កីឡាជាតិ
ជាតិ
អង្គរក្សដែលឆ្លងកូវីដ-១៩ បានទាក់ទងផ្ទាល់ និងប្រយោលជាមួយមនុស្ស៧រូបក្នុងវិស័យកីឡា
× លោក ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាអះអាងថា អង្គរក្សកម្ពុជា១រូប ដែលឆ្លងជំងឺកូវីដ-១៩ បានទាក់ទងការងារដោយផ្ទាល់ និងប្រយោលជាមួយមនុស្ស៧រូបក្នុងវិស័យកីឡា។ បញ្ហានេះ ធ្វើឲ្យក្រសួង សម្រេចផ្អាកការលេងកីឡា និងហាត់ប្រាណលក្ខណៈជួបជុំ និងបិទការចេញចូលពហុកីឡដ្ឋានជាតិជាបណ្តោះអាសន្ន។
ក្រសួងអប់រំយុវជននិងកីឡានៅថ្ងៃទី៨ ខែវិច្ឆិកា ឆ្នាំ២០២០ នេះ បានចេញសេចក្តីប្រកាសព័ត៌មានមួយ ដោយសម្រេចផ្អាកគ្រប់សកម្មភាពនៃការលេងកីឡា និងហាត់ប្រាណនៅតាមទីសាធារណៈ និងបិទមិនឲ្យមានការចេញចូលពហុកីឡដ្ឋានជាតិបណ្តោះអាសន្ន។ ការផ្អាកនេះ ធ្វើឡើងក្រោយក្រសួងរកឃើញថា អង្គរក្សដែលឆ្លងជំងឺកូវីដ-១៩បានទាក់ទងការងារផ្ទាល់ និងប្រយោលជាមួយមនុស្ស៧រូប ដែលធ្វើការក្នុងវិស័យកីឡា។
សេចក្តីប្រកាសព័ត៌មាន ដែលចុះហត្ថលេខាដោយលោក ហង់ជួន ណារ៉ុន រដ្ឋមន្ត្រីក្រសួងអប់រំយុវជននិងកីឡាបានបញ្ចាក់យ៉ាងដូច្នេះថា៖«អង្គរក្ស១រូបដែលឆ្លងជំងឺកូវីដ-១៩ និងជាគ្រូបង្វឹក បានមកបង្ហាត់កីឡាករ២នាក់នៅក្នុងបរិវេណពហុកីឡដ្ឋានជាតិអូឡាំពិក និងបានទាក់ទងការងារផ្ទាល់ និងដោយប្រយោលជាមួយបុគ្គលិក៥រូប នៃមជ្ឈមណ្ឌលជាតិហ្វឹកហ្វឺនកីឡា»។
បច្ចុប្បន្នអង្គរក្សដែលផ្ទុកជំងឺកូវីដ-១៩ កំពុងធ្វើចត្តាឡីស័ក និងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។ ចំណែកបុគ្គលិក៥ និងកីឡាករ២ ត្រូវបានធ្វើតេស្តរកជំងឺកូវីដ-១៩ និងកំពុងធ្វើចត្តាឡីស័ក។ ក្រសួងកំពុងបន្តស្វែងរកអ្នកជាប់ពាក់ព័ន្ធជាមួយបុគ្គលិក និងកីឡាករទាំង៧រូប។
គួររំលឹកថា អង្គរក្សខាងលើបានឆ្លងជំងឺកូវីដ-១៩ ពេលលោកធ្វើជាអង្គរក្សរបស់លោក Peter Szijjarto រដ្ឋមន្ត្រីការបរទេសហុងគ្រី ដែលបានមកបំពេញទស្សនកិច្ចនៅកម្ពុជាកាលពីថ្ងៃទី៣ ខែវិច្ឆិកា ឆ្នាំ២០២០។ រដ្ឋមន្ត្រីការបរទេសរូបនេះ ត្រូវបានរកឃើញមានផ្ទុកជំងឺកូវីដ-១៩ នៅថ្ងៃទី៤ ខែវិច្ឆិកា ឆ្នាំ២០២០ នៅប្រទេសថៃ។
ភ្លាមៗនោះ សម្តេចនាយករដ្ឋមន្ត្រី ហ៊ុន សែន បានចេញសេចក្តីប្រកាសព័ត៌មានបន្ទាន់មួយ ដោយតម្រូវឲ្យរដ្ឋមន្ត្រី និងមន្ត្រីទាំងអស់ ដែលបានប៉ះពាល់ផ្ទាល់ និងប្រយោលធ្វើតេស្តរកជំងឺកូវីដ-១៩ និងធ្វើចត្តាឡីស័កចំនួន១៤ថ្ងៃ។ សម្តេច ហ៊ុន សែន ក៏ស្ថិតក្នុងចំណោមបុគ្គលទាំងនោះដែរ៕
Tag:
កូវីដ-១៩
អង្គរក្ស
ហង់ជួន ណារ៉ុន
ពហុកីឡដ្ឋានជាតិ
© រក្សាសិទ្ធិដោយ thmeythmey.com