អន្តរជាតិ
លោកប្រធានាធិបតីរុស្ស៊ី_វ្ល៉ាឌីមៀ_ពូទីន។_រូបភាព៖_AFP
×![]()
ប្រធានាធិបតីរុស្ស៊ី លោក វ្ល៉ាឌីមៀ ពូទីនបានចុះហត្ថលេខាលើក្រឹត្យដែលតម្រូវឲ្យរដ្ឋាភិបាលរុស្ស៊ីសម្រេចឲ្យបានកម្មវត្ថុនៃកិច្ចព្រមព្រៀងអាកាសធាតុទីក្រុងប៉ារីសឆ្នាំ២០១៥។ ប៉ុន្តែ លោក ពូទីន បញ្ជាក់ថា ការការពារបរិស្ថាន និងអាកាសធាតុ ត្រូវដើរទន្ទឹមគ្នានឹងការអភិវឌ្ឍសេដ្ឋកិច្ច។
រុស្ស៊ី ដែលជាប្រទេសបញ្ចេញឧស្ម័នផ្ទះកញ្ចក់ច្រើនបំផុតលំដាប់ទី៤ បានបង្ហាញឆន្ទៈរបស់ខ្លួនក្នុងការទទួលយកកាតព្វកិច្ចក្នុងការការពារបរិស្ថាន។ ទោះជាបង្ហាញឆន្ទៈក្តីបែបនេះក្តី សកម្មជនបរិស្ថាននៅតែបន្តទាមទារឲ្យរុស្ស៊ី ពិន័យជាប្រាក់លើក្រុមហ៊ុនទាំងឡាយណាដែលបញ្ចេញឧស្ម័នផ្ទះកញ្ចក់ហួសកម្រិត។ នេះបើយោងតាមទីភ្នាក់ងារព័ត៌មាន Reuters។
នៅក្នុងក្រឹត្យដែលចុះផ្សាយនៅថ្ងៃទី៥ វិច្ឆិកា លោកប្រធានាធិបតី វ្ល៉ាឌីមៀ ពូទីន ណែនាំឲ្យរដ្ឋាភិបាលរុស្ស៊ីកាត់បន្ថយការបញ្ចេញឧស្ម័នពុលឲ្យបានយ៉ាងហោចណាស់៧០ភាគរយនៃកម្រិតឧស្ម័នដែលរុស្ស៊ីបញ្ចេញនៅឆ្នាំ១៩៩០ ហើយត្រូវតែសម្រេចគោលដៅនេះឲ្យបានក្នុងឆ្នាំ២០៣០។ ក្នុងន័យជាមួយគ្នានេះដែរ ក្រឹត្យនេះតម្រូវឲ្យរដ្ឋាភិបាលរុស្ស៊ីបង្កើនសមត្ថភាពក្នុងការស្រូបយកឧស្ម័នទាំងនោះពីបរិយាកាស ដោយដាំព្រៃឈើបន្ថែម និងរក្សាប្រព័ន្ធអេកូឡូស៊ី។
ទោះជាយ៉ាងណាក្តី លោក ពូទីន បានសង្កត់ធ្ងន់ថា សកម្មភាពក្នុងការកាត់បន្ថយឧស្ម័នពុល ត្រូវថ្លឹងថ្លែងឲ្យសមស្របទៅនឹងការអភិវឌ្ឍសង្គម និងសេដ្ឋកិច្ចដែរ។ លោកក៏បានបញ្ជាឲ្យរដ្ឋាភិបាលរុស្ស៊ីប្រញាប់ប្រញាល់អនុម័តផែនការសកម្មភាពសង្គម និងសេដ្ឋកិច្ចដោយរួមបញ្ចូលបញ្ហាបរិស្ថានផងដែរ។
រុស្ស៊ី ដែលមានទឹកកកគ្របដណ្តប់លើផ្ទៃដីមួយភាគធំ ងាយរងគ្រោះយ៉ាងខ្លាំងដោយសារបម្រែបម្រួលអាកាសធាតុដ្បិតអីហេដ្ឋារចនាសម្ព័ន្ធមួយភាគ ត្រូវបានសាងសង់លើផ្ទៃទឹកកក ដែលប្រឈមនឹងការរលាយនៅពេលមានកំណើនសីតុណ្ហភាពខ្លាំង។ ការប្រែប្រួលអាកាសធាតុ ក៏នឹងអាចប៉ះពាល់ដល់សេដ្ឋកិច្ចរុស្ស៊ីផងដែរ ដោយសារតែប្រទេសនេះអាស្រ័យមួយផ្នែកធំលើវិស័យប្រេង និងឧស្ម័ន ក៏ដូចជាការជីករករ៉ែ។
លោកប្រធានាធិបតី ពូទីន អះអាងថា រូបលោកជាអ្នកការពារបរិស្ថាន ប៉ុន្តែលោកក៏បានលើកជាចម្ងល់ដែរជុំវិញកត្តាដែលនាំឲ្យមានបម្រែបម្រួលអាកាសធាតុ ថាតើមកពីកត្តាមនុស្សតែមួយគត់ ឬយ៉ាងណា។
ជុំវិញកិច្ចព្រមព្រៀងអាកាសធាតុទីក្រុងប៉ារីសឆ្នាំ២០១៥វិញ ប្រមុខរដ្ឋរុស្ស៊ី បានសសើរពីកិច្ចព្រមព្រៀងដ៏មានមហិច្ឆតានេះ។ ប៉ុន្តែលោកអះអាងថា ដើម្បីសម្រេចគោលដៅប្រទេសនីមួយៗត្រូវចំណាយទឹកប្រាក់រាប់ពាន់លានដុល្លារក្នុងការធ្វើទំនើបកម្មវិស័យឧស្សាហកម្ម និងកាត់បន្ថយការងារមួយចំនួន។ លោកបន្ថែមថា ប្រទេសនីមួយៗត្រូវរៀបចំផែនការឲ្យបានច្បាស់លាស់ ដើម្បីសម្រេចកាតព្វកិច្ចអន្តរជាតិនេះ។
ជារឿងគួរឲ្យកត់សម្គាល់ ការប្រកាសរបស់លោកពូទីននៅថ្ងៃទី៥ វិច្ឆិកា កើតឡើងមួយថ្ងៃក្រោយអាមេរិក ចាកចេញជាផ្លូវការពីកិច្ចព្រមព្រៀងអាកាសធាតុ៕
Tag:
រុស្ស៊ី
បរិស្ថាន
© រក្សាសិទ្ធិដោយ thmeythmey.com
