សង្គមអន្តរជាតិ
អន្តរជាតិ
បោះឆ្នោតមីយ៉ាន់ម៉ា៖ លោកស្រី ស៊ូជី រក្សាតំណែងសមាជិកសភា ខណៈបក្ស NLD កំពុងនាំមុខ
×![]()
ដោយ: ធៀន ភារិន្ទ
មេដឹកនាំមីយ៉ាន់ម៉ា អ៊ុងសាន ស៊ូជី រក្សាតំណែងសមាជិកសភារបស់ខ្លួនដដែលក្នុងការបោះឆ្នោតទូទៅថ្ងៃទី៨ ខែវិច្ឆិកា។ នេះបើតាមលទ្ធផលដែលចេញដោយប្រព័ន្ធផ្សព្វផ្សាយមីយ៉ាន់ម៉ា។ សន្លឹកឆ្នោត កំពុងត្រូវបានរាប់ដោយគណៈកម្មការរៀបចំការឆ្នោតសហព័ន្ធមីយ៉ាន់ម៉ា ហើយលទ្ធផលបឋមបង្ហាញថា បក្សសម្ព័ន្ធជាតិដើម្បីប្រជាធិបតេយ្យ (NLD) កំពុងនាំមុខ។
ការបោះឆ្នោតថ្នាក់ជាតិមីយ៉ាន់ម៉ា ដែលបានរៀបចំឡើងនៅថ្ងៃទី៨ ខែវិច្ឆិកា បានបញ្ចប់ហើយ។ កិច្ចការបន្ទាប់ គឺការរាប់សន្លឹកឆ្នោត។ ពេលនេះ បក្សកាន់អំណាចសម្ព័ន្ធជាតិដើម្បីប្រជាធិបតេយ្យ កំពុងមានសំឡេងឆ្នោតគាំទ្រនាំមុខបក្សដទៃ និងកាន់កាប់កៅអីសភាជាបណ្តើរៗ។
តាមការចុះផ្សាយរបស់សារព័ត៌មាន The Irrawaddy បក្សកាន់អំណាចលោកស្រីអ៊ុងសាន ស៊ូជី បានកាន់កាប់កៅអីសភាជាន់ទាប២៥ លើ៣១៥កៅអី, សភាជាន់ខ្ពស់បានចំនួន ១ ក្នុងចំណោម ១៦១កៅអី, សភារដ្ឋ និងតំបន់បាន៤៥ ក្នុងចំណោម ៦១៥កៅអី ខណៈពេលកៅអីរដ្ឋមន្ត្រីទទួលបន្ទុកជាន់ជាតិភាគតិច មិនទាន់មានទិន្នន័យ។ ទិន្នន័យនេះ គិតត្រឹមម៉ោង១រសៀល នៅថ្ងៃទី៩ ខែវិច្ឆិកា។
ជាមួយគ្នានេះ លោកស្រីអ៊ុងសាន ស៊ូជី បានអង្គុយនៅសភាជាន់ទាបរួចហើយ បន្ទាប់ពីទទួលបានសំឡេងភាគច្រើននៅក្នុងមណ្ឌលក្រុង Kawhmu នៃទីក្រុងយ៉ាំងហ្គោន ដែលលោកស្រី ស៊ូជី ធ្វើជាតំណាងរាស្ត្រនៅទីនោះ។ ក្រុងនេះ បក្សសម្ព័ន្ធជាតិដើម្បីប្រជាធិបតេយ្យក៏ធ្លាប់ឈ្នះនៅក្នុងឆ្នាំ២០១២ និង២០១៥ផងដែរ។ ចំណែកក្រុងផ្សេងទៀត ក្នុងទីក្រុងយ៉ាំងហ្គោន ក៏ត្រូវបាននាំមុខដោយបក្សកាន់អំណាចរបស់លោកស្រីស៊ូជីផងដែរ។
ក្រៅពីលោកស្រី ស៊ូជី សមាជិកបក្ស NLD ផ្សេងទៀតក៏បានជាប់ឆ្នោតសារជាថ្មីផងដែរ ក្នុងនោះមានដូចជា លោក Hkyet Aung ប្រធានរដ្ឋមន្ត្រីប្រចាំរដ្ឋ Kachin និងអនុប្រធានសភាជាន់ខ្ពស់មីយ៉ាន់ម៉ា លោក Mahn Win Khine Than ជាដើម។
ដោយឡែកនៅក្នុងរដ្ឋរ៉ាក់ឃីនវិញ បក្សជាតិ Arakan បានយកជ័យជម្នះលើកៅអីសភាក្នុងក្រុង Gwa ។ បក្សជាតិ Arakan ជាបក្សនយោបាយដ៏សំខាន់មួយនៅក្នុងរដ្ឋរ៉ាក់ឃីន ព្រោះនៅក្នុងឆ្នាំ២០១៥ បក្សនេះ បានគ្រប់គ្រងកៅអីសភាជាន់ទាប និងជាន់ខ្ពស់ភាគច្រើនរបស់រដ្ឋរ៉ាក់ឃីន។ គណៈកម្មការរៀបចំការបោះឆ្នោតមីយ៉ាន់ម៉ា បានលុបចោលមណ្ឌលបោះឆ្នោតចំនួន ៩ ក្នុងចំណោម ១៧ មិនឲ្យរៀបចំការបោះឆ្នោត ដោយផ្អែកលើបញ្ហាសន្តិសុខនៅក្នុងតំបន់។
សូមបញ្ជាក់ថា នៅក្នុងការបោះឆ្នោតឆ្នាំ២០២០នេះ ប្រជាជនមីយ៉ាន់ម៉ា បានចេញមកបោះឆ្នោតជាច្រើន ស្របពេល COVID-19 កំពុងអុកឡុកនៅក្នុងប្រទេស។ ការចេញមកបោះឆ្នោតដ៏ច្រើនបែបនេះ បានធ្វើឲ្យមានបញ្ហាមួយចំនួន ដូចជាប្រជាជនមិនគោរពវិធានរក្សាគម្លាត ឬពាក់ម៉ាស់ឲ្យបានត្រឹមត្រូវ មណ្ឌលបោះឆ្នោតខ្លះបើកទ្វារយឺតពេល ដែលធ្វើឲ្យមានប្រជាជនឈរចាំច្រើន និងបញ្ហាមួយចំនួនទៀត៕
Tag:
មីយ៉ាន់ម៉ា
អ៊ុងសាន ស៊ូជី
© រក្សាសិទ្ធិដោយ thmeythmey.com
