ការប្រកួតកីឡាប៉េតង់ដណ្តើមពានរង្វាន់«គរុគុណ»ធ្វើឡើងមិនត្រឹមតែដើម្បីរំលឹកនិងតបស្នងសងគុណអ្នកផ្តួចផ្តើម ឬស្ថាបនិកនោះទេ តែវាជាការរួមចំណែកក្នុងការអភិវឌ្ឍសមត្ថភាពកីឡាករ ដើម្បីត្រៀមប្រជែងក្នុងការប្រកួតនានា ពិសេសការប្រកួតកីឡាស៊ីហ្គេមឆ្នាំ២០២៣។ នេះជាការលើកឡើងរបស់សម្តេចឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ។
ជាការប្រកួតដើម្បីរំលឹកគុណដល់អ្នកផ្តួចផ្តើមបង្កើតសហព័ន្ធកីឡាប៊ូល និងប៉េតង់កម្ពុជា និងផ្តល់ឱកាសឲ្យកីឡាករកីឡាការិនីបានបង្ហាញសមត្ថភាពក៏ពិតមែន តែពាន«គរុគុណ»ក៏ជាកត្តារួមចំណែកមួយក្នុងការអភិវឌ្ឍវិស័យកីឡាប៉េតង់នៅកម្ពុជាផងដែរ។ បន្ថែមលើនេះ វាជាចលករមួយក្នុងការវាស់ស្ទង់ និងជួយពង្រឹងសមត្ថភាពកីឡាករកីឡាការិនី សម្រាប់ត្រៀមការប្រកួតអន្តរជាតិផ្សេងៗ។
«នេះជាការប្រកួតមួយដ៏សំខាន់ មិនត្រឹមតែដើម្បីរំលឹកដល់អ្នក ដែលបានផ្តួចផ្តើមនោះទេ តែជាការហ្វឹកហាត់ដើម្បីពង្រឹងសមត្ថភាពរបស់យើង សម្រាប់ត្រៀមការប្រកួតនានានៅពេលខាងមុខ ជាពិសេសការប្រកួតកីឡាស៊ីហ្គេមឆ្នាំ២០២៣ នៅព្រះរាជាណាចក្រកម្ពុជារបស់យើង»។ សម្តេចឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃថ្លែងដូចនេះ ពេលសម្តេចធ្វើជាអធិបតីក្នុងពិធីបិទការប្រកួតកីឡាប៉េតង់ដណ្តើមពានរង្វាន់«គរុគុណ»នៅថ្ងៃទី៨ វិច្ឆិកា នាទីលានប៉េតង់ក្នុងពហុកីឡដ្ឋានជាតិ។
ក្នុងឱកាសនោះ សម្តេច ក៏បានរំលឹកពីប្រវត្តិនៃការកកើតសហព័ន្ធកីឡាប៊ូល និងប៉េតង់កម្ពុជាផងដែរ។ សម្តេច អះអាងថា អ្នកផ្តួចផ្តើមបង្កើតសហព័ន្ធ មិនមែនមានតែសម្តេច និងសម្តេច សុខ អាន នោះទេ ពោលគឺមានសម្តេច ហេង សំរិន លោក ព្រហ្ម ឌិន, លោក សោម ចិន និងឥស្សរជនជាច្រើនរូបទៀត។
សម្តេចឧបនាយករដ្ឋមន្ត្រីបានលើកឡើងពីគុណសម្បត្តិរបស់កីឡាប៉េតង់យ៉ាងដូច្នេះថា៖«ពិតមែនថា ប៉េតង់ជាកីឡាមួយ ដែលស្រាល មិនធ្ងន់ដូចបាល់ទាត់ ឬកីឡាដទៃៗទៀត។ ប៉ុន្តែវាក៏ជាប្រភេទកីឡាមួយ ដែលមានលក្ខណ ដែលអាចជួយក្នុងការថែទាំសុខភាព ហើយជួយដល់ការរំងាប់អារម្មណ៍របស់យើង។ ទោះបីទីលានវាតូចហើយខ្លីក៏ពិតមែន តែដើរឲ្