សាមគ្គីគ្នា និងការពុះពារ នាំឲ្យយុវសិស្សវិទ្យាល័យទួលទំពូង ជាប់ជ័យលាភីលេខ១ ក្នុងកម្មវិធីជជែកដេញដោលយុវជនថ្នាក់ជាតិ២០២០

ជាតិ

សង្គមជាតិ

សាមគ្គីគ្នា និងការពុះពារ នាំឲ្យយុវសិស្សវិទ្យាល័យទួលទំពូង ជាប់ជ័យលាភីលេខ១ ក្នុងកម្មវិធីជជែកដេញដោលយុវជនថ្នាក់ជាតិ២០២០

08, Nov 2020 , 8:29 am

រូបភាព

លោកហង់ជួន ណារ៉ុន រដ្ឋមន្ត្រីអប់រំ យុវជន និងកីឡា ផ្តល់ពានរង្វាន់ដល់ក្រុមយុវសិស្សវិទ្យាល័យទួលទំពូងដែលបានជាប់ជ័យលាភីលេខមួយពីកម្មវិធីជជែកដេញដោលយុវជនថ្នាក់ជាតិ២០២០

ដោយ:

ភ្នំពេញ៖យុវសិស្សថ្នាក់ទី១១មួយក្រុមនៅវិទ្យាល័យទួលទំពូងបានទទួលជ័យលាភីលេខមួយលើគូប្រជែងដែលមកពីវិទ្យាល័យជាស៊ីមសាមគ្គី ក្នុងកម្មវិធីជជែកដេញដោលយុវជនថ្នាក់ជាតិ២០២០វគ្គផ្តាច់ព្រ័ត្រ ដែលរៀបចំឡើងដោយក្រសួងអប់រំ យុវជន និងកីឡា កាលពីថ្ងៃ២៤ ខែតុលា ដែលជជែកលើប្រធានបទស្តីពី«ការបង្កើតសាលារៀនជំនាន់ថ្មីជាយន្តការដ៏មានប្រសិទ្ធភាពក្នុងការអភិវឌ្ឍសមត្ថភាពយុវជននាយុគសម័យបដិវត្តន៍ឧស្សាហកម្ម៤.០»។

សូមតាមដានស្តាប់វីដេអូសម្ភាស រវាងកញ្ញា សៅ សុខអេង អ្នកសារព័ត៌មានថ្មីៗ និងយុវសិស្ស ហេង គីមឡុង ដែលជាសមាជិកក្រុមយុវសិស្សទួលទំពូងដែលទើបតែទទួលបានជ័យលាភីលេខមួយក្នុងកម្មវីធីជជែកដេញដោលយុវជនថ្នាក់ជាតិ២០២០ដូចតទៅ៖

វាមិនមែមនជារឿងងាយស្រួលឡើយ សម្រាប់យុវសិស្សថ្នាក់ទី១១នៅវិទ្យាល័យទួលទំពូង ដែលមានសមាជិកចំនួន៥នាក់ជា«ក្រុមបដិសេធ» យកឈ្នះលើ«ក្រុមស្រប» មកពីវិទ្យាល័យជាស៊ីមសាមគ្គី ជជែកដេញដោលលើប្រធានបទស្តីពី«ការបង្កើតសាលារៀនជំនាន់ថ្មីជាយន្តការដ៏មានប្រសិទ្ធភាពក្នុងការអភិវឌ្ឃសមត្ថភាពយុវជននាយុគសម័យបដិវត្តន៍ឧស្សាហកម្ម៤.០»។
ពួកគេបានឆ្លងកាត់ការប្រកួតឈ្នះចំនួន៣ជុំរួចមកហើយ ជាមួយនឹងក្រុមយុវសិស្សចំនួន៣ក្រុម ក្នុងចំណោមក្រុមទាំង១៦ក្រុមដែលមកពីវិទ្យាល័យទូទាំងប្រទសដែលរៀបចំឡើងដោយក្រសួងអប់រំ តាំងពីខែឧសភា ដល់ខែតុលា ឆ្នាំ២០២០។

ការប្រកួតជជែកដេញដោលជុំដំបូង ក្រុមយុវសិស្សវិទ្យាល័យទួលទំពូងបានប្រកួតយកឈ្នះលើក្រុមស្របយុវសិស្សវិទ្យាល័យព្រែកថ្មីដែលជជែកលើប្រធានបទស្តីពី«ការគោរពច្បាប់ចរាចរណ៍ជាយន្តការដ៏មានប្រសិទ្ធភាពក្នុងការកាត់បន្ថយគ្រោះថ្នាក់ចរាចរណ៍»។ ជុំទី២យកឈ្នះលើក្រុមស្របវិទ្យាល័យចំណេះដឹង និងបច្ចេកទេសហ៊ុនសែនជម្ពូវ័ន លើប្រធានបទ«កម្ពុជាគួរជំរុញការសិក្សាតាមរយៈប្រព័ន្ធអេឡិចត្រូនិកជាជាងការសិក្សាដោយផ្ទាល់នៅក្នុងសាលារៀន»។ រួមទាំងជុំទី៣ យកឈ្នះលើក្រុមបដិសេធវិទ្យាល័យព្រែកលាប លើប្រធានបទ«យុវជនបច្ចុប្បន្នគួរផ្តោតលើការសិក្សាជំនាញវិជ្ជាជីវៈជាជាងផ្តោតទៅលើការសិក្សាជំនាញផ្សេងៗនៅឧត្តមសិក្សា»។

