ភ្នំពេញ៖ ដើរលើវិថីតែងនិពន្ធ តាំងពីអំឡុងឆ្នាំ២០១៤ លោក ស៊ុំ សុរិយ ដែលតាំងចិត្តផ្សព្វផ្សាយពី ទំនៀមទម្លាប់ និងវប្បធម៌ខ្មែរ ក្នុងស្នាដៃរបស់ខ្លួន ទើបតែមានស្នាដៃប្រលោមលោក៣រឿងប៉ុណ្ណោះ។ “វីរនារីខ្លាចខ្មោច” “ឃុននារីអនុស្សា” “រដូវវស្សាស្នេហាខ្ញុំ” គឺជាប្រលោមលោកប្រឌិតផ្សំជាមួយនឹងបទពិសោធន៍ជីវិតមនុស្សរស់ក្នុងសង្គមច្រើននាក់។ ដោយឡែក “អ្នកកាសែតស្រី” គឺជាប្រលោមលោកទី៤ និងដំបូងគេរបស់លោក សុរិយ ដែលលាតត្រដាងពីជីវិតពិតរបស់នារីតែម្នាក់។ ប្រលោមលោកនេះ នឹងផ្ដល់ឱ្យអ្នកអាន ឃើញពីវិធីដោះស្រាយបញ្ហា ពីមួយដំណាក់កាលទៅមួយដំណាក់កាល ភាពអត់ធ្មត់ ការតស៊ូ វិជ្ជាជីវៈអ្នកកាសែត ភាពកតញ្ញូ ជាពិសេសជីវិតអ្នកកាសែតស្រីមួយរូប។
ខ្លឹមសាររឿងខ្លះៗមាននៅក្នុងបទយកការណ៍ខាងក្រោម ដូច្នេះសូមអញ្ជើញលោកអ្នក ស្ដាប់ដោយក្ដីរីករាយ៖
ជារឿងទី៤ក្នុងស្នាដៃប្រលោមលោករបស់ខ្លួន លោក ស៊ុំ សុរិយ ដែលពីដើមឡើយមិនចូលចិត្តសរសេរប្រលោមលោករឿងពិតរបស់បុគ្គលណាមួយ ជាពិសេសរឿងរបស់ខ្លួននោះ បានប្ដូរចិត្តមកសរសេរពីដំណើរជីវិតរបស់នារីសាមញ្ញម្នាក់ ដែលលោកគិតថាមានភាពអស្ចារ្យទាំងក្នុងការងារ និងគ្រួសារ។
អង្គុយក្នុងមជ្ឈមណ្ឌលកម្រាន្តមួយកន្លែង ក្នុងរាជធានីភ្នំពេញ លោក សុរិយ ដែលពាក់អាវពណ៌សកបត់ដៃខ្លី និងស្លៀកខោពណ៌កាកអំពៅ នៅក្នុងដៃមានក្រដាសទំហំA4 បានរំលេចពាក្យថា ប្រលោមលោកជីវិតពិត នៅខាងលើបំផុតនៃផ្ទៃក្រដាស ហើយពាក្យនៅខាងក្រោមបន្ទាប់គឺ អ្នកកាសែត ដោយមានទំហំអក្សរធំជាងបន្ទាត់ខាងលើបន្តិច។ ចំណែកពាក្យដែលមានអំណាចជាងគេ លើផ្ទៃក្រដាសនេះ គឺ “ស្រី” ដោយមានពាក្យរាជនីបទយកការណ៍ ជាបន្ទាត់ចុងបំផុតនៃប្រយោគ។ រូប១
អ្នកនិពន្ធវ័យ៣១ឆ្នាំ ដែលមានសម្ដីម៉ាត់ៗហើយច្បាស់លាស់រូបនេះ ប្រាប់ពីឈ្មោះតួឯកស្រី ជាអ្នកសារព័ត៌មាននៅកម្ពុជា៖«វាជាជីវិតពិតរបស់អ្នកកាសែតស្រីដ៏កម្សត់ម្នាក់ គាត់ឈ្មោះថា ឃុន វ៉ាន់ដា។ “អ្នកកាសែតស្រី” នឹងសរសេររំលេចពីជីវិតពិតរបស់គាត់ ចំនួន៦០ភាគរយ ហើយ៤០ភាគរយទៀតគឺជាការបង្កើតថ្មីរបស់ខ្ញុំ ដោយខ្ញុំបន្ថែមឱ្យសាច់រឿងនេះកាន់តែទាក់ទាញ ដើម្បីឱ្យអ្នកអានទទួលបានអ្វីដែលថ្មី រួមទាំងការកម្សាន្ត។ ជីវិតកម្សត់របស់តួឯករបស់ខ្ញុំ គឺគាត់ជ្រើសរើសការងារដោយសារតែការខ្វះខាត ទីផ្សារការងារ និងជាការរត់គេចពីបញ្ហាមួយ។ ដូច្នេះក្នុងរឿងនេះ នឹងនិយាយពីតួឯកស្រីថាគាត់ធ្វើការអ្វីពីដំបូង ដែលធ្វើឱ្យគាត់ចងចាំ ហើយគាត់មិនចង់ត្រឡប់ទៅធ្វើការងារនោះវិញ»។
