អន្តរជាតិ
អាមេរិក លុបឈ្មោះក្រុមជ្រុលនិយមដែលចិនចាត់ទុកជាក្រុមភេរវកម្ម ពីបញ្ជីអង្គការភេរវកររបស់ខ្លួន
× អាមេរិក នៅថ្ងៃទី៦ ខែវិច្ឆិកា ប្រកាសថា ខ្លួនបានលុបចលនាជ្រុលនិយមមួយឈ្មោះចលនាឥស្លាមតួកេស្ថានខាងកើត (ETIM) ដែលចិនចាត់ទុកជាក្រុមភេរវកម្ម ចេញពីបញ្ជីអង្គការភេរវកម្មរបស់ខ្លួន ដែលការណ៍នេះធ្វើឲ្យចិនខឹងសម្បារយ៉ាងខ្លាំង។ ក្រសួងការបរទេសអាមេរិកអះអាងថា មិនមានព័ស្តុតាងណាបញ្ជាក់ពីការបន្តសកម្មភាពរបស់ ETIM ឡើយ តែចិនប្រាប់ឲ្យអាមេរិកផ្លាស់ប្ដូរការសម្រេចចិត្តនេះវិញជាបន្ទាន់។
ចលនាឥស្លាមតួកេស្ថានខាងកើត ត្រូវបានទីក្រុងប៉េកាំងចាត់ទុកជាអង្គការភេរវកម្មដែលធ្វើសកម្មភាពនៅខេត្តភាគខាងលិចស៊ីនជាំង និងការវាយប្រហារកន្លងមកនៅទឹកដីចិន។ នៅឆ្នាំ២០០៤ រដ្ឋបាលប្រធានាធិបតី ចច ដាប់ប៊លយូ ប៊ូស បានបញ្ចូលចលនានេះទៅក្នុងបញ្ជីអង្គការភេរវកររបស់ខ្លួន នៅពេលដែលអាមេរិកកំពុងធ្វើយុទ្ធនាបោសសម្អាតក្រុមភេរវករនៅអាហ្វហ្គានីស្ថានដែលនៅមិនឆ្ងាយពីស៊ីនជាំង។
ប៉ុន្តែនៅថ្ងៃទី៦ ខែវិច្ឆិកា រដ្ឋបាលប្រធានាធិបតី ដូណាល់ ត្រាំ ក៏ដក ETIM ចេញពីបញ្ជីវិញ។ ក្នុងព្រឹត្តប័ត្រសហព័ន្ធ ដែលជាបណ្ដុំឯកសារច្បាប់របស់អាមេរិក រដ្ឋមន្ត្រីក្រសួងការបរទេសអាមេរិក ម៉ៃ ប៉ុមប៉េអូ និយាយថា លោកដកការចុះឈ្មោះ ETIM ពីបញ្ជីអង្គការភេរវករ។ អ្នកនាំពាក្យក្រសួងការបរទេសអាមេរិកនិយាយថា ETIM ត្រូវដកចេញបញ្ជីព្រោះច្រើនជាងមួយទស្សវត្សរ៍ហើយដែលមិនមានព័ស្តុតាងណាបង្ហាញថា ETIM មានទៀតឡើយ។
ទីក្រុងប៉េកាំង ប្រតិកម្មយ៉ាងខ្លាំងនឹងការសម្រេចចិត្តរបស់អាមេរិក។ ETIM ត្រូវបានទីក្រុងប៉េកាំង ចាត់ទុកជាក្រុមភេរវកម្មដែលទទួលខុសត្រូវលើការវាយប្រហារជាច្រើនលើកដូចជានៅស៊ីនជាំងនៅ២០០៩ និងនៅឃុនមីងនៅឆ្នាំ២០១៤ជាដើម។ ការវាយប្រហារទាំងនេះហើយដែលត្រូវបានរដ្ឋាភិបាលចិនប្រើប្រាស់ដើម្បីយុទ្ធនាការបោសសម្អាតគំនិតជ្រុលនិយម ភេរវនិយម និងការបំបែករដ្ឋដែលធ្វើឲ្យជនភាគតិចវីហ្គ័រជាងមួយលាននាក់ ស្ថិតក្នុងជំរំកែប្រែ។
ក្នុងសន្និសីទសារព័ត៌មានថ្ងៃទី៦ ខែវិច្ឆិកា លោក Wang Wenbin អ្នកនាំពាក្យក្រសួងការបរទេសចិន បានបន្តរៀបរាប់សកម្មភាពរបស់ ETIM ដែលជាប់ឈ្មោះក្នុងបញ្ជីក្រុមភេរវករអន្តរជាតិផងនោះ។ លោក Wang ថា ETIM ចូលរួមក្នុងសកម្មភាពដែលបង្កការគំរាមដល់សន្តិសុខ និងស្ថិរភាពរបស់ចិន និងតំបន់។ ក្នុងន័យនេះ មន្ត្រីក្រសួងការបរទេសចិនរូបនេះបានប្រាប់ឲ្យអាមេរិកកែប្រែការសម្រេចចិត្តរបស់ខ្លួនវិញភា្លម។
«ភេរវកម្ម គឺជាភេរវកម្ម។ អាមេរិក គួរតែផ្លាស់ប្ដូរកំហុសរបស់ខ្លួន មិនត្រូវបិទបាំងអង្គការភេរវកម្ម និងឈប់បង្អាក់កិច្ចសប្រតិបត្តិការអន្តរជាតិប្រឆាំងភេរវកម្មទៀត។» អ្នកនាំពាក្យក្រសួងការបរទេសចិនខាងលើនិយាយបែបនេះ ក្រោយចោទអាមេរិកថា អនុវត្តស្តង់ដាពីរជាន់លើការប្រយុទ្ធប្រឆាំងភេរវកម្ម៕
© រក្សាសិទ្ធិដោយ thmeythmey.com