អាមេរិក នៅថ្ងៃទី៤ ខែវិច្ឆិកា បានដើរចេញពីកិច្ចព្រមព្រៀងបម្រែបម្រួលទីក្រុងប៉ារីសជាផ្លូវការហើយ។ យ៉ាងណាក៏ដោយ លោក ចូ បៃឌិន បេក្ខជនប្រធានាធិបតីរបស់បក្សប្រជាធិបតេយ្យ ដែលកំពុងមានសំឡេងឆ្នោតនាំមុខក្នុងការបោះឆ្នោត បានសន្យាថា នឹងដាក់អាមេរិកចូលវិញ បើសិនបើខ្លួនជាប់ជាប្រធានាធិបតី។
អាមេរិក កាលពីមួយឆ្នាំមុន បានជូនដំណឹងចាកចេញពីកិច្ចព្រមព្រៀងស្ដីពីបម្រែបម្រួលអាកាសធាតុ ទៅអង្គការសហប្រជាជាតិជាផ្លូវការ ដោយការជូនដំណឹងនោះ ត្រូវមានប្រសិទ្ធភាពនៅមួយឆ្នាំបន្ទាប់។ មួយឆ្នាំក្រោយ និងបន្ទាប់ពីការបោះឆ្នោតអាមេរិក បានមួយថ្ងៃ អាមេរិក បានចាកចេញពីកិច្ចព្រមព្រៀងអាកាសធាតុជាផ្លូវការ។
យ៉ាងណាក៏ដោយ លោក ចូ បៃឌិន បេក្ខជនប្រធានាធិបតីអាមេរិករបស់បក្សប្រជាធិបតេយ្យ ដែលកំពុងមានសំឡេងឆ្នោតនាំមុខ ប្រធានាធិបតី លោក ដូណាល់ ត្រាំ ក្នុងអំឡុងពេលរាប់សន្លឹកឆ្នោត បានអះអាងថា លោកនឹងដាក់អាមេរិក ចូលវិញ ប្រសិនបើលោក ជាប់ឆ្នោតជាប្រធានាធិបតី។
«ក្នុងរយៈពេល ៧៧ថ្ងៃខាងមុខ, រដ្ឋបាល បៃឌិន នឹងចូលរួមជាថ្មី»។ លោកបៃឌិន បានសរសេរលើបណ្តាញសង្គម Twitter បែបនេះ ដោយបញ្ជាក់ពីលទ្ធភាពថា វាអាចកើតឡើង ប្រសិនបើលោកក្លាយជាប្រធានាធិបតីអាមេរិកប៉ុណ្ណោះ។
តាមការចុះផ្សាយរបស់ទីភ្នាក់ងារព័ត៌មាន AFP អតីតអនុប្រធានាធិបតីអាមេរិករូបនេះ ក៏បានដាក់គម្រោង ដែលមានតម្លៃប្រមាណ ១,៧ពាន់ទ្រីលាន ដើម្បីធ្វើឲ្យអាមេរិកមានតុល្យភាពក្នុងការបញ្ចេញឧស្ម័នកាបូន ឬបញ្ចេញឧស្ម័នកាបូនឲ្យបានកម្រិតទាបបំផុតត្រឹមឆ្នាំ២០៥០។
ក្នុងនាមជាប្រធានាធិបតីអាមេរិក លោ កត្រាំ មិនសូវខ្វាយខ្វល់ពីការបម្រែបម្រួលអាកាសធាតុឡើយ ហើយថែមទាំងបង្កើនឧស្សាហកម្មដែលប្រើប្រាស់ប្រេងឥន្ធនៈ និងមិនសូវគិតគូរពីការការពារបរិស្ថានផ្សេងទៀតជាដើម។
បើទោះបីជាលោក ត្រាំ មិនបានគិតគូរពិតមែន ប៉ុន្តែរបាយការណ៍របស់ក្រុម America's Pledge បង្ហាញថា ទីក្រុង រដ្ឋ និងមុខជំនួញមួយចំនួន បានយកចិត្តទុកដាក់ពីបញ្ហាបម្រែបម្រួលអាកាសធាតុនេះ។ តាមការព្យាករណ៍របស់ America's Pledge អាមេរិក អាចនឹងកាត់បន្ថយការបញ្ចេញឧស្ម័នផ្ទះកញ្ចក់ ប្រមាណ៣៧ភាគរយ នៅត្រឹមឆ្នាំ២០៣៧ ។
សូមបញ្ជាក់ថា លោក ត្រាំ បានប្រកាសពីចេតនាចង់ចាកចេញពី កិច្ចព្រមព្រៀងអាកាសធាតុក្រុងប៉ារីស តាំងពីឆ្នាំ២០១៧ មកម្លេះ ដោយសំអាងថា វាធ្វើឲ្យប៉ះពាល់ដល់សេដ្ឋកិច្ចរបស់អាមេរិក។ ក្នុងការចាកចេញនេះ អាមេរិក គឺជាប្រទេសដំបូងបំផុត ក្នុងចំណោមសមាជិកផ្សេងទៀតរបស់កិច្ចព្រមព្រៀងអន្តរជាតិមួយនេះ៕