ជាតិ
ស្ថាប័ន៣ មានសិទ្ធិចាត់ចែងស្បៀង និងគ្រាប់ពូជកសិកម្ម ដល់ពលរដ្ឋរងគ្រោះ
× រាជរដ្ឋាភិបាលបានចេញអនុក្រឹត្យស្ដីពីការបង្កើតស្បៀងបម្រុងកម្ពុជា ដើម្បីងាយស្រួលក្នុងការបែងចែក ភារកិច្ចរៀងៗខ្លួន របស់ស្ថាប័នចំនួន៣។ នេះបើតាមអនុក្រឹត្យរាជរដ្ឋាភិបាលកម្ពុជា។
ស្ថាប័នទាំង៣ នោះរួមមាន ក្រសួងសេដ្ឋកិច្ច និងហិរញ្ញវត្ថុ ក្រសួងកសិកម្មរុក្ខាប្រមាញ់ និងនេសាទ និងគណៈកម្មាធិការជាតិគ្រប់គ្រងគ្រោះមហន្តរាយ។ តាមអនុក្រឹត្យរដ្ឋាភិបាល ក្នុងករណីមានតម្រូវការសង្គ្រោះបន្ទាន់ ដោយសារគ្រោះមហន្តរាយ ឬគ្រោះអាសន្ននានា ក្រសួងសេដ្ឋកិច្ច និងហិរញ្ញវត្ថុ មានសិទ្ធសម្រេចចាត់ចែងសន្និធិស្បៀង និងគ្រាប់ពូជបម្រុងជារូបវន្ត ឬសាច់ប្រាក់ ដើម្បីចែកចាយជូនពលរដ្ឋរងគ្រោះតាមតម្រូវការចាំបាច់បន្ទាន់។ លក្ខខណ្ឌតម្រូវការស្បៀងជាអង្ករលើសពី ១,០០០តោន ,តម្រូវការគ្រាប់ពូជស្រូវលើសពី ១០០តោន,តម្រូវការគ្រាប់ពូជបន្លែនិងដំណាំលើសពី ១០តោន។
ដោយឡែកសម្រាប់គណៈកម្មាធិការជាតិគ្រប់គ្រងគ្រោះមហន្តរាយ ក្នុងករណីមានតម្រូវការសង្គ្រោះបន្ទាន់ដោយសារគ្រោះមហន្តរាយ ឬគ្រោះអាសន្ននានា ស្ថាប័ននេះមានសិទ្ធិចាត់ចែងសន្និធិស្បៀងនិងគ្រាប់ពូជបម្រុង ដើម្បីចែកជូនដល់ពលរដ្ឋដែលរងគ្រោះ។ ក្នុងនោះត្រូវមានតម្រូវការស្បៀងជាអង្ករតិចឬស្មើ ១ ០០០តោន, តម្រូវការគ្រាប់ពូជស្រូវចន្លោះពី ៣០តោនទៅ ១០០តោន,តម្រូវការពូជបន្លែនិងដំណាំចន្លោះពី ១តោនទៅ ១០តោន។ កម្មាធិការជាតិគ្រប់គ្រងគ្រោះមហន្តរាយ អាចអនុវត្តសិទ្ធិសម្រេចចាត់ចែងសន្និធិស្បៀងនិងគ្រាប់ពូជបម្រុងនេះ បន្ទាប់ពីបានជូនដំណឹងជាមុនដល់នាយករដ្ឋមន្ត្រី ។
ដោយឡែក ក្នុងករណីមានតម្រូវការសង្គ្រោះបន្ទាន់ដោយសារគ្រោះមហន្តរាយ ឬគ្រោះអាសន្ននានាក្រសួងកសិកម្មរុក្ខាប្រមាញ់ និងនេសាទ មានសិទ្ធិចាត់ចែងសន្និធិស្បៀងនិងគ្រាប់ពូជបម្រុង ដើម្បីចែកជូនដល់ពលរដ្ឋដែលរងគ្រោះ។ ក្នុងនោះតម្រូវការគ្រាប់ពូជស្រូវតិចជាង ៣០តោន, តម្រូវការគ្រាប់ពូជបន្លែនិងដំណាំតិចជាង ១តោន។ ក្រសួងកសិកម្ម អាចអនុវត្តសិទ្ធិសម្រេចចាត់ចែងសន្និធិស្បៀងនិងគ្រាប់ពូជបម្រុងនេះ បន្ទាប់ពីបានជូនដំណឹងជាមុនដល់នាយករដ្ឋមន្ត្រី គណៈកម្មាធិការជាតិគ្រប់គ្រងគ្រោះមហន្តរាយ និងគណកម្មាធិការ ប.ស.ប.ក។
បើតាមលោក វេង សាខុន រដ្ឋមន្ត្រីក្រសួងកសិកម្ម គោលបំណងការបង្កើតច្បាប់នេះគឺដើម្បីបញ្ចៀសបាននូវការភ័ន្តច្រឡំដោយប្រកាណាមួយនៃការលើកសំណើស្នើសុំ និងបែងចែកពូជស្រូវ និងពូជដំណាំដ៏ទៃទៀត សម្រាប់ស្តារឡើងវិញចំពោះដំណាំដែលខូចខាតដោយទឹកជំនន់។ ម្យ៉ាងវិញទៀតក៏ដើម្បីបង្កើនល្បឿននៃការស្តារឡើងវិញនូដំណាំស្រូវ និងដំណាំរួមផ្សំដទៃឲ្យបានទាន់ពេលវេលាផងដែរ។
ដោយសារតែមានទំនាក់ទំនងផ្ទាល់ជាមួយរដ្ឋមន្ត្រីក្រសួងការបរទេស និងពាណិជ្ជកម្មហុងគ្រីដែលមានកូវីដ-១៩ សម្តេចនាយករដ្ឋមន្ត្រី ហ៊ុន សែន បានប្រកាសដាក់ខ្លួនឲ្យនៅដាច់ដោយឡែក ហើយគម្រោងចុះចែកស្រូវពូជ តាមបណ្តាខេត្តក៏ត្រូវបានលុបចោលផងដែរ ដោយសម្តេចឲ្យអ្នកតំណាងទៅជំនួស៕
Tag:
កសិកម្ម
ច្បាប់
ជំនន់
ស្រូវ
© រក្សាសិទ្ធិដោយ thmeythmey.com