សង្គមអន្តរជាតិ
អន្តរជាតិ
អ្នករត់តុចិនម្នាក់ មើលសុន្ទរកថាលោកត្រាំតាមទូរទស្សន៍នៅហាងស្រាមួយកន្លែងក្នុងទីក្រុង ប៉េកាំង ប្រទេសចិន កាលពីថ្ងៃទី ៤ ខែវិច្ឆិកា ឆ្នាំ២០២០ ។ រូបភាព៖ AFP
×![]()
ការបោះឆ្នោតប្រធានាធិបតីអាមេរិកដែលកំពុងប្រទាញប្រទង់ខ្លាំង ពុំគ្រាន់តែទាញចំណាប់អារម្មណ៍ពលរដ្ឋក្នុងប្រទេសនេះប៉ុណ្ណោះ តែវាក៏បានក្លាយជាប្រធានបទដ៏ក្តៅគគុកមួយក្នុងចំណោមអ្នកលេងបណ្ដាញសង្គមចិនផងដែរ។ 
ប្រធានបទពាក់ព័ន្ធនឹងការបោះឆ្នោតអាមេរិក កំពុងពេញនិយមយ៉ាងខ្លាំងនាពេលប៉ុន្មានថ្ងៃចុងក្រោយ នៅលើបណ្ដាញសង្គមដ៏ល្បីរបស់ចិន Weido ជាមួយឃ្លាថា «#USPresidentialelection» ទាញការអានបានរហូតដល់ជិត៦,៧៧ពាន់លានដងឯណោះ។
បន្ថែមពីលើនេះ ព័ត៌មានវិវត្តន៍ចុងក្រោយពាក់ព័ន្ធនឹងការបោះឆ្នោតនេះ ដូចជា របាយការណ៍ដែលលោកត្រាំដាក់ពាក្យបណ្ដឹងក្នុងរដ្ឋប្រទាញប្រទង់ជាដើម មានអ្នកចូលអានដល់១០០លានដងផងដែរក្នុងពេលត្រឹមមួយម៉ោង។ នេះបើតាមសារព័ត៌មានរដ្ឋចិន Global Times ។
សម្រាប់ការជជែកពិភាក្សាលើប្រធានបទការបោះឆ្នោតអាមេរិកនេះ អ្នកលេងបណ្ដាញសង្គមចិនភាគច្រើន បានសរសេរលេងសើច និងបែបចំអកឡកឡាយ។ ពួកគេបានឲ្យឈ្មោះក្រៅលោក ដូណាល់ ត្រាំ ថា «ត្រាំ អ្នកកសាងប្រជាជាតិចិន» ដោយពួកគេជឿថា លោក ត្រាំ ចូលរួមចំណែកក្នុងការងើបឡើងរបស់ចិន ដោយការធ្វើឲ្យប្រទេសខ្លួនឯងធ្លាក់ចុះ។
ចំណែក អ្នកប្រើប្រាស់បណ្ដាញសង្គមចិនម្នាក់ទៀត បានបង្កើតផែនទីសហរដ្ឋអាមេរិក ដែលពោរពេញដោយអុតពណ៌ក្រហម ដោយមានរូបលោកត្រាំ ឈរនៅក្បែរផែនទីនោះ ហើយបង្ហាញការត្រេកអរថា៖«Wow, មើលនេះ សុទ្ធតែរដ្ឋពណ៌ក្រហម»។ យ៉ាងណា ក្នុងរូបដដែលនេះ ឃើញមានបុរស២នាក់និយាយខ្សិបដាក់គ្នាថា៖«អ្នកប្រាប់គាត់ (លោកត្រាំ) ថា នេះជាផែនដីជំងឺកូវីដ-១៩ទេ»។
ក្រោយពីនេះ រូបថ្លុកដៀមដាម និងសារបែបសើចចំអកជាច្រើនទៀត ត្រូវបានសរសេរដោយអ្នកលេងបណ្ដាញសង្គមចិន ហើយត្រូវបានចែកចាយយ៉ាងសុសសាយផងដែរ។
សូមបញ្ជាក់ថា ដំណើរការបោះឆ្នោតអាមេរិក នៅមិនចប់នៅឡើយ ខណៈសន្លឹកឆ្នោតក្នុងរដ្ឋ៥ទៀត នៅកំពុងត្រូវបានរាប់នៅឡើយ។ ភាពយឺតយ៉ាវនេះ ក៏ព្រោះតែមានសន្លឹកឆ្នោតជាច្រើនត្រូវបានផ្ញើតាមរយៈប្រៃសណីយ៍។
បច្ចុប្បន្ន លោក បៃឌិន បេក្ខជនបក្សប្រជាធិបតេយ្យ ក្ដាប់បានសំឡេងប្រតិភូ ២៦៤ ខណៈលោក ត្រាំ ឈ្នះបាន ២១៤ សំឡេងប្រតិភូ ។ ដើម្បីក្លាយជាម្ចាស់សេតវិមាន បេក្ខជន ត្រូវការសំឡេងយ៉ាងតិច ២៧០គាំទ្រពីប្រតិភូ ៕
Tag:
ចិន
ដូណាល់ ត្រាំ
ចូ បៃឌិន
ការបោះឆ្នោតអាមេរិក
© រក្សាសិទ្ធិដោយ thmeythmey.com