តាមពិតទៅជីវិតរបស់មនុស្សម្នាក់ៗ តែងជួបឧបសគ្គទាំងក្នុងការងារ ក៏ដូចជាក្នុងជីវិតគ្រួសារ ប៉ុន្តែអ្វីដែលសំខាន់តើពួកគេដោះស្រាយវាឱ្យទៅជាល្អប្រសើរដោយវិធីណា? អង្គុយលើបន្ទះក្ដារកម្រាស់៤ធ្នាប់ដៃ ដែលក្រាលពាសលើផ្ទៃការ៉ូថ្ម នៅជាន់ឡៅតឿនៃអគារមជ្ឈមណ្ដលកម្រាន្តលីឡា បុរសសម្បុរស្រអែមរូបនេះ ប្រាប់ពីចំណុចពិសេសដែលលោកបានមើលឃើញ ក្នុងខ្លួនតួឯកស្រីរបស់គាត់៖«គាត់ចាប់ផ្ដើមស្រឡាញ់ការងារជាអ្នកកាសែត។ គាត់ត្រូវរត់ស្របពេលដែលអ្នកកាសែតរួមក្រុមគេដើរ គាត់មិនពូកែលើការងារនេះទេ។ គាត់ជាអ្នកចិត្តវិទ្យា គាត់មិនមែនជាអ្នកសរសេរទេ ប៉ុន្តែគាត់ត្រូវមកធ្វើការងារជាអ្នកកាសែត អ៊ីចឹងគាត់ត្រូវរៀនពីការសរសេរហ្នឹងម្ដងទៀត ហើយគាត់ត្រូវរៀនពីគេ រៀនពីសង្គមរៀនពីសិស្សច្បង នឹងរៀនពីអ្នកធ្វើការជាមួយគ្នាច្រើននាក់ទៀត រហូតដល់គាត់អាចធ្វើការងារនេះបាន។ ចំណុចមួយទៀតរបស់តួឯកស្រី គឺជាមនុស្សស្រីម្នាក់ដែលត្រូវទទួលរ៉ាប់ការងារផង និងត្រូវទទួលរ៉ាប់មើលម្ដាយពិការនៅផ្ទះ»។ រូប២
ប្រលោមលោក “អ្នកកាសែតស្រី”នេះ នឹងលាតត្រដាងពីអំរែកក្នុងគ្រួសារដែលត្រូវរ៉ាប់រងតែម្នាក់ឯង របស់នារីម្នាក់ ហើយនាងនៅតែប្រឹងប្រែងរក្សាការងាររបស់ខ្លួន បើទោះបីជាត្រូវរងក្រសែភ្នែកបែបណាក៏ដោយចុះ៖«មនុស្សពេលដែលចាស់ទៅ គឺប្រៀបដូចជាមនុស្សពិការអ៊ីចឹង គឺគាត់មើលអ្វីមិនឃើញទេ។ ពេលខ្លះគាត់ត្រូវធ្វើការងារអ្វីមួយគាត់ភ្លេចភ្លាំង ឬគាត់ចាប់ខុសចាប់ត្រូវ ពេលខ្លះគាត់ដើរជាន់កូន ជាន់ចាន ជាន់ឆ្នាំង ដោយសារតែគាត់ងងិតគាត់មើលអ្វីមិនឃើញ។ តួស្រីរបស់យើងមានបញ្ហានៅកន្លែងការងារ មនុស្សជាច្រើនសួរថាហេតុអ្វី វ៉ាន់ដា មានរឿងអ៊ីចឹង ហេតុអ្វីធ្វើការមិនបានល្អ ហេតុអ្វីក៏មកកន្លែងការងារយឺត ប៉ុន្តែយើងមិនដឹងថារឿងនៅពីក្រោយបញ្ហារបស់គាត់ គឺវាលំបាកវេទនាយ៉ាងណានោះទេ។ គាត់អង្គុយធ្វើការ ប៉ុន្តែបេះដូងរបស់គាត់ផ្ញើទុកនៅផ្ទះ មិនដឹងពេលនេះម្ដាយរបស់គាត់ត្រូវធ្វើការងារអ្វីខ្លះ ឬក៏មានរឿងចៃដន្យអ្វីធ្វើឱ្យប៉ះពាល់ដល់រូបរាងកាយ ឬក៏ជីវិតរបស់គាត់»។
