កម្ពុជា-ថៃ គ្រោងបើកច្រកព្រំដែន ដើម្បីឲ្យពលករខ្មែរទៅបំពេញការងារបន្ថែមនៅថៃ

ជាតិ

សង្គមជាតិ

កម្ពុជា-ថៃ គ្រោងបើកច្រកព្រំដែន ដើម្បីឲ្យពលករខ្មែរទៅបំពេញការងារបន្ថែមនៅថៃ

06, Nov 2020 , 9:39 pm

រូបភាព

ពលរដ្ឋខ្មែរនៅច្រកទ្វារព្រំដែនអន្តរជាតិអូរស្មាច់ ខេត្តឧត្តរមានជ័យ កាលពីថ្ងៃទី៤វិច្ឆិកា ២០២០ ត្រៀមឆ្លងទៅប្រទេសថៃ។ (រូបពីអគ្គនាយកដ្ឋានអន្តោប្រវេសន៍)

ដោយ: ឡាយ សុភាវតី

ភ្នំពេញ៖ មន្រី្តក្រសួងការងារ និងបណ្ដុះបណ្ដាលវិជ្ជាជីវៈ កម្ពុជា-ថៃ បានសម្រេចព្រមព្រៀងគ្នាគ្រោងស្នើទៅរដ្ឋាភិបាលរបស់ខ្លួន ដើម្បីបើច្រកព្រំដែនសម្រាប់បញ្ជូននិងទទួលពលករខ្មែរទៅបំពេញការងារតាមរដូវកាល។

ការព្រមព្រៀងគ្នានេះ ធ្វើឡើងតាមកិច្ចប្រជុំរបស់រដ្ឋមន្ត្រីក្រសួងការងារ លោក អ៊ិត សំហេង និង លោក អនុរដ្ឋមន្រី្តក្រសួងការងារប្រទេសថៃ លោក Surachai Chaitrakulthong តាមប្រព័ន្ធវីដេអូ។ ភាគីទាំងពីរ បានពិភាក្សាគ្នាពីអនុស្សរណៈយោគយល់នៃវិស័យការងារ កិច្ចព្រមព្រៀងកម្លាំងពលករ រួមទាំងការផ្ដល់ភាពស្រប់ច្បាប់ដល់ពលករកម្ពុជានៅអំឡុងពេលកូវីដ-១៩។

បើតាមសេចក្ដីប្រកាសព័ត៌មានរបស់ក្រសួងការងារ ក្នុងកិច្ចប្រជុំកាលពីថ្ងៃទី៥វិច្ឆិកា កម្ពុជា-ថៃ បានព្រមពៀងគ្នាបន្តកិច្ចសន្យាឲ្យពលករខ្មែរដែលបានបញ្ជូនតាមរយៈអនុស្សរណៈនៃការយោគយល់គ្នារយៈ២ឆ្នាំទៀត។ ភាគីទាំងពីក៏បានសម្រេច បញ្ជូននិងទទួលពលករកម្ពុជាទៅធ្វើការតាមរដូវកាលនៅតាមបណ្ដាលខេត្តជាប់ព្រំដែនកម្ពុជា-ថៃ ដោយស្នើសុំគោលការណ៍ពីរដ្ឋាភិបាលរបស់ខ្លួន ដើម្បីបើកច្រកព្រំដែនសម្រាប់ឲ្យពលករកម្ពុជាទៅដោយអនុវត្តតាមវិធានការរបស់សុខាភិបាល។

ក្រៅពីនេះ កម្ពុជា-ថៃ បានឯកភាពគ្នា ផ្ដល់ការបន្តសុពលភាពលិខិតធ្វើដំណើរដល់ពលរកកម្ពុជាធ្វើការនៅបរទេស (TD) ដែលកំពុងស្នាក់នៅប្រទេសថៃ។ ភាគីទាំងពីរ ក៏បានប្រកាសរួមគ្នាទប់ស្កាត់ភាពមិនប្រក្រតីនៃការផ្ដល់ភាពស្របច្បាប់ដល់ពលករ និងរួមគ្នាទប់ស្កាត់ការឆ្លងដែនខុសច្បាប់៕