មាតាបិតាសិស្ស និងបុគ្គលិក៧នាក់ ដែលប្រាស្រ័យទាក់ទងនឹងប្រមុខការទូតហុងគ្រី មិនឆ្លងកូវីដ-១៩ឡើយ

COVID-19

ជាតិ

សង្គមជាតិ

មាតាបិតាសិស្ស និងបុគ្គលិក៧នាក់ ដែលប្រាស្រ័យទាក់ទងនឹងប្រមុខការទូតហុងគ្រី មិនឆ្លងកូវីដ-១៩ឡើយ

06, Nov 2020 , 10:59 pm

រូបភាព

លោក Péter Szijjártó រដ្ឋមន្រ្តីការបរទេស និងពាណិជ្ជកម្មហុងគ្រី ក្នុងដំណើរទស្សនកិច្ចនៅកម្ពុជានាថ្ងៃទី៣ ខែវិច្ឆិកា រូបភាពពីក្រសួងការបរទេស និងសហប្រតិបត្តិការអន្តរជាតិ

ដោយ:

ភ្នំពេញ៖ មាតាបិតា សិស្ស និងបុគ្គលិក៧នាក់ មកពីគ្រឹះស្ថានសិក្សាឯកជន ដែលប្រាស្រ័យទាក់ទងនឹងលោក Péter Szijjártó ប្រមុខការទូតហុងគ្រី ដោយផ្ទាល់ និងប្រយោលនោះ មិនឆ្លងកូវីដ-១៩ឡើយ។ នេះបើតាមលទ្ធផលការធ្វើតេស្តជំងឺកូវីដ-១៩ លើកដំបូងរបស់ពួកគេ។

លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានបញ្ជាក់ប្រាប់អ្នកសារព័ត៌មានថ្មីៗតាមតេឡេក្រាមថា គណៈគ្រប់គ្រងគ្រឹះស្ថានសិក្សាឯកជនចំនួន៤នោះ បានចាត់ចែងឲ្យសិស្សានុសិស្ស និងបុគ្គលិកសាលា ដែលបានពាក់ព័ន្ធនឹងដំណើរទស្សនៈកិច្ចរបស់រដ្ឋមន្ត្រីការបរទេសហុងគ្រីមកកម្ពុជានោះ ធ្វើចត្តាឡីស័កខ្លួនឯងចំនួន១៤ថ្ងៃ និងបានធ្វើតេស្តរកជំងឺកូវីដ-១៩លើកទី១ ដោយលទ្ធផលអវិជ្ជមាន។

លោក រស់ សុវាចា បានរៀបរាប់ដូច្នេះថា៖«គណ:គ្រប់គ្រងនៃគ្រឹះស្ថានសិក្សាទាំងនេះ បានចាត់ចែងអនុវត្តវិធានការតាមការណែនាំរបស់ក្រសួងសុខាភិបាលយ៉ាងខ្ជាប់ខ្ជាន់ រួចបានផ្អាកដំណើរការសិក្សាក្នុងថ្នាក់រៀនតាមការចាំបាច់ និងបន្តការសិក្សាតាមអនឡាញរយ:ពេល១៤ថ្ងៃ»។

បើតាមលោក រស់ សុវាចា សិស្សានុសិស្សទាំងនោះ នឹងអាចត្រឡប់មករៀនវិញ នៅពេលដែលពួកគេបានធ្វើតេស្តជាលើកទី៤ ដោយបញ្ជាក់លទ្ធផលថា អវិជ្ជមានកូវីដ-១៩ ។ ក្រសួងអប់រំបានណែនាំឲ្យពួកគេ ត្រូវប្រុងប្រយ័ត្នឱ្យខ្ពស់បំផុត និងត្រូវតាមដានសុខភាពផ្ទាល់ខ្លួន ហើយក្នុងករណីសង្ស័យ ត្រូវទាក់ទងទៅទូរសព្ទទាន់ហេតុការណ៍របស់ក្រសួងសុខាភិបាល។

គិតត្រឹមថ្ងៃទី៥ ខែវិច្ឆិកា ក្រសួងសុខាភិបាលបានធ្វើតេស្តអ្នកដែលពាក់ព័ន្ធជាមួយនឹងរដ្ឋមន្ត្រីការបរទេសហុងគ្រីបន្ថែមចំនួន២១២នាក់ទៀត ដោយលទ្ធផលអវិជ្ជមានកូវីដ-១៩ទាំងអស់។ សរុបមកអ្នកដែលប្រាស្រ័យផ្ទាល់ និងប្រយោល ជាមួយប្រមុខការទូតហុងគ្រី មានចំនួន៨៤០នាក់ហើយ ដែលបានធ្វើតេស្តសុខភាព ដោយលទ្ធផលអវិជ្ជមានទាំងអស់។

Relate 97336, 97348

ថ្វីដ្បិតពួកគេអវិជ្ជមានជំងឺកូវីដ-១៩ ក្នុងការធ្វើតេស្តលើកដំបូង ពួកគេក៏ត្រូវធ្វើចត្តាឡីស័កខ្លួនឯងដោយគោរពតាមគោលការណ៍ណែនាំរបស់ក្រសួងសុខាភិបាលចំនួន១៤ថ្ងៃ និងធ្វើតេស្តចំនួន៣លើកទៀតជាមុនសិន។ ក្រសួងបញ្ជាក់ថា ពួកគេនឹងធ្វើតេស្តលើកទី២នៅថ្ងៃទី៩ លើកទី៣នៅថ្ងៃទី១៤ និងលើកទី៤នៅថ្ងៃទី១៨។

គិតត្រឹមថ្ងៃទី៦ ខែវិច្ឆិកានេះ កម្ពុជា មានអ្នកមានអ្នកឆ្លងកូវីដ-១៩ ចំនួន២៩២នាក់ ហើយបានព្យាបាលជាសះស្បើយ២៨៦នាក់។ ចំណែក៦នាក់ទៀត គឺកំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត៕

ក្រសួងអប់រំ បានប្រកាសលេខទូរសព្ទ ០១២ ៣៣ ៥៩៩៩ ដើម្បីឲ្យសាស្រា្តចារ្យ បុគ្គលិកអប់រំ និងសិស្សនិស្សិត ដែលជួបផ្ទាល់នឹងរដ្ឋមន្ត្រីការបរទេសហុងគ្រីរាយការណ៍មកក្រសួងអប់រំ។