លោក ស៊ុំ សុរិយ បន្ថែម៖«ចំណុចមួយទៀតដែលខ្ញុំឃើញថាពិសេស គឺការក្រាញននៀលក្នុងវិស័យដែលគាត់កំពុងតែធ្វើ មានន័យថាទោះបីមានបញ្ហា ប៉ុន្តែគាត់មិនបោះបង់ការងារហ្នឹងទេ គាត់នៅតែធ្វើការងារហ្នឹង ធ្វើរហូតដល់ការងារនោះក្លាយទៅជាបំណងប្រាថ្នាមួយ។ គាត់ចង់យកការងារនោះមកធ្វើជាប្រយោជន៍ មានន័យថា តើត្រូវធ្វើអ្វីសម្រាប់សង្គមជាតិ ជាប្រយោជន៍សម្រាប់អ្នកអាន សម្រាប់អ្នកស្ដាប់ សម្រាប់អ្នកទស្សនា ហើយគាត់ចាប់ផ្ដើមធ្វើការងារនេះដោយបេះដូង ដោយគាត់ឆ្លៀតមើលថែម្ដាយផង»។ រូប៣
តាមពិតទៅ “អ្នកកាសែតស្រី” មិនត្រឹមតែនិយាយពីជីវិតរបស់នារីម្នាក់តែប៉ុណ្ណោះឡើយ ប៉ុន្តែអ្នកនិពន្ធក៏មានបំណងរំលេចឱ្យឃើញពីការងាររបស់អ្នកកាសែតវិជ្ជាជីវៈផងដែរ។ អង្គុយផ្ទាល់នឹងបន្ទះក្ដារ ដោយបញ្ឈរជង្គង់ស្ដាំហើយសណ្ដូកជើងឆ្វេង អ្នកនិពន្ធដែលធ្លាប់ប្រឡូកក្នុងវិស័យភាពយន្តរូបនេះ ពន្យល់ដូច្នេះ៖«រឿង”អ្នកកាសែតស្រី”នេះ គឺជារឿងដំបូងដែលខ្ញុំចង់ឱ្យអ្នកអាន នឹងប្រិយមិត្តទាំងអស់ ទទួលបានចំណុចពិសេសជាច្រើន។ “អ្នកកាសែតស្រី” នឹងបង្ហាញពីវិជ្ជាជីវៈអ្នកកាសែត។ លោកអ្នកនឹងបានដឹងថាការងាររបស់អ្នកកាសែតគេធ្វើបែបណា គាត់គួរតែជាមនុស្សប្រភេទណា ហើយលោកអ្នកនឹងដឹងថាអ្វីជាព័ត៌មានវិជ្ជាជីវៈ។ ពេលខ្លះអ្នកអានគាត់មិនដឹងថា តើព័ត៌មានណាពិត ឬព័ត៌មានណាមិនពិតនោះទេ ហើយបញ្ហានេះវាកំពុងកើតឡើងក្នុងសង្គម ព្រោះមានព័ត៌មានខ្លះវាមិនពិត»។
ភាពជោគជ័យនឹងបរាជ័យក្នុងដំណើរជីវិតស្ថិតលើក្បូននៃភាពក្លាហាន ក៏ជាអ្វីដែលអ្នកនិពន្ធ យកចិត្តទុកដាក់ផងដែរ៖«”អ្នកកាសែតស្រី” នឹងបង្ហាញជូនលោកអ្នកនូវមនុស្សស្រីរឹងមាំម្នាក់ ដែលមានឥទ្ធិពលនៅកន្លែងការងារ និងក្នុងការងារសង្គម ប៉ុន្តែគាត់ក្លាយទៅជាមនុស្សស្រីដែលចាញ់ប្រៀបមនុស្សស្រីធម្មតាម្នាក់។ ការមានប្រៀបនៅកន្លែងធ្វើការ ខ្ញុំចង់សំដៅលើ ពេលខ្លះមនុស្សស្រីគាត់មានគំនិតល្អជាងមនុស្សប្រុស គាត់អាចចុះយកព័ត៌មានបានដោយងាយ ដោយភាពវៃឆ្លាតរបស់គាត់ ដែលមនុស្សប្រុសនឹកស្មានមិនដល់។ គាត់ខុសពីមនុស្សស្រីធម្មតា ដែលទទួលបានការយកចិត្តទុកដាក់ ការចូលចិត្ត ឬក៏ការគិតថាគាត់គឺជាមនុស្សស្រី ដូចជាស្រីដទៃ។ អ្នកដែលស្គាល់គាត់ភាគច្រើន គឺគេគិតថាគាត់គឺជាមនុស្សប្រុស ដូច្នេះការប្រើពាក្យសម្ដីលួងលោមផ្លូវចិត្តគឺមិនមានទេ បើថាជម្លោះដូចគូបដិបក្ខប្រុសហើយនឹងប្រុសអ៊ីចឹង»។ រូប៤
ទំនងដូចជាមានអារម្មណ៍រង្កៀសបន្តិច នៅពេលដែលលើកឡើងចំចំណុចសមភាពយេនឌ័ររវាងស្ត្រីនិងបុរស។ ទោះជាយ៉ាងណា អ្នកនិពន្ធហាក់ដូចជាចង់ផ្ញើសារទៅចៅហ្វាយនាយមួយចំនួនដែរ ចំពោះការលើកទឹកចិត្តបុគ្គលិក៖«រឿងមួយចំនួនដែលយើងមិនដឹងថា តើនៅកន្លែងការងារ អ្នកកាសែតស្រីគាត់មានបញ្ហាអ្វីខ្លះ។ គាត់មិនទទួលបានការលើកទឹកចិត្តពីថ្នាក់ដឹកនាំ ឬគាត់ទទួលបានការងារមានទម្ងន់ធ្ងន់លើសពីការងារដែលគាត់ធ្លាប់បានជួប ព្រោះការងារខ្លះគេដាក់មក គេមិនបានគិតថាការងារណាជារបស់មនុស្សស្រី ឬជារបស់មនុស្សប្រុសទេ។ ដូច្នេះគាត់ត្រូវទទួលការងារដូចជាមនុស្សប្រុសដែរ។ អ្នករួមការងារខ្លះគឺគេរំលោភសិទ្ធិ និងកម្លាំងពលកម្ម ឬពេលខ្លះបំពាន កេងចំណេញអ្វីមួយ ដែលវាប្រាស់ចាកពីសីលធម៌។ បញ្ហាមួយទៀតយើងនឹងបង្ហាញពីការប្រឈមនឹងបញ្ហាគ្រួសារ។ ដល់កន្លែងនេះអ្នកទាំងអស់គ្នាប្រាកដជាគិតថា អ្នកកាសែតចាំបាច់និយាយពីរឿងស្នេហាដែរ»?
លោក សុរិយ ពន្យល់បន្ថែមពីការមើលឃើញរបស់ខ្លួន ជុំវិញភាពប្រឈមរឿងស្នេហារបស់នារីរឹងមាំ៖«អ្នកខ្លះអាចគិតថា ឱ្យតែជារឿងដឹងតែនិយាយពីស្នេហាតែម្ដងឬ សុរិយ? ប្រាកដហើយព្រោះជីវិតមនុស្សដើរទន្ទឹមនឹងស្នេហា អ៊ីចឹងនៅកន្លែងនេះតួអង្គរបស់ខ្ញុំ មានបញ្ហាប្រឈមនឹងស្នេហា។ ក្នុងវគ្គស្នេហាហ្នឹងគឺមានរឿងពិតរបស់គាត់ប្រហែល៣០ភាគរយ ចំណែក៥០ទៅ៦០ភាគរយទៀតគឺជារឿងដែលខ្ញុំបង្កើតវាឡើង ដើម្បីទាក់ទាញអ្នកអាន ហើយយើងបញ្ចូលសិល្បៈនៅក្នុងហ្នឹងផងដែរ។ “អ្នកកាសែតស្រី” មានបញ្ហាស្នេហា។ ធម្មជាតិរបស់មនុស្សប្រុសគឺគាត់ស្រឡាញ់តែមនុស្សស្រីដែលទន់ភ្លន់ និងទន់ខ្សោយទេ គេគ្រាន់តែខំប្រឹងប្រែងរកប្រាក់ចិញ្ចឹមគ្រួសារ ឱ្យប្រពន្ធមើលថែកូននិងមើលថែគ្រួសារ នេះមនុស្សប្រុសមួយចំនួនគិតបែបហ្នឹង។ ពេលដែលគាត់ជួបមនុស្សស្រីដែលរឹងមាំម្នាក់ គាត់មានអារម្មណ៍ថាមិនស្រឡាញ់»។
