត៌មានមិនពិត៕