កីឡាជាតិ
ជាតិ
លោក គៀត ច័ន្ទថារិទ្ធ ស្នើឲ្យគ្រឹះស្ថានសិក្សា រៀបចំឲ្យមានកន្លែងហ្វឹកហាត់កីឡាវាយកូនឃ្លីលើតុ
លោក គៀត ច័ន្ទថារិទ្ធ ប្រធានសហព័ន្ធកីឡាវាយកូនឃ្លីលើតុកម្ពុជា, រូបភាពពី Cambodia SEA Games 2023
×![]()
លោក គៀត ច័ន្ទថារិទ្ធ ប្រធានសហព័ន្ធកីឡាវាយកូនឃ្លីលើតុកម្ពុជា ចង់ឃើញសាសារៀន និងគ្រឹះស្ថានសិក្សានានា ក្លាយជាកន្លែងបណ្តុះបណ្តាលធនធានកីឡាករវាយកូនឃ្លីតុ។ លោក ចាត់ទុកសាលារៀនជាប្រភពផ្តល់ធនធានកីឡាករដ៏សំខាន់សម្រាប់សហព័ន្ធក្នុងដំណើរត្រៀមឆ្ពោះទៅធ្វើជាម្ចាស់ផ្ទះការប្រកួតកីឡាស៊ីហ្គេម នាឆ្នាំ២០២៣។
ប្រធានសហព័ន្ធកីឡាវាយកូនឃ្លីលើតុកម្ពុជាលោក គៀត ច័ន្ទថារិទ្ធ បានលើកឡើងពីគុណសម្បត្តិរបស់សាលារៀននិងគ្រឹះស្ថានសិក្សានានា ក្នុងការបណ្តុះបណ្តាលធនធានកីឡាករកីឡាការិនីប្រកបដោយគុណភាពខ្ពស់។ ទន្ទឹមនឹងនេះ លោក ស្នើឲ្យថ្នាក់ដឹកនាំសាកលវិទ្យាល័យ និងគ្រឹះស្ថានសិក្សាទាំងឯកជន និងរដ្ឋ ជួយសម្របសម្រួល និងរៀបចំឲ្យមានជាកន្លែងហ្វឹកហាត់លើប្រភេទកីឡាវាយកូនឃ្លីលើតុ។
ការស្នើនេះ ធ្វើឡើងក្រោយ លោក យល់ថា មានតែសាលាប៉ុណ្ណោះ ដែលជាប្រភពផ្តល់ធនធានកីឡាករដ៏សំខាន់សម្រាប់សហព័ន្ធខ្លួន ក្នុងដំណើរឆ្ពោះទៅ ត្រៀមធ្វើជាម្ចាស់ផ្ទះការប្រកួតកីឡាស៊ីហ្គេមឆ្នាំ២០២៣។ ម្យ៉ាងទៀត លោក សង្កេតឃើញថា នៅតាមសាលា និងគ្រឹះស្ថានសិក្សាភាគច្រើនពុំសូវមានកន្លែងហ្វឹកហាត់កីឡាវាយកូនឃ្លីលើតុនោះទេ។
«ខ្ញុំសូមពាវនាវដល់លោកនាយកវិទ្យាល័យ សាកលវិទ្យាល័យ និងគ្រឹះស្ថានសិក្សាទាំងអស់នៅកម្ពុជា សូមជួយយកចិត្តទុកដាក់ និងបង្កលក្ខណៈ បង្កលទ្ធភាព ឬរៀបចំកន្លែងតាមគ្រឹះស្ថានសិក្សារបស់ខ្លួន ដើម្បីឲ្យមានកីឡាវាយកូនឃ្លីលើតុ។ យើងខ្ញុំយក់ថា សាកលវិទ្យាល័យ វិទ្យាល័យ និងគ្រឹះស្ថានសិក្សា គឺជាថ្នាលដ៏សំខាន់បំផុត ដែលអាចបង្កលក្ខណៈឲ្យកីឡាវាយកូនឃ្លីលើតុមានការរីកចម្រើន»។ លោកនាយឧត្តមសេនីយ៍ គៀត ច័ន្ទថារិទ្ធ ស្នើបែបនេះក្នុងពិធីបិទការប្រកួតកីឡាវាយកូនឃ្លីលើតុជ្រើសរើសជើងឯកថ្នាក់ជាតិ និងពានរង្វាន់សហព័ន្ធលើកទី១ កាលពីពេលកន្លងទៅថ្មីៗ។
អគ្គនាយកដ្ឋានអន្តោប្រវេសន៍រូបនេះ អះអាងថា លោក នឹងជួយគាំទ្រ និងលើកទឺកចិត្តដល់គ្រឹះស្ថានសិក្សាណា ដែលរៀបចំឲ្យមានជាកន្លែងហ្វឹកហាត់កីឡាវាយកូនឃ្លីលើតុនៅគ្រឹះស្ថានសិក្សារបស់ខ្លួន។ ប៉ុន្តែ លោក មិនបានបញ្ជាក់លម្អិតពាក់ព័ន្ធការជួយគាំទ្រលើផ្នែកអ្វីខ្លះនោះទេ។
នាយឧត្តមសេនីយ៍រូបនេះ ក៏បានលើកពីសារសំខាន់ និងគុណសម្បត្តិរបស់កីឡាវាយកូនឃ្លីលើតុ។ លោកអះអាងថា កីឡាវាយកូនឃ្លីតុមិនត្រឹមតែជួយឲ្យមនុស្សមានភាពរហ័សរហួនប៉ុណ្ណោះទេ ថែមទាំងជួយពង្រឹងផ្នែកស្មារតី និងការចងចាំបានល្អទៀតផង។ ជាពិសេស ធ្វើឲ្យកីឡាករចេះអត់ធ្មត់ និងធ្វើឲ្យមានអារម្មណ៍ស្ងប់។
ជាមួយគ្នានេះ លោក ក៏បានបង្ហាញពីគម្រោងក្នុងការអភិវឌ្ឍសមត្ថភាពកីឡាករកីឡាការិនី ដើម្បីត្រៀមប្រជែងដណ្តើមមេដាយក្នុងការប្រកួតកីឡាស៊ីហ្គេមឆ្នាំ២០២១ នៅវៀតណាម និងស៊ីហ្គេមឆ្នាំ២០២៣ នៅកម្ពុជាផងដែរ។ ក្នុងនោះសហព័ន្ធកីឡាវាយកូនឃ្លីតុកម្ពុជា នឹងបញ្ជូនកីឡាករកីឡាការិនីចំនួន៨រូប ឲ្យទៅហ្វឹកហាត់ពង្រឹងសមត្ថភាពនៅប្រទេសចិនរយៈពេលវែង។ គម្រោងនេះ គ្រោងធ្វើឡើងនៅចុងឆ្នាំ២០២០ ឬដើមឆ្នាំ២០២១ ប្រសិនបើស្ថានភាពឆ្លងនៃជំងឺកូវីដ-១៩ មានភាពធូរស្បើយ៕
Tag:
វាយកូនឃ្លីលើតុ
គៀត ច័ន្ទថារិទ្ធ
© រក្សាសិទ្ធិដោយ thmeythmey.com
