អន្តរជាតិ
ប្រធានាធិបតីឥណ្ឌូណេស៊ី ចុះហត្ថលេខាលើច្បាប់បង្កើតការងារដ៏ចម្រូងចម្រាស ប្រធានាធិបតីឥណ្ឌូណេស៊ី លោក ចូកូ វីដូដូ។ រូបភាព៖ Jakarta Globe
× ប្រធានាធិបតីឥណ្ឌូណេស៊ី លោកចូកូ វីដូដូ កាលពីថ្ងៃទី៣ ខែវិច្ឆិកា បានចុះហត្ថលេខាលើច្បាប់បង្កើតការងារថ្មីដ៏ចម្រូងចម្រាស បើទោះបីជាកម្មករ និយោជិក បានធ្វើបាតុកម្មទាមទារឲ្យលុបចោលច្បាប់នេះក៏ដោយ។
ច្បាប់បង្កើតការងារត្រូវបានសភាឥណ្ឌូណេស៊ី អនុម័តតាំងពីថ្ងៃទី៥ ខែតុលា មកម្លេះ ដែលបង្កឲ្យមានបាតុកម្មទ្រង់ទ្រាយធំនៅក្នុងទីក្រុងហ្សាការតា និងទីក្រុងផ្សេងៗទៀត។ ថ្មីៗនេះ កម្មករ និយោជិក ក៏បានបាតុកម្មជាថ្មីនៅទីក្រុងហ្សាការតាផងដែរ ដោយសំអាងវានឹងបន្ថយអត្ថប្រយោជន៍កម្មករ និយោជិក និងប៉ះពាល់បរិស្ថាន។
បើទោះបីជាមានបាតុកម្មប្រឆាំងនឹងច្បាប់នេះក៏ដោយ ក៏ប្រធានាធិបតីឥណ្ឌូណេស៊ី នៅតែបន្តគាំទ្រច្បាប់ការងារដដែល។ តាមការអះអាងរបស់អ្នកនាំពាក្យប្រធានាធិបតី លោក Fadjroel Rachman ប្រធានាធិបតីឥណ្ឌូណេស៊ី ចូកូ វីដូដូ បានចុះហត្ថលេខាលើច្បាប់ការងារឆ្នាំ២០២០រួចហើយ។ ទន្ទឹមគ្នានេះ លោក Rachman បានបន្តថា ច្បាប់ការងារនេះ គឺសម្រាប់ប្រជាជនឥណ្ឌូណេស៊ី និងអនាគតរបស់ឥណ្ឌូណេស៊ី។
តាមការចុះផ្សាយរបស់កាសែត Jakarta Globe ច្បាប់ការងារនេះ ត្រូវបានប្រកាសឲ្យប្រើប្រាស់ដោយរដ្ឋមន្ត្រីច្បាប់ និងសិទ្ធិមនុស្ស លោក Yasonna Laoly និងមានចុះក្នុងរដ្ឋកិច្ចឆ្នាំ២០២០ លេខ២៤៥រួចហើយ។ បើទោះបីជាប្រធានាធិបតី មិនចុះហត្ថលេខាក៏ដោយ ច្បាប់នេះនឹងចូលជាធរមាន បន្ទាប់ពីសភាបានអនុម័តរយៈ ៣០ថ្ងៃ។ ការចុះហត្ថលេខារបស់លោកចូកូវីនេះ ធ្វើឡើងតែប៉ុណ្ណោះថ្ងៃប៉ុណ្ណោះ មុនច្បាប់បង្កើតការងារថ្មីនេះចូលជាធរមាន។
ខណៈច្បាប់នេះ ជិតចូលជាធរមាន វានៅមានបញ្ហាចម្រូងចម្រាស និងការភាន់ច្រឡំច្រើនរាប់ទាំងចំនួនទំព័ររបស់ច្បាប់បង្កើតការងារថ្មីនេះជាដើម។ ច្បាប់នេះ បើទាយយកពីវេបសាយរបស់សភា គឺមានចំនួន ១២០៨ទំព័រ ខណៈពេលច្បាប់នេះ នៅពេលគេជជែកដេញដោលក្នុងសភា គឺមានចំនួន ៩០៥ទំព័រជាដើម។
ទាក់ទិននឹងបញ្ហានេះ អ្នកជំនាញច្បាប់របស់ប្រធានាធិបតី បាននិយាយការពារថា បើទោះបីជាមានការខុសទំព័រក៏ដោយ ប៉ុន្តែច្បាប់នេះ គឺមិនមែនការកែប្រែអ្វីទេ។ សូមបញ្ជាក់ថា ច្បាប់បង្កើតការងារថ្មីនេះ គឺកើតចេញពីការធ្វើវិសោធនកម្មច្បាប់ចំនួន៧៩ ៕
© រក្សាសិទ្ធិដោយ thmeythmey.com