ជាតិ
សេវាដឹកជញ្ជូនផ្លូវអាកាសចរ ធនធានទឹក និងកសិកម្មរវាងកម្ពុជា និងហុងគ្រី ត្រូវបានចុះហត្ថលេខា
× ភ្នំពេញ៖ កិច្ចព្រមព្រៀងចំនួន៣ រវាងកម្ពុជា និងហុងគ្រី ត្រូវបានចុះហត្ថលេខាជាផ្លូវការ នៅថ្ងៃទី៣ វិច្ឆិកានេះ ក្រោយជំនួបរវាងសម្ដេចនាយករដ្ឋមន្ត្រី ហ៊ុន សែន និងលោក ភីធ័រ ហ្សីយាតូ រដ្ឋមន្ត្រីការបរទេស និងពាណិជ្ជកម្មហុងគ្រី ដែលបានបំពេញទស្សនកិច្ចនៅកម្ពុជា នាថ្ងៃទី៣ វិច្ឆិកានេះ។
កិច្ចព្រមព្រៀងចំនួន៣ រួមមាន៖១ កិច្ចព្រមព្រៀងស្តីពីសេវាដឹកជញ្ជូនតាមផ្លូវអាកាសចរ រវាងរាជរដ្ឋាភិបាលកម្ពុជា និងរដ្ឋាភិបាលហុងគ្រី ,២ អនុស្សរណៈនៃការយោគយល់គ្នាស្តីពីការគ្រប់គ្រងធនធានទឹក រវាងក្រសួងធនធានទឹក និងឧតុនិយមកម្ពុជា និងក្រសួងមហាផ្ទៃហុងគ្រី និងចុងក្រោយ អនុស្សរណៈនៃការយោគយល់គ្នាស្តីពីកិច្ចសហប្រតិបត្តិការលើវិស័យកសិកម្ម រវាងក្រសួងកសិកម្ម រុក្ខាប្រមាញ់ និងនេសាទកម្ពុជា និងក្រសួងកសិកម្មហុងគ្រី។
ក្រៅពីចុះហត្ថលេខាលើកិច្ចព្រមព្រៀងទាំងនេះ ហុងគ្រី ក៏បើកការិយាល័យស្ថានទូតហុងគ្រីជាផ្លូវការនៅកម្ពុជាផង នៅថ្ងៃទី៣ វិច្ឆិកា ឆ្នាំ២០២០។ នេះបើតាមលិខិតរបស់ក្រសួងការបរទេស ដែលបញ្ជាក់ពីដំណើរទស្សកិច្ចរបស់រដ្ឋមន្ត្រីការបរទេស និងពាណិជ្ជកម្មនៃប្រទេសហុងគ្រី លោក ភីធើ ស៊ីចាតូ(Péter Szijjártó)។
កន្លងមកសម្តេចនាយករដ្ឋមន្ត្រី ហ៊ុន សែន ក៏ធ្លាប់ធ្វើដំណើរទស្សនកិច្ច២ដងមកហើយ នៅហុងគ្រី មុននឹងលោក Janos Ader ប្រធានាធិបតីហុងគ្រី មកកាន់រាជធានីភ្នំពេញកាលពីឆ្នាំ២០១៩ ។
កម្ពុជា និងហុងគ្រី បានចាប់ផ្ដើមទំនាក់ទំនងការទូតលើកដំបូង តាំងពីឆ្នាំ១៩៥៦មកម្ល៉េះ។ ប៉ុន្តែ២០ឆ្នាំក្រោយទំនាក់ទំនងប្រទេសទាំងពីរ ក៏បានកាត់ផ្ដាច់មួយរយៈ ដោយសារកម្ពុជាស្ថិតនៅក្នុងការគ្រប់គ្រងដោយរបបខ្មែរក្រហម នាឆ្នាំ១៩៧៥។ កម្ពុជា និងហុងគ្រី ក៏បានចាប់ផ្ដើមទំនាក់ទំនងការទូតឡើងវិញនៅឆ្នាំ១៩៧៩ ក្រោយពីដួលរំលំរបប ប៉ុល ពត ៕
© រក្សាសិទ្ធិដោយ thmeythmey.com