ជាតិ
សង្គមជាតិ
មន្ត្រីជលផលណែនាំឲ្យកសិករ ចិញ្ចឹមត្រី-កង្កែបក្នុងស្រះសិប្បនិម្មិត ងាយស្រួលមើលថែ និងទិន្នផលខ្ពស់
× វិស័យវារីវប្បកម្មកាន់តែទូលាយ របៀបនៃការចិញ្ចឹមត្រី កង្កែប បង្កង ក៏មានការផ្លាស់ប្ដូរ។ ការចិញ្ចឹមបែបធម្មជាតិគឺជាការចិញ្ចឹមត្រី កង្កែប ក្នុងស្រះ រីឯការចិញ្ចឹមបែបសិប្បនិម្មិតវិញ គឺជាការធ្វើអាងចិញ្ចឹមពីតង់ ឬប្លាស្ទិក។
វិស័យកសិកម្ម កំពុងឈានមុខគេក្នុងវិបត្តិកូវីដ-១៩ ពិសេសគឺផ្នែកវារីវប្បកម្ម ហើយរបរនេះបានក្លាយជាមុខរបរស្នូលរបស់ពលរដ្ឋកម្ពុជាផងដែរ។ បើទោះបីចំនួនអ្នកចិញ្ចឹមមានការកើនឡើង ប៉ុន្តែរបៀបនៃការចិញ្ចឹមនៅតែជាចំណុចសំខាន់ដែលកសិករគួរយល់ដឹង។ អ្នកជំនាញផ្នែកជលផលបានណែនាំអ្នកចិញ្ចឹមត្រី កង្កែប ងាកមកចិញ្ចឹមតាមរបៀបសិប្បនិម្មិត ព្រោះវាមានអត្ថប្រយោជន៍ និងងាយស្រួលក្នុងការចិញ្ចឹម។
លោក ហ៊ី សារុន មន្ត្រីផ្នែកជលផលនៃរដ្ឋបាលជលផលរាជធានីភ្នំពេញ បានប្រាប់សារព័ត៌មានThmeyThmey25 ថា ការចិញ្ចឹមត្រី កង្កែប ដោយធ្វើអាងសិប្បនិម្មិតមានអត្ថប្រយោជន៍ច្រើន បើប្រៀបធៀបនឹងការចិញ្ចឹមត្រី កង្កែប តាមបែបធម្មជាតិដោយចិញ្ចឹមក្នុងស្រះ។ លោកពន្យល់យ៉ាងដូច្នេះ៖«ការចិញ្ចឹមបែបសិប្បនិម្មិត និងចិញ្ចឹមបែបធម្មជាតិ មានអត្ថប្រយោជន៍ផ្សេងៗគ្នា។ តែចិញ្ចឹមបែបសិប្បនិម្មិតងាយស្រួលគ្រប់គ្រង ស្រួលចិញ្ចឹម ស្រួលផ្ដល់ចំណី ចំណាយពេលតិច និងអត្រាបាត់បង់ក៏តិចដែរ»។
អ្នកជំនាញផ្នែកជលផលរូបនេះ បានណែនាំឲ្យអ្នកចិញ្ចឹមត្រី និងកង្កែប ក្នុងអាងសិប្បនិម្មិត ដូចជាការចិញ្ចឹមក្នុងតង់ ឬប្លាស្ទិក ប្រសើរជាងចិញ្ចឹមត្រី ឬកង្កែបតាមបែបធម្មជាតិ។ លោក ហ៊ី សារុន ប្រាប់បន្តថា៖«ការចិញ្ចឹមបែបធម្មជាតិវាមានហានិភ័យច្រើន ដោយត្រូវការសម្អាតស្រះច្រើន ចំណាយពេលវេលាច្រើនក្នុងការថែទាំ និងប្រឈមនឹងសត្វចង្រៃស៊ីត្រីផងដែរ»។ បើតាមលោក ហ៊ី សារុណ គុណភាពទឹកជាកត្តាសំខាន់ ព្រោះការចិញ្ចឹមក្នុងស្រះអាចមានភាពកង្វក់ដែលពិបាកក្នុងការគ្រប់គ្រង។ ដោយឡែកកត្តាធម្មជាតិក៏ជាផ្នែកមួយងាយប្រឈមដែរក្នុងការចិញ្ចឹមតាមបែបធម្មជាតិ។
លោក នុត សាវ៉ាត អាយុ២៩ឆ្នាំ ជាអ្នកចិញ្ចឹមកង្កែប និងបង្កងមួយរូប រស់នៅស្រុកព្រៃកប្បាស ខេត្តតាកែវ បានជ្រើសរើសការចិញ្ចឹមកង្កែប និងបង្កង តាមបែបសិប្បនិម្មិតដោយប្រើប្រាស់តង់ធ្វើជាអាងចិញ្ចឹម។ កសិកររូបនេះ បានប្រាប់សារព័ត៌មាន ThmeyThmey25 យ៉ាងដូច្នេះ៖«វាចំណាយដើមទុនតិច ទីធ្លាតូចងាយគ្រប់គ្រងជាងធំ។ អ្នកមានដីតូចនិងដើមទុនតិចក៏អាចធ្វើបានដែរ ដើម្បីដោះស្រាយជីវភាពគ្រួសារ»។ លោក សាវ៉ាត បានជ្រើសការចិញ្ចឹមក្នុងអាងសិប្បនិម្មិតជាងមួយឆ្នាំមកហើយ ធ្វើឲ្យលោកងាយស្រួលគ្រប់គ្រងក្នុងការងារចិញ្ចឹមកង្កែប និងបង្កង របស់លោក ហើយអាចឲ្យលោកទទួលបានចំណូលប្រមាណ ៦០០ដុល្លារក្នុងមួយខែ។
បច្ចុប្បន្នការចិញ្ចឹមត្រី កង្កែប មានភាពទូលាយ លោក ហ៊ី សារុន ក៏បានលើកទឹកចិត្តឲ្យអ្នកចិញ្ចឹមងាកមកចិញ្ចឹមតាមបែបសិប្បនិម្មិតវិញ ព្រោះទាំងទិន្នផល និងគុណភាពត្រីមានភាពប្រសើរជាងចិញ្ចឹមតាមបែបធម្មជាតិ។ ម្យ៉ាង ការចំណាយតិច អាចប្រើរយៈពេល ២ទៅ៣ឆ្នាំ ដោយមិនចាំបាច់ចំណាយថវិកានិងកម្លាំងក្នុងការជីកស្រះ។ ប៉ុន្តែជាមួយគ្នានោះក៏ត្រូវមានបច្ចេកទេសចិញ្ចឹមឲ្យបានត្រឹមត្រូវ និងគួរជ្រើសរើសប្រភេទត្រីដែលងាយស្រួលចិញ្ចឹមដូចជាប្រភេទត្រីអណ្ដែង និងត្រីក្រាញ់ជាដើម៕
Tag:
កសិកម្ម
វារីវប្បកម្ម
ត្រី
កង្កែប
© រក្សាសិទ្ធិដោយ thmeythmey.com