ពាន«គរុគុណ»ជាឱកាសសម្រាប់កីឡាករមកពីតាមខេត្ត ក្លាយជាជម្រើសជាតិកីឡាប៉េតង់

កីឡាជាតិ

ជាតិ

ពាន«គរុគុណ»ជាឱកាសសម្រាប់កីឡាករមកពីតាមខេត្ត ក្លាយជាជម្រើសជាតិកីឡាប៉េតង់

07, Nov 2020 , 8:29 am

រូបភាព

លោក ស សុខា ប្រធានសហព័ន្ធកីឡាប៊ូល និងប៉េតង់កម្ពុជា

ដោយ:

ការប្រកួតកីឡាប៉េតង់ដណ្តើមពានរង្វាន់«គរុគុណ» ដែលរៀបចំឡើង ដើម្បីរំលឹក និងតបស្នងសងគុណដល់ស្ថាបនិកសហព័ន្ធ បានបើកការប្រកួតជាផ្លូវការនៅព្រឹកថ្ងៃទី៦ ខែតុលា ឆ្នាំ២០២០ នេះ។ ការប្រកួតនេះ ជាឱកាសសម្រាប់កីឡាករកីឡាការិនីមកពីក្លិបសមាគមតាមខេត្ត-ក្រុងនានា បានបង្ហាញសមត្ថភាព ដើម្បីឆក់យកកៅអីប្រមូលផ្តុំហ្វឹកហាត់ក្នុងក្រុមជម្រើសជាតិ។

ជាការប្រកួតដើម្បីរំលឹក និងតបស្នងសងគុណ ដល់អតីតប្រធានសហព័ន្ធកីឡាប៊ូល និងប៉េតង់កម្ពុជាសម្តេចវិបុលបញ្ញា សុខ អាន និងសម្តេច ស ខេង ក៏ពិតមែន។ ប៉ុន្តែពាន«គរុគុណ»ជាឱកាសសម្រាប់កីឡាករមកពីក្លិបសមាគមនានាក្នុងការក្លាយជាកីឡាករជម្រើសជាតិ។

បើតាមលោក ស សុខា ប្រធានសហព័ន្ធកីឡាប៊ូលនិងប៉េតង់កម្ពុជា លោក នឹងចាត់មន្ត្រីជំនាញតាមដានការប្រកួតនីមួយៗរបស់កីឡាករកីឡាការិនីមកពីតាមបណ្តាខេត្ត ដើម្បីស្វែងរកអ្នកមានសមត្ថភាពនិងទេពកោសល្យខ្ពស់ សម្រាប់ត្រៀមបញ្ចូលក្នុងក្រុមជម្រើសជាតិ។ លោក បានបញ្ជាក់ថា ទោះបីកីឡាករមកពីតាមបណ្តាខេត្តមិនទទួលបានជ័យជម្នះក្នុងការប្រកួតក៏ដោយ ឲ្យតែមានសមត្ថភាពប្រហាក់ប្រហែលអាចប្រកួតប្រជែងជាកីឡាករកីឡាការិនីជម្រើសជាតិ។

នាពិធីបើកការប្រកួតកីឡាប៉េតង់ដណ្តើមពានរង្វាន់«គរុគុណ»នៅព្រឹកថ្ងៃទី៦ ខែវិច្ឆិកា ឆ្នាំ២០២០ លោក ស សុខា បានបញ្ចាក់យ៉ាងដូច្នេះថា៖«វាជាឱកាសធំមួយសម្រាប់គណៈកម្មការរៀបចំ ក៏ដូចជាថ្នាក់ដឹកនាំសហព័ន្ធ ដើម្បីកត់ចំណាំទុកសម្រាប់ក្រុមកីឡាករកីឡាការិនីណា ដែលមានទេពកោសល្យល្អ យើងនឹងហៅ ឬត្រៀមឲ្យចូលរួមជាមួយក្រុមជម្រើសជាតិ ដើម្បីត្រៀមខ្លួនឆ្ពោះទៅស៊ីហ្គេមឆ្នាំ២០២៣ ដែលជាប្រវត្តិសាស្ត្រកម្ពុជាបានបើកទ្វារធ្វើជាម្ចាស់ផ្ទះ»។

រដ្ឋលេខាធិការក្រសួងអប់រំ យុវជន និងកីឡារូបនេះ ជំរុញឲ្យកីឡាករទាំងអស់ខិតខំប្រឺងប្រែងប្រកួតឲ្យអស់ពីសមត្ថភាពក្នុងការប្រជែងដណ្តើមជើងឯកតាមប្រភេទវិញ្ញាសានីមួយៗ ក៏ដូចជាដើម្បីចាប់យកឱកាសក្លាយជាកីឡាករជម្រើសជាតិ។ លោកសង្កត់ធ្ងន់ថា កីឡាករអាចនឹងរងការពិន័យ ប្រសិនបើរកឃើញថា កីឡាករ ឬក្រុមណាប្រកួតមិនអស់ពីសមត្ថភាព ដើម្បីផ្តល់ឱកាសឲ្យកីឡាករ ឬក្រុមណាមួយឡើងទៅវគ្គបន្ត។

ក្នុងឱកាសនោះ លោក ក៏បានលើកឡើងពីសមិទ្ធផលរបស់សហព័ន្ធកីឡាប៊ូល និងប៉េតង់កម្ពុជា ដែលសម្រេចបានកាលពីពេលកន្លងមកផងដែរ។ ក្រោយកកើតឡើងតាំងពីឆ្នាំ១៩៩១មកដល់បច្ចុប្បន្ន សហព័ន្ធនេះ បានសាងស្នាដៃយ៉ាងច្រើនសន្ធឹកសន្ធាប់នៅលើឆាកអន្តរជាតិ ក្នុងនោះដណ្តើមបានមេដាយមាសចំនួន១០០ ប្រាក់ និងសំរឹទ្ធជាង២០០។

សម្រាប់ការប្រកួតពាន«គរុគុណ»ដែលប្រព្រឹត្តទៅចាប់ពីថ្ងៃទី៦-៨ ខែវិច្ឆិកា ឆ្នាំ២០២០ នៅទីលានប៉េតង់ក្នុងពហុកីឡដ្ឋានជាតិមានក្រុមចូលរួមចំនួន៥៨ ដែលមានកីឡាករសរុបចំនួន៤៩៥នាក់។ អត្តពលិកទាំងនេះ ប្រកួតប្រជែងគ្នាលើ៨វិញ្ញាសា៕