COVID-19
ជាតិ
សង្គមជាតិ
កម្ពុជា រកឃើញ COVID-19ចំនួន២ករណីទៀត លើបុរសជនជាតិឥណ្ឌានិងប៉ាគីស្ថាន
× ភ្នំពេញ៖ នាព្រឹកថ្ងៃទី៧វិច្ឆិកានេះ ក្រសួងសុខាភិបាលប្រកាសរកឃើញវិជ្ជមានថ្មីនៃជំងឺកូវីដ-១៩(COVID-19)ចំនួន២ករណីទៀត ដែលកើតលើបុរសជនជាតិឥណ្ឌា និងបុរសជនជាតិប៉ាគីស្ថាន។ ក្រសួងសុខាភិបាលបានបញ្ជាក់ថា ជនជាតិបរទេសទាំង២នាក់មានផ្ទុកនូវជំងឺកូវីដ-១៩នេះ គឺបានធ្វើដំណើរមកពីប្រទេសឥណ្ឌា ដោយឆ្លងកាត់ប្រទេសអារ៉ាប់ប៊ីសាអូឌីត និងបន្តជើងហោះហើរនៅប្រទេសកូរ៉េខាងត្បូង ហើយមកដល់កម្ពុជា កាលពីថ្ងៃទី៥វិច្ឆិកា ឆ្នាំ២០២០។
ក្នុងសេចក្តីប្រកាសព័ត៌មានដែលចុះហត្ថលេខាដោយអ្នកស្រី ឱ វណ្ណឌីន រដ្ឋលេខាធិការក្រសួងសុខាភិបាល នៅថ្ងៃទី៧វិច្ឆិកានេះ បានរៀបរាប់ថា បុរសជាតិឥណ្ឌាដែលមានជំងឺកូវីដ-១៩ខាងលើនោះ គឺមានវ័យ៣៣ឆ្នាំ មានអាសយដ្ឋាននៅសង្កាត់លេខ៤ ក្រុងព្រះសីហនុ ខេត្តព្រះសីហនុ។ រីឯអ្នកជំងឺកូវីដ-១៩ជនជាតិប៉ាគីស្ថានវិញ មានវ័យ៣៥ មានអាសយដ្ឋាននៅសង្កាត់បឹងកក់១ ខណ្ឌទួលគោក រាជធានីភ្នំពេញ។ បច្ចុប្បន្ន អ្នកទាំង២កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។
ដោយឡែក មនុស្សចំនួន១០៥នាក់ទៀត ដែលបានធ្វើដំណើរជាមួយបុរសមានជំងឺកូវីដ-១៩ទាំង២នាក់នោះ គឺត្រូវបានក្រសួងសុខាភិបាលធ្វើតេស្តរកជំងឺនេះ ដោយលទ្ធផលអវិជ្ជមានទាំងអស់។ សព្វថ្ងៃអ្នកដំណើរទាំងនោះ កំពុងធ្វើចត្តាឡីស័ក១៤ថ្ងៃ នៅវិទ្យាល័យបូរី១០០ខ្នង ចំនួន៣០នាក់ និង៧៧នាក់ទៀត ធ្វើចត្តាឡីស័ក នៅសណ្ឋាគារផ្សេងៗពីគ្នាចំនួន៣ទីតាំង ក្នុងរាជធានីភ្នំពេញ។
ជាមួយគ្នានេះ ក្រសួងសុខាភិបាលក៏ប្រកាសនូវករណីជាសះស្បើយពីជំងឺកូវីដ-១៩ ចំនួន២ករណីផងដែរ។ ក្នុងនោះមានស្ត្រីខ្មែរ វ័យ៣២ឆ្នាំ មានអាសយដ្ឋាននៅភូមិអាចារ្យលាក់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ ដែលបានធ្វើដំណើរពីប្រទេសអ៊ីរ៉ាក់ មកដល់កម្ពុជា កាលពីថ្ងៃទី១៨តុលា កន្លងមក។ រីឯអ្នកសះស្បើយពីកូវីដម្នាក់ទៀតនោះ គឺបុរសជនជាតិ មានអាសយដ្ឋាននៅស្រុកបាកាន ខេត្តពោធិ៍សាត់ ដែលធ្វើដំណើរពីប្រទេសជប៉ុន មកដល់កម្ពុជា នៅថ្ងៃទី២៦តុលា ឆ្នាំ២០២០។
គិតត្រឹមថ្ងៃទី៧វិច្ជិកា កម្ពុជា រកឃើញអ្នកឆ្លងជំងឺកូវីដ-១៩ ចំនួន២៩២នាក់។ ក្នុងនោះ មានអ្នកជាសះស្បើយ ២៨៦នាក់ និង៦នាក់ទៀតកំពុងសម្រាកព្យាបាលនៅមន្ទីរពេទ្យ៕
© រក្សាសិទ្ធិដោយ thmeythmey.com