ទោះជាយ៉ាងណាក៏ដោយ អ្នកនិពន្ធរូបនេះ ក៏បានព្យាយាមរំលេចឱ្យឃើញពីបញ្ហាប្រឈមនានារបស់អ្នកកាសែតស្រី នៅគ្រប់កាលៈទេសៈផងដែរ៖«នៅក្នុងរឿង “អ្នកកាសែតស្រី” របស់ខ្ញុំនេះមានចំណុចពិសេសមួយ ដែលបង្ហាញឱ្យឃើញពីបញ្ហារបស់តួឯកស្រី ហើយគឺជារឿងពិត ដែលគាត់ជួបរឿងចៃដន្យមួយ គាត់ត្រូវចុះយកព័ត៌មាននៅតាមខេត្ត ហើយក្រុមការងារសុទ្ធតែជាបុរសទាំងអស់ បញ្ហានោះវាបានកើតឡើង ហើយវាបានធ្វើឱ្យគាត់ចងចាំ រហូតធ្វើឱ្យគាត់ស្ទើរតែលែងចង់ទៅធ្វើព័ត៌មាននៅតាមខេត្ត។ ដល់ចំណុចនេះលោកអ្នកនឹងបានឃើញពីបញ្ហាដែលអ្នកកាសែតស្រីម្នាក់ហ្នឹង គាត់ជួបបញ្ហាមួយហ្នឹង វាមានរឿងពិត៧០ភាគរយ»។ រូប៥
លោក ស៊ុំ សុរិយ ជឿថាស្នាដៃប្រលោមលោកទី៤រឿង “អ្នកកាសែតស្រី” នេះ នឹងជួយបង្ហាញផ្លូវដល់នារីគ្រប់រូប ដែលមានបំណងប្រឡូកក្នុងវិស័យសារព័ត៌មាន៖«បើសិនជាអ្នកអានរឿងនេះអ្នកកុំគិតថា កុំធ្វើអីអ្នកកាសែតព្រោះវាលំបាក ទេ យើងអាចយករឿង”អ្នកកាសែតស្រី”នេះ យកទៅសិក្សាសម្រាប់ខ្លួនឯង។ ប្រសិនបើប្អូនៗជាយុវតី ឬជាស្ត្រីដែលចង់ក្លាយជាអ្នកកាសែត សូមលោកអ្នកអានរឿងនេះកុំឱ្យរំលង។ ព្រោះ”អ្នកកាសែតស្រី” នឹងបង្រៀនលោកអ្នកឱ្យស្គាល់ថាអ្វីជាអ្នកកាសែតដែលប្រកបដោយវិជ្ជាជីវៈ ហើយធ្វើបែបណាដើម្បីឱ្យខ្លួនឯងរឹងមាំ ខ្លួនឯងអាចក្លាយជាអ្នកព័ត៌មានស្រីម្នាក់ ដ៏ពេញលេញដ៏ច្បាស់លាស់។ ហើយបញ្ហាមួយចំនួនដែលឆ្លុះបញ្ចាំងក្នុងរឿងរបស់យើង លោកអ្នកក៏អាចកែប្រែដើម្បីកុំឱ្យលោកអ្នកមានបញ្ហាដូចជាតួអង្គនៅក្នុងរឿងរបស់យើង។ សូមលោកអ្នកគាំទ្ររឿង “អ្នកកាសែតស្រី” ទាំងអស់គ្នា ដើម្បីវិស័យការអាននៅកម្ពុជា ហើយនឹងលើកតម្កើងការងារជាអ្នកកាសែតផង»។ រូប៦
ដើរមួយជំហានត្រូវគិតមួយជំហាន តើតួឯកស្រី នឹងដោះស្រាយឧបសគ្គរបស់ខ្លួនដោយវិធីណា? ចម្លើយមាននៅក្នុងប្រលោមលោករឿង “អ្នកកាសែតស្រី” និពន្ធដោយលោក ស៊ុំ សុរិយ ដែលអាចនឹងចេញលក់នៅដើមឆ្នាំ២០២១ខាងមុខនេះ។ ប្រលោមលោកឆ្លុះបញ្ចាំងពីជីវិតអ្នកកាសែតស្រីម្នាក់ ក៏ដូចជាដើម្បីលើកស្ទួយវិស័យព័ត៌មានវិជ្ជាជីវៈនៅកម្ពុជានេះ នឹងត្រូវលក់ជាសាធារណៈនៅទូទាំងកម្ពុជា ដោយមិនបែងចែកតម្លៃ ហើយខុសពីប្រលោមលោកមុនៗ ដែលលក់ត្រឹមតែក្នុងតំបន់មួយចំនួននោះ៕