ជាតិ
លោក ហ៊ុន ម៉ានី៖ ៩វិច្ឆិកា មានន័យថា កម្ពុជាត្រូវការសិទ្ធិសម្រេចជោគវាសនាដោយខ្លួនឯង រូប ភាព ពី ហ្វេសប៊ុក លោក ហ៊ុន ម៉ានី
× ភ្នំពេញ៖ ថ្ងៃទី ៩ វិច្ឆិកា ២០២០ ជាទិវាឯករាជ្យជាតិលើកទី៦៧ របស់កម្ពុជា។ ជាឯករាជ្យភាពរបស់កម្ពុជាដែលកើតចេញពីព្រះរាជបូជនីយកិច្ចរបស់សម្តេចព្រះវររាជបិតា ព្រះនរោត្តម សីហនុ ព្រះបរមរតនកោដ្ឋ។ លោក ហ៊ុន ម៉ានី ប្រធានគណៈកម្មការទី៧ នៃរដ្ឋសភា បានបង្ហោះសារនៅលើទំព័រហ្វេសប៊ុកផ្ទាល់ខ្លួនរបស់លោក ដោយអត្ថាធិប្បាយថា ឯករាជ្យភាព មិនមែនមានន័យត្រឹមតែជាពាក្យពេចន៍ ពំនោល និងការចងចាំប៉ុណ្ណោះទេ។
ទិវាឯករាជ្យជាតិថ្ងៃទី៩ខែវិច្ឆិកា មានន័យធំធេងសម្រាប់លោក ហ៊ុន ម៉ានី ដែលជាអ្នកតំណាងរាស្ត្រ។ មួយថ្ងៃមុនការប្រារព្ធពិធីបុណ្យជាតិមួយនេះ លោកបានសរសេរនៅលើទំព័រហ្វេសប៊ុកផ្ទាល់ខ្លួន បង្ហាញពីការយល់ឃើញរបស់លោកចំពោះថ្ងៃប្រវត្តិសាស្ត្ររបស់កម្ពុជា ដែលទទួលបានឋានៈជារដ្ឋឯករាជ្យ និងអធិបតេយ្យមកវិញពីរដ្ឋាភិបាលអាណាព្យាបាលបារាំង តាមរយៈព្រះរាជបូជនីយកិច្ចរបស់សម្តេចព្រះនរោត្តម សីហនុ ព្រះបរមរតនកោដ្ឋ។
អ្នកតំណាងរាស្ត្រមណ្ឌលកំពង់ស្ពឺរូបនេះ បានលើកឡើងថា ឯករាជ្យភាព ជារបត់ដែលកម្ពុជាអាចដណ្តើមបានមកវិញដោយជោគជ័យនូវសិទ្ធិសម្រេចលើជោគវាសនារបស់ប្រទេសជាតិ ដោយខ្មែរខ្លួនឯង។ លោក ហ៊ុន ម៉ានី បន្តពន្យល់ថា៖ «យើងមិនទទួលយកជាដាច់ខាតចំពោះការជ្រៀតជ្រែកកិច្ចការផ្ទៃក្នុងរបស់កម្ពុជា និងសូមថែរក្សាសិទ្ធិក្នុងការឆ្លើយតបដោយសមាមាត្រ ទាំងសិទ្ធិការពារខ្លួនក្នុងនាមជាប្រទេសអធិបតេយ្យ»។
ដោយសារសរសេរសារអបអរទិវាបុណ្យឯករាជ្យជាតិ នៅក្នុងសម័យនៃព្រះរាជាណាចក្រកម្ពុជាទី២ ពោលគឺក្រោយពីការដួលរលំនៃរបបប្រល័យពូជសាសន៍ និងការទទួលបាននូវសន្តិភាពពេញលេញចាប់ពីចុងឆ្នាំ១៩៩៨នោះមក លោក ហ៊ុន ម៉ានី ក៏មិនបានភ្លេចរំឭកអំពីការជួយជ្រោមជ្រែងពីប្រទេសជាមិត្ត និងដៃគូអភិវឌ្ឍនានាផងដែរក្នុងរយៈពេល៤០ឆ្នាំចុងក្រោយនេះ។ ប៉ុន្តែថា សម្រាប់លោក ហ៊ុន ម៉ានី ការប្រឹងប្រែងរបស់កម្ពុជាខ្លួនឯង នៅតែជាចលករដ៏ចាំបាច់ ដើម្បីកម្ពុជាខ្លួនឯង។ អ្នកតំណាងរាស្ត្រមណ្ឌលខេត្តកំពង់ស្ពឺ បានអធិប្បាយដូច្នេះថា៖ «ក្នុងនាមជាកូនខ្មែរ យើងត្រូវចាំថា យើងត្រូវចេះជួយខ្លួនឯង ខំប្រឹងដោយខ្លួនឯង សម្រេចជោគជ័យដោយខ្លួនឯងផ្អែកលើស្មារតី ជឿថាខ្មែរធ្វើបាន។ យើងសម្រេចបានច្រើនណាស់សម្រាប់ប្រទេសជាតិ និងប្រជាជនក្នុងរយៈពេលជាង៤០ចុងក្រោយ និងជាពិសេស រយៈពេល២០ឆ្នាំក្រោយនយោបាយឈ្នះ ឈ្នះ។ ប៉ុន្តែការងារដែលត្រូវបំពេញសម្រាប់អនាគតកម្ពុជា ដូចចែងក្នុងទស្សន: 3C នៅមានច្រើនទៀតដើម្បីសម្រេចបានចក្ខុវិស័យ២០៥០»។
នៅពេលដែលលោក ហ៊ុន ម៉ានី កំពុងរំឭកអំពីថ្ងៃប្រវត្តិសាស្ត្ររបស់កម្ពុជា គឺអ្នកតំណារាស្ត្ររូបនេះចង់បញ្ជាក់ថា ឯករាជ្យភាពនោះហើយដែលជាមូលដ្ឋានមួយនៃសន្តិភាពសម្រាប់កម្ពុជា។ កម្ពុជា ដែលសម្រាប់លោក គឺធ្លាប់ជាប្រទេសឆ្លងកាត់សង្គ្រាមរ៉ាំរ៉ៃ និងការបែកបាក់ផ្ទៃក្នុង ហើយក៏កំពុងត្រូវបានអភិវឌ្ឍជាបន្តបន្ទាប់រហូតដល់សព្វថ្ងៃនេះ៕
Tag:
ឯករាជ្យ
ហ៊ុន ម៉ានី
© រក្សាសិទ្ធិដោយ thmeythmey.com