ក្រុមយុវសិស្សវិទ្យាល័យទួលទំពូង ដែលទទួលបានជ័យលាភីលេខមួយពីកម្មវិធីជជែកដេញដោលយុវជនថ្នាក់ជាតិ២០២០ ដែលរៀបចំឡើងដោយក្រសួងអប់រំ យុវជន និងកីឡា

យុវសិស្ស ហេង គីមឡុង ដែលជាសមាជិកក្រុមវិទ្យាល័យទួលទំពូង បានបញ្ជាក់ថា កត្តាដែលក្រុមរបស់ខ្លួនទទួលបានជ័យលាភីនេះ ក៏ដោយសារមានការខិតខំប្រឹងពីសមាជិកក្រុមទាំងមូលដែលចេះរួបរួមសាមគ្គីគ្នា និងការខិតខំប្រឹងប្រែង គឺជាកត្តានាំឲ្យទទួលបានជ័យជម្នះសម្រាប់លើកមុខមាត់វិទ្យាល័យរបស់ខ្លួន។

យុវសិស្ស ហេង គីមឡុង បានប្រាប់ពីគន្លឹះសំខាន់ដែលនាំឲ្យជាប់ជ័យលាភីដូច្នេះថា៖«ចំណុចសំខាន់បំផុតនោះគឺការសាមគ្គីគ្នា គឺពួកខ្ញុំសហការគ្នា ទោះពេលទំនេរ ឬពេលរវល់ក៏ពួកយើងស្វែងរកពេលវេលាមកជួបគ្នាដើម្បីស្វែងរកគំនិតរៀងខ្លួន និងសាមគ្គីគ្នារកគំនិតដ៏ល្អមួយដើម្បីដាក់ចូលសម្រាប់គាំទ្រលើប្រធានបទ ឬបដិសេដលើប្រធានបទ។ ចំណុចសំខាន់នោះគឺ ការស្វែងយល់ប្រធានបទ។

សម្រាប់ការស្វែងយល់ប្រធានបទគឺជាចំណុចសំខាន់មួយ។ បើយើងអត់យល់ពីប្រធានបទ ក៏យើងអត់អាចទៅជជែកដេញដោលបានដែរ ក៏យើងមិនអាចវែកញែករកខុស រកត្រូវបានឡើយ។ យើងក៏ត្រូវស្រាវជ្រាវរកទឡ្ហីករណ៍ និងត្រៀមខ្លួនឲ្យបានរួចរាល់»។

ការប្រកួតជជែកដេញដោលលើប្រធានបទផ្សេងៗក្នុងរយៈពេល៤ខែកន្លងមកនេះ ក្រុមយុវសិស្សវិទ្យាល័យទួលទំពូង គឺទទួលបានបទពិសោធ និងចំណេះដឹងជាច្រើន។ យុវសិស្ស គីមឡុងនិយាយដូច្នេះថា៖«យើងធ្លាប់តែស្គាល់មិត្តភក្តិនៅក្នុងសាលា។ ពេលយើងចេញទៅប្រកួតទៅ គឺយើងស្គាល់មិត្តភក្តិដទៃច្រើន។ ហើយយើងក៏ទទួលបានបទពិសោធន៍ ទោះជាប់ក្តី ឬធ្លាក់ក្តី ក៏យើងទទួលបានបទពិសោធន៍ ពួកគាត់អាចវែកញែករកខុស រកត្រូវ។ ពួកគាត់អាចចេះប្រើប្រាស់វប្បធម៌សន្ទនា អាចនិយាយគ្នារកខុស រកត្រូវដោយសន្តិវិធី។ ហើយយើងក៏ទទួលបានបំណិនស្រាវជ្រាវច្រើនដែលយើងអាចឈ្វេងយល់ពីប្រភព និងចំណេះដឹងផ្សេងៗ»។

យុវសិស្ស ហេង គីមឡុង សមាជិកក្រុមយុវសិស្សវិទ្យាល័យទួលទំពូង

យុវសិស្ស គីមឡុង ចង់ឲ្យក្រសួងអប់រំ យុវជន និងកីឡា និងនៅតាមវិទ្យាល័យនីមួយៗ បន្តរៀបចំ និងបង្កើតឲ្យមានកម្មវិធីជជែកដេញដោលលើប្រធានបទផ្សេងៗ សម្រាប់ពង្រឹងដល់សមត្ថភាពយុវសិស្សឲ្យចេះនិយាយជាសាធារណៈបន្ថែមទៀត។

តាមរយៈបទពិសោធដែលក្រុមយុវសិស្សវិទ្យាល័យទួលទំពូងទទួលបាននេះ យុវសិស្ស គីមឡុង បានណែនាំដល់យុវសិស្សជំនាន់ក្រោយកុំមានភាពភ័យខ្លាចក្នុងការប្រកួតប្រជែងកម្មវិធីជជែកដេញដោលថ្នាក់ជាតិលើប្រធានបទផ្សេងៗ។ «យើងត្រូវដឹងថា ពេលយើងឡើងទៅនិយាយនៅលើឆាក គឺយើងបញ្ចេញនូវអ្វីដែលយើងគិត និងបញ្ចេញនូវអ្វីដែលយើងចង់បង្ហាញ»។ នេះជាការលើកឡើងរបស់យុវសិស្សគីមឡុង៕