ជាតិ
បណ្ដារាជធានី-ខេត្តមួយចំនួន នឹងមានភ្លៀងធ្លាក់ចាប់ពីថ្ងៃទី ១០-១២ វិច្ឆិកា
× ភ្នំពេញ៖ ក្រសួងធនធានទឹក និងឧតុនិយម បានចេញប្រកាសព័ត៌មានស្ដីពីស្ថានភាពអាកាសធាតុនៅថ្ងៃទី ៨ វិច្ឆិកា ដោយបញ្ជាក់ថា វិសម្ពាធ កំពុងស្ថិតនៅក្នុងសមុទ្រចិនខាងត្បូង ហើយនឹងធ្វើដំណើរឆ្ពោះមកទិសបស្ចឹម ដោយបង្កើនឥទ្ធិពលទៅជាកូនព្យុះទី២១ អេតូ នៅថ្ងៃទី ១០ វិច្ឆិកា។ បើតាមក្រសួងធនធានទឹក ស្ថានភាពបែបនេះ នឹងធ្វើឲ្យរាជធានី-ខេត្តមួយចំនួន មានភ្លៀងធ្លាក់ចាប់ពីថ្ងៃទី ១០-១២ វិច្ឆិកា។
ចាប់ពីថ្ងៃទី ១០-១២ វិច្ឆិកា បណ្ដារាជធានី-ខេត្តនៅតំបន់ខ្ពង់រាប ភាគឦសាន ខេត្តភាគខាងកើតជាប់ព្រំដែនប្រទេសវៀតណាម និងខេត្តភាគខាងត្បូង នឹងអាចមានភ្លៀងខ្យល់ក្នុងកម្រិតពីបង្គួរទៅច្រើន។ ក្រសួងធនធានទឹក បន្ថែមថា បណ្ដាខេត្តនៅតំបន់មាត់សមុទ្រ នឹងអាចមានភ្លៀងខ្យល់ក្នុងកម្រិត ពីតិចទៅបង្គួរ និងរលកសមុទ្រមានកម្ពស់មធ្យម។
ផ្អែកលើស្ថានភាពអាកាសធាតុខាងលើ ក្រសួងធនធានទឹក អំពាវនាវដល់ប្រជាពលរដ្ឋតាមដានព័ត៌មានអាកាសធាតុ ពិសេសប្រជានេសាទ និងអ្នកធ្វើដំណើរតាមសមុទ្រទាំងអស់ បង្កើនការយកចិត្តទុកដាក់ប្រុងប្រយ័ត្នខ្ពស់ ដើម្បីចៀសវាងគ្រោះថ្នាក់ ដោយយថាហេតុ៕
© រក្សាសិទ្ធិដោយ thmeythmey.com