អ្នកគាំទ្រក្រុមហុងគ្រី Ferencvaros TC បានបង្ហាញក្តីរីករាយនៅពេលអាចត្រឡប់ចូលទីលានបាល់ទាត់វិញដោយមិនខ្វល់ពី COVID-19 ក្នុងការប្រកួត Champions League នាជំនួបដែល Ferencvaros ទទួលភ្ញៀវ Juventus នៅរាត្រីថ្ងៃទី៤ ខែវិច្ឆិកានេះ។
ជាលើកដំបូងក្នុងរយៈពេល១៦ឆ្នាំសម្រាប់ក្រុម Ferencvaros ដែលអាចបង្ហាញខ្លួនក្នុងវគ្គចែកពូលក្របខណ្ឌអឺរ៉ុប នៅរដូវកាលនេះ ស្របពេលពិភពលោកកំពុងជួបវិបត្តិជំងឺរាតត្បាតដ៏កាចសហាវ។ ក្នុងជំនួប២លើកដំបូងពូល G ក្រុមនៃលីគកំពូលហុងគ្រីនេះ បានប្រកួតចាញ់ក្នុងដី Barcelona ៥-១ និងស្មើភ្ញៀវ Dynamo Kyiv ២-២។
សម្រាប់ជំនួបទី៣នេះ Ferencvaros ត្រូវទទួលក្រុមសេះបង្កង់ Juventus នៅរាត្រីម៉ោង ៣:០០នាទីនេះ ដែលរំពឹងថាកំពូលកីឡាករលំដាប់ពិភពលោក Cristiano Ronaldo នឹងចូលលេងផងដែរ។ ជំនួបនេះដែរ ក៏នឹងត្រូវបានអនុញ្ញាតឲ្យអ្នកគាំទ្រចូលរួមទស្សនាផ្ទាល់នៅកីឡដ្ឋាន Puskas Arena បើទោះនៅមានការឆ្លង COVID-19 ក្នុងប្រទេសនេះក្តី។
«នេះជាឆ្នាំដែលក្រុម Ferencvaros បង្ហាញមុខនៅ Champions League និងជារដូវកាលសម្រាប់អ្នកគាំទ្ររបស់ហុងគ្រីដែរ»។ លោក Szebasztian Huber និពន្ធនាយកគេហទំព័រក្រុមអ្នកគាំទ្រដ៏ធំបំផុតនៅហុងគ្រីបានប្រាប់ទីភ្នាក់ងារព័ត៌មាន Reuters ដូច្នេះ។
ចំនួនអ្នកឆ្លង COVID-19 ថ្មីក្នុងប្រទេសហុងគ្រី និងចំនួនអ្នកស្លាប់បានកើនឡើងដល់កម្រិតខ្ពស់មួយ ខណៈដែលនាយករដ្ឋមន្ត្រីលោក Viktor Orban មិនអនុញ្ញាតឲ្យបិទប្រទេសនៅឡើយ។
នេះក៏មានន័យថាអ្នកគាំទ្ររបស់ហុងគ្រី ត្រូវអនុញ្ញាតឲ្យចូលរួមការប្រកួតបាល់ទាត់ដោយមិនមានការរឹតត្បិតដដែល ជាពិសេសក្នុងជំនួបរបស់ក្រុមដែលមានប្រជាប្រិយបំផុតរបស់ហុងគ្រីមួយនេះ។
ជំនួបការប្រកួតគូដទៃនៅរាត្រីថ្ងៃទី៤ ខែវិច្ឆកា៖
ពូល E
Chelsea Vs Rennes (ម៉ោង ៣:០០នាទី)
Sevilla Vs FC Krasnodar (ម៉ោង ៣:០០នាទី)
ពូល F
Zenit St. Petersburg Vs Lazio (១២:៥៥នាទី)
Club Brugge Vs Borussia Dortmund (ម៉ោង ៣:០០នាទី)
ពូល G
Barcelona Vs Dynamo Kyiv (ម៉ោង ៣:០០នាទី)
Ferencvaros Vs Juventus (ម៉ោង ៣:០០នាទី)
ពូល H
Istanbul Basaksehir Vs Manchester United (១២:៥៥នាទី)
RasenBallsport Leipzig Vs Paris Saint-Germain (ម៉ោង ៣:០០នាទី)