ជាតិ
នយោបាយជាតិ
ស្របពេលលោក បៃឌិន ឈ្នះឆ្នោត, លោក កឹម សុខា ថា «អ្នកណាឈ្នះក៏ដោយ ឲ្យតែជាមិត្តល្អនឹងខ្មែរ ហើយជួយខ្មែរ»
×![]()
ដោយ: ធឿន បញ្ញាឬទិ្ធ
ភ្នំពេញ៖ «អ្នកណាឈ្នះក៏ដោយ ឲ្យតែជាមិត្តល្អនឹងខ្មែរ ហើយជួយខ្មែរ»។ លោក កឹម សុខា មេដឹកនាំអតីតគណបក្សសង្គ្រោះជាតិ លើកឡើងបែបនេះ ស្របពេលដែលលោក ចូ បៃឌិន ឈ្នះឆ្នោត ជាប្រធានាធិបតី ទី៤៦ របស់អាមេរិក។
សម្តីលោក កឹម សុខា ហាក់មិនខ្វល់ពីសមាសភាពបុគ្គលណាឡើយ តែសំខាន់ឲ្យតែបុគ្គលនោះ បង្កើតទំនាក់ទំនងល្អ និងមិនធ្វើទុក្ខបុកម្នេញកម្ពុជា។ មេដឹកនាំអតីតគណបក្សសង្គ្រោះជាតិ ដែលតាមដានព្រឹត្តិការណ៍បោះឆ្នោតនៅអាមេរិកនេះ បានបង្ហោះរូបលោក ចូ បៃឌិន និងលោក ដូណាល់ ត្រាំ ក្នុងការជជែកដេញដោលគ្នាកន្លងមក ដោយអមជាមួយសំណេរនៅថ្ងៃទី៨ វិច្ឆិកា ដូច្នេះថា៖«ខ្ញុំតែងតែគាំទ្រ និងអបអរសាទរនូវលទ្ធផលនៃការបោះឆ្នោត ដោយឆន្ទៈប្រជាពលរដ្ឋ និងស្របតាមគោលការណ៍ប្រជាធិបតេយ្យ សេរី ពហុបក្ស ក្នុងពិភពលោក មិនថាឡើយនៅសហរដ្ឋអាមេរិក ឬនៅប្រទេសណាឡើយ ជាពិសេសនៅកម្ពុជាយើង»។
លោក ចូ បៃឌិន (Joe Biden) បានទទួលសំឡេងចំនួន២០បន្ថែមទៀតពីរដ្ឋ Pennsylvania ដែលនាំឲ្យលោកទទួលបានប្រតិភូសរុប២៨៤ ហើយក្លាយជាប្រធានាធិបតីជាប់ឆ្នោតទី ៤៦របស់សហរដ្ឋអាមេរិក។ នេះបើយោងការផ្សាយរបស់ទីភ្នាក់ងារព័ត៌មាន AP។
តាមរយៈគណនី Twitter ផ្លូវការរបស់ខ្លួន លោក បៃឌិន បានប្រកាសជាសាធារណៈថា លោកមានកិត្តិយសដែលត្រូវបានប្រជាជនអាមេរិកជ្រើសរើសឲ្យដឹកនាំប្រទេសក្នុងកាលៈទេសៈនេះ ថ្វីបើផ្លូវសម្រាប់ការដឹកនាំទៅមុខមិនងាយស្រួលក្តី។ លោកបានថ្លែងដូច្នេះ៖ «ការងារចំពោះមុខយើងនឹងលំបាក ប៉ុន្តែខ្ញុំសន្យានឹងអ្នកថា ខ្ញុំនឹងធ្វើជាប្រធានាធិបតីសម្រាប់ប្រជាជនអាមេរិកទាំងអស់គ្នា ទាំងអ្នកបោះឆ្នោត និងអ្នកមិនបោះឆ្នោតឲ្យខ្ញុំ»។
ស្ថិតក្នុងវ័យ ៧៧ ឆ្នាំ លោក បៃឌិន នឹងក្លាយជាប្រធានាធិបតីដែលចាស់ជាងគេក្នុងប្រវត្តិសាស្ត្រអាមេរិកដែរ៕
Tag:
កឹម សុខា
បោះឆ្នោត
© រក្សាសិទ្ធិដោយ thmeythmey.com
«ប្រេសិត»មានន័យដូចម្តេច?
4 ថ្ងៃ
