អាមេរិក អបអរកម្ពុជា ក្នុងខួបឯករាជ្យលើកទី៦៧ និងបង្ហាញបំណងជួយកម្ពុជាឱ្យកាន់តែមានប្រជាធិបតេយ្យ និងឯករាជ្យ

ជាតិ

អាមេរិក អបអរកម្ពុជា ក្នុងខួបឯករាជ្យលើកទី៦៧ និងបង្ហាញបំណងជួយកម្ពុជាឱ្យកាន់តែមានប្រជាធិបតេយ្យ និងឯករាជ្យ

08, Nov 2020 , 4:43 pm

រូបភាព

លោក Mike Pompeo រដ្ឋមន្ត្រីការបរទេសសហរដ្ឋអាមេរិក

ដោយ: ធឿន បញ្ញាឬទិ្ធ

ភ្នំពេញ៖ កម្ពុជា ប្រារព្ធខួបឯករាជ្យ ៦៧ឆ្នាំ ដែលទទួលបានពីបារាំង (៩ វិច្ឆិកា ១៩៥៣ -៩ វិច្ឆិកា ២០២០)។ អាមេរិក ចូលរួមអបអរសាទរកម្ពុជា និងបង្ហាញពីបំណងពង្រឹងទំនាក់ទំនងទ្វេភាគី។

រដ្ឋមន្ត្រីការបរទេសសហរដ្ឋអាមេរិកលោក Mike Pompeo បានចេញសេចក្តីថ្លែងការណ៍ កាលពីថ្ងៃទី៦ វិច្ឆិកា ដូច្នេះថា «ក្នុងនាមរដ្ឋាភិបាល និងប្រជាជនអាមេរិក ខ្ញុំសាទរចំពោះប្រជាជនកម្ពុជា នៃខួបឯករាជ្យលើកទី៦៧។ យើងមានកិត្តិយសដែលប្រឈមមុខនឹងបញ្ហារួមគ្នា ក្នុងនាមជាដៃគូជាមួយកម្ពុជា ដើម្បីជួយគាំទ្រសុខាមាលភាព សុវត្ថិភាព និងវិបុលភាពនៃប្រទេសជាតិយើងទាំងពីរ។ យើងទន្ទឹងរង់ចាំការឈានទៅមុខបន្ថែមទៀត នៃចំណងការទូតកម្ពុជា-អាមេរិក ដើម្បីជួយកសាងកម្ពុជា ឱ្យកាន់តែមានវិបុលភាព ប្រជាធិបតេយ្យ និងឯករាជ្យកម្ពុជា»។

កម្ពុជា ប្រារព្ធបុណ្យឯករាជ្យជាតិលើកទី៦៧ និងខួបលើកទី៦៧ នៃការបង្កើតកងយោធពលខេមរភូមិន្ទ ត្រូវបានរៀបចំឡើងជារៀងរាល់ឆ្នាំ ដើម្បីរំលឹកដល់ព្រះរាជបេសកកម្មដើម្បីជាតិមាតុភូមិ និងប្រជារាស្ត្រខ្មែរ របស់សម្តេចព្រះវររាជបិតា សម្តេចព្រះនរោត្តម សីហនុ ព្រះបរមរតនកោដ្ឋ ក្នុងការទាមទារឯករាជ្យពីអាណាព្យាបាលបារាំង។

គួរបញ្ជាក់ថា ចំណងការទូតកម្ពុជា-អាមេរិក មានរយៈពេល៧០ឆ្នាំមកហើយ បើគិតចាប់ពីឆ្នាំ១៩៥០មក។ ទំនាក់ទំនងទ្វេភាគីទាំងពីរ រយៈពេលចុងក្រោយនេះ មិនសូវជាល្អឡើយ ដោយសារអាមេរិកតែងតែចេញមុខរិះគន់កម្ពុជា លើបញ្ហាសិទ្ធិមនុស្ស និងនយោបាយ៕