កីឡាអន្តរជាតិ
អន្តរជាតិ
វីរបុរសអាហ្សង់ទីន Maradona ត្រូវបានបញ្ជូនទៅមន្ទីរពេទ្យ
× វីរបុរសអាហ្សង់ទីន Diego Maradona ត្រូវបានបញ្ជូនទៅព្យាបាលជំងឺនៅក្នុងមន្ទីរពេទ្យមួយ ក្នុងក្រុង La Plata នៃរដ្ឋBuenos Aires ប្រទេសអាហ្សង់ទីន ។ ប៉ុន្តែជំងឺរបស់អតីតខ្សែប្រយុទ្ធអាហ្សង់ទីនរូបនេះ មិនត្រូវបានលម្អិតឡើយ។
Maradona ដែលជួយឱ្យអាហ្សង់ទីនលើកពានរង្វាន់ពិភពលោក World Cup នាឆ្នាំ១៩៨៦នោះ ត្រូវបានគេបញ្ជូនទៅគ្លីនិកមួយកន្លែង ដោយសារមានបញ្ហាសុខភាព ប៉ុន្តែមិនពាក់ព័ន្ធនឹងជំងឺកូវីដ-១៩នោះទេ។ អតីតខ្សែប្រយុទ្ធអាហ្សង់ទីន ដែលត្រូវបានគេចាត់ទុកជាកីឡាករល្អអស្ចារ្យ គ្រប់ការប្រកួតនេះ កំពុងស្ថិតនៅក្នុងដំណាក់កាលធ្វើតេស្តសុខភាព។
លោកវេជ្ជបណ្ឌិត Leopoldo Luque ដែលជាគ្រូពេទ្យថែរក្សាសុខភាពប្រចាំរបស់វីរបុសអាហ្សង់ទីនរូបនេះ បាននិយាយថា Maradona មានសុខភាពមិនសូវល្អ មួយរយៈពេលនេះ ដែលនឹងត្រូវដាក់ឱ្យស្ថិតនៅក្រោមការតាមដានសុខភាព យ៉ាងហោចណាស់៣ថ្ងៃ។
តាមរយៈការចុះផ្សាយរបស់សារព័ត៌មាន Reuters ដែលបានស្រង់សម្តីលោកវេជ្ជបណ្ឌិត Leopoldo Luque យ៉ាងដូច្នេះ៖« Maradona គាត់មានអារម្មណ៍មិនសូវល្អ ដែលអាចប៉ះទង្គិចទៅដល់សុខាមាលភាពផ្នែកស្មារតី។ គាត់ត្រូវការជំនួយ ដូច្នេះយើងត្រូវតែជួយគាត់ពេលនេះ។
បច្ចុប្បន្ន Maradon គឺជាគ្រូបង្វឹករបស់ក្លិប Gimnasia y Esgrima នៃក្របខណ្ឌលីគប្រទេសអាហ្សង់ទីន។ អតីតខ្សែប្រយុទ្ធអាហ្សង់ទីន វ័យ៦០ឆ្នាំរូបនេះ តែងតែងជួបប្រទះបញ្ហាសុខភាព ហើយត្រូវបញ្ជូនទៅមន្ទីរពេទ្យជាញឹកញយ ជាច្រើនឆ្នាំមកនេះ ។ មូលហេតុដែលនាំឱ្យអតីតខ្សែប្រយុទ្ធ Napoli ,Barcelona និងBoca Juniors រូបនេះ ឧស្សាហ៍ជួបបញ្ហាសុខភាពនោះ ដោយសារការរស់នៅប្រើជីវិតបែបខ្ជះខ្ជាយ ។ នេះបើតាម Reuters។
កាលពីខែមករាឆ្នាំ ២០១៩ អតីតខ្សែប្រយុទ្ធក្រុម Napoli រូបនេះ ត្រូវបានបញ្ជូនទៅកាន់មន្ទីរពេទ្យ ដោយសារមានបញ្ហាឈាមហូរក្នុងពោះខុសប្រក្រតី។ កាលពីអំឡុង World Cup ២០១៨ នៅរុស្ស៊ី Maradona ក៏ធ្លាក់ខ្លួនឈឺដែរ នៅពេលអបអរជ័យជម្នះអាហ្សង់ទីន យកឈ្នះ Nigeria ២ទល់១។
មិនតែប៉ុណ្ណោះ Maradona ក៏ធ្លាប់ត្រូវបានបញ្ជូនទៅមន្ទីរពេទ្យក្នុងឆ្នាំ ២០០៤ ដោយសារមានបញ្ហាបេះដូងនិងផ្លូវដង្ហើមធ្ងន់ធ្ងរ ដែលទាក់ទងនឹងការប្រើប្រាស់សារធាតុកូកាអ៊ីន។ ក្រោយមក Maradona ក៏បានទទួលការស្តារនីតិសម្បទាគ្រឿងញៀន នៅប្រទេសគុយបា និងអាហ្សង់ទីន មុនពេលវះកាត់ក្រពះ នៅឆ្នាំ ២០០៥ ។ ឆ្នាំ២០០៧ វីរបុរសអាហ្សង់ទីនរូបនេះ ក៏ធ្លាប់បានទៅពិនិត្យសុខភាពដែរ ក្រោយពីជួបប្រទះបញ្ហាប្រើប្រាស់សារធាតុស្រវឹងច្រើនហួស៕
© រក្សាសិទ្ធិដោយ thmeythmey.com