ការប្រកួតបាល់ទាត់ដណ្តើមពានរង្វាន់សម្តេច ហ៊ុន សែន ប្រចាំឆ្នាំ២០២០ បានឈានដល់ការប្រកួតវគ្គផ្តាច់ព្រ័ត្រនៅថ្ងៃសៅរ៍ ទី៧ ខែវិច្ឆិកា ឆ្នាំ២០២០ នេះ ក្នុងនោះក្រុមណាហ្គាវើលត្រូវប្រជែងដណ្តើមជើងឯកជាមួយវិសាខា ក្រោយភ្នំពេញក្រោនប្រជែងដណ្តើមលេខ៣ជាមួយខេត្តព្រៃវែង។
ការប្រកួតវគ្គផ្តាច់ព្រ័ត្ររវាងក្រុមណាហ្គាវើល ជាមួយវិសាខា នៅម៉ោង៦ល្ងាច នាពហុកីឡដ្ឋានជាតិ នឹងក្លាយជាការប្រកួតដ៏ស្វិតស្វាញ និងទាក់ទាញបំផុតសម្រាប់ទស្សនិកជន ដ្បិតក្រុមទាំងពីរសុទ្ធតែបានអះអាងពីការត្រៀមបានល្អរៀងៗខ្លួនសម្រាប់ជំនួបមួយនេះ។ ម្យ៉ាងវិញទៀត ក្រុមទាំងពីរសុទ្ធតែទាមទារជ័យជម្នះ ក្រោយពួកគេបានរបូតពានក្នុងការប្រកួតក្របខណ្ឌមិត្តហ្វូនខេមបូឌានលីគនៅរដូវកាលនេះ។
លោក មាស ចាន់ណា គ្រូបង្វឹកក្រុមណាហ្គាវើលបានអះអាងថា ក្រុមលោកបានត្រៀមខ្លួនរួចរាល់ហើយក្នុងការប្រជែងដណ្តើមជើងឯកជាមួយវិសាខានៅល្ងាចនេះ។ គ្រូបង្វឹករូបនេះបានបញ្ជាក់ថា លោកត្រូវការជ័យជម្នះដើម្បីសាងប្រវត្តិសាស្ត្រជូនក្រុមក្នុងពានរង្វាន់សម្តេច ហ៊ុន សែន បន្ទាប់ពីពួកគេបានបាត់បង់ពានជាច្រើនលើករួចមកហើយ។
បើគិតទាំងលើកនេះ តាំងពីឆ្នាំ២០០៧ មកដល់បច្ចុប្បន្ន ក្រុមក្រោមការដឹកនាំរបស់លោក មាស ចាន់ណា ឡើងដល់វគ្គផ្តាច់ព្រ័ត្រពានរង្វាន់សម្តេច ហ៊ុន សែន បានចំនួន៧លើក។ ប៉ុន្តែក្នុងចំណោម៦លើកកន្លងមក ក្រុមនេះ ធ្លាប់ទទួលបានជើងឯកតែ១លើកប៉ុណ្ណោះ គឺនៅឆ្នាំ២០១៣ ក្រោយយកឈ្នះក្រុមក្រសួងការពារជាតិជាតិ(មជ្ឈមណ្ឌលកងយោធពលខេមរភូមិន្ទ)ដោយបាល់ប៉េណាល់ទី ៥-៣។
«យើងមិនចង់ឲ្យបាត់បង់ឱកាសនេះទៀតនោះទេ ដោយសារយើងបានបាត់បង់ឱកាសនេះ អស់ជាច្រើនលើកមកហើយ។ ណាហ្គាបានលើកមកវគ្គប្រហែលជា៦លើក ដូច្នេះយើងចង់ចារប្រវត្តិសាស្ត្រថ្មីសម្រាប់ណាហ្គាវើលក្នុងឆ្នាំ២០២០ នេះ»។ នេះជាការលើកឡើងរបស់លោក មាស ចាន់ណា ក្នុងសន្និសីទសារព័ត៌មានមុនការប្រកួតកាលពីថ្ងៃទី៦ វិច្ឆិកា ឆ្នាំ២០២០។
លោក Colum Curtis គ្រូបង្វឹកក្រុមវិសាខាបានបង្ហាញអារម្មណ៍រំភើបរីករាយ ដែលបានដឹកនាំក្រុមឡើងមកវគ្គផ្តាច់ព្រ័ត្រពានសម្តេច ហ៊ុន សែន ជាលើកដំបូង។ លោក ប្តេជ្ញថា លោកនឹងខិតខំប្រឹងប្រែងធ្វើយ៉ាងណា ឲ្យស័ក្តិសមជាក្រុមឡើងមកដល់វគ្គផ្តាច់ព្រ័ត្រ។ គ្រូបង្វឹកសញ្ជាតិអៀងឡង់រូបនេះបានរំលឹកថា កាលប្រកួតវគ្គពាក់កណ្តាលផ្តាច់ព្រ័ត្រវិសាខាមានឱកាសច្រើនតែធ្វើមិនបានសម្រេច ហើយលោករំពឹងថា ក្រុមខ្លួនធ្វើកាន់តែល្អប្រសើរជាងមុននៅវគ្គផ្តាច់ព្រ័ត្រល្ងាចនេះ។
ជាមួយគ្នាខ្សែបម្រើ ច្រឹង ពលរដ្ឋ បានអះអាងថា ពួកគេបានខិតខំហ្វឹកហាត់រួមគ្នាយ៉ាងខ្លាំង និងបានត្រៀមខ្លួនរួចហើយសម្រាប់ការប្រកួតល្ងាចនេះ។ កីឡាកររូបនេះបានបង្ហាញជំនឿចិត្តថា ក្រុមខ្លួននឹងទទួលបានលទ្ធផលល្អនៅថ្ងៃនេះ។
មុនឡើងមកជួបគ្នានៅវគ្គនេះក្រុមទាំងពីរបានទម្លាក់គូប្រកួតដោយបាល់ប៉េណាល់ទីរៀងៗនៅវគ្គពាក់កណ្តាលផ្តាច់ព្រ័ត្រ។ ក្នុងនោះណាហ្គាវើលទម្លាក់ភ្នំពេញ ខណៈវិសាខាទម្លាក់ក្រុមជើងឯកថ្នាក់ខេត្តព្រៃវែង។
មុនការប្រកួតដ៏ជក់ចិត្តខាងលើមកដល់ នៅម៉ោង៣រសៀលថ្ងៃសៅរ៍នេះដែរ ក្រុមភ្នំពេញក្រោន ត្រូវប្រជែងដណ្តើមចំណាត់ថ្នាក់លេខ៣ជាមួយក្រុមព្រៃវែង នាពហុកីឡដ្ឋានជាតិដូចគ្នា។ នេះក៏ជាការប្រកួតមួយដ៏ជក់ចិត្តផងដែរ ដ្បិតក្រុមទាំងពីរសម្បូរដោយយុវជនដូចគ្នា៕