ជាតិ
សង្គមជាតិ
លោក ហ៊ុន ម៉ានី ៖ សំរាម ជាបញ្ហាបរិស្ថាន ដែលពលរដ្ឋត្រូវរួមគ្នាដោះស្រាយ
លោក ហ៊ុន ម៉ានី សហស្ថាបនិកគម្រោងភ្នំពេញស្អាត ថ្លែងនៅក្នុងពិធីបើកដំណើរការយុទ្ធនាការភ្នំពេញស្អាតឆ្នាំ២០២០ នាថ្ងៃទី៤ ខែវិច្ឆិកា
×![]()
ភ្នំពេញ៖ «ភ្នំពេញស្អាត » ជាយុទ្ធនាការអប់រំបរិស្ថានស្អាត បញ្ហាកាកសំណល់ និងសោភ័ណភាពទីក្រុង។ យុទ្ធនាការនេះ ប្រព្រឹត្រទៅពេញមួយខែវិច្ឆិកា តាមរយៈយន្តនាការនៃការផ្សព្វផ្សាយ និងបញ្ជ្រាបការអប់រំ ស្ដីពីការទុកសំរាមឱ្យបានត្រឹមត្រូវ។ 
«ស្អាតគឺជាទម្លាប់ថ្មី» ជាពាក្យស្លោកនៃយុទ្ធនាការភ្នំពេញស្អាតនៅក្នុងបរិបទនៃជំងឺកូវីដ-១៩។ នៅក្នុងយុទ្ធនាការ«ភ្នំពេញស្អាត»ដែលរៀបចំនៅអគារមជ្ឈមណ្ឌលជាតិហ្វឹកហ្វឺនកីឡាថ្មី(NOCC)នៅថ្ងៃទី ៤ ខែវិច្ឆិកា លោក ហ៊ុន ម៉ានី ប្រធានគណៈកម្មការទី៧នៃរដ្ឋសភា និងជាសហស្ថាបនិកគម្រោងភ្នំពេញស្អាត បានលើកឡើងថា យុទ្ធនាការនេះ ធ្វើឡើងក្នុងគោលបំណងលើកកម្ពស់ការអប់រំ និងបញ្ជ្រាបការយល់ដឹងពីបញ្ហាប្រឈម រួមទាំងការទុកដាក់សំរាមឱ្យបានត្រឹមត្រូវ។
សហស្ថាបនិករូបនេះ បានបន្ថែមថា ឆ្នាំនេះកម្ពុជា និងពិភពលោក បានជួបបញ្ហានៃជំងឺកូវីដ-១៩ ដែលធ្វើឱ្យពលរដ្ឋមានទម្លាប់រស់នៅថ្មី ដូចជាពាក់ម៉ាស់ រក្សាគម្លាតសុវត្ថិភាព និងលាងដៃញឹកញាប់ជាដើម ដូចនេះពាក្យស្លោក«ស្អាតជាទម្លាប់ថ្មី» គឺចង់ជំរុញឱ្យពលរដ្ឋ គិតគូរទាំងបញ្ហាសំរាម និងសុខភាព។
«បើសិនជា យើងរស់នៅដោយរក្សាអនាម័យខ្ពស់ គឺយើងនឹងអាចបង្ការជំងឺកូវីដ-១៩ បច្ចុប្បន្ន និងអនាគតបន្ថែមទៀត។ អ៊ីចឹងផ្អែកទៅលើបញ្ហាហ្នឹង រឿងសំរាម រឿងប្រមូលសំរាម ការបែងចែកសំរាម មិនមែនជារឿងបរិស្ថានទេ តែវាជារឿងសុខភាពសាធារណៈ»។ នេះជាការបញ្ជាក់ របស់ លោក ហ៊ុន ម៉ានី ។
នេះជាឆ្នាំទី៤ហើយ ដែលបានបង្កើតឱ្យមានយុទ្ធនាការ«ភ្នំពេញស្អាត»។ យុទ្ធនាការឆ្នាំនេះ នឹងប្រមូលផ្ដុំទៅដោយក្រុមយុវជន សិស្ស និស្សិត ស្ថាប័នពាក់ព័ន្ធ សិល្បករ ដើម្បីដោះស្រាយបញ្ហាសំរាម និងជាគំរូភាពដល់ពលរដ្ឋឱ្យចេះគិតគូរ រឿងបញ្ហាសំរាម។
លោក ហួត ហៃ អភិបាលរងរាជធានីភ្នំពេញ បានលើកឡើងថា ការធ្វើឱ្យរាជធានីភ្នំពេញ មានសោភ័ណភាពស្រស់ស្អាត មានអនាម័យ បរិស្ថានល្អ និងគ្មានសំណល់ប្លាស្ទិក រាយប៉ាយ គឺមិនពឹងផ្អែកតែលើអាជ្ញាធរតែប៉ុណ្ណោះទេ គឺទាមទារការចូលរួមពីប្រជាពលរដ្ឋនិងភាគីពាក់ព័ន្ធទាំងអស់។ ដូចនេះដើម្បីឱ្យយុទ្ធនាការ« ភ្នំពេញស្អាត» ដំណើរការបានដោយរលូន និងទទួលបានជោគជ័យ លោក ហួត ហៃ បានស្នើឱ្យអាជ្ញាធរមូលដ្ឋាន ជាពិសេសពលរដ្ឋទាំងអស់ គឺត្រូវចូលរួមយ៉ាងសកម្ម ដើម្បីធានានិរន្តភាពទីក្រុងភ្នំពេញស្អាត។
គួរបញ្ជាក់ថា នៅកម្ពុជាមានសំរាមជាងជាង១ម៉ឺនតោន ដែលក្នុងនោះរាជធានីភ្នំពេញមានជាង៣ពាន់តោន ក្នុងមួយថ្ងៃ៕
Tag:
យុទ្ធនាការភ្នំពេញស្អាត
ហ៊ុន មានី
© រក្សាសិទ្ធិដោយ thmeythmey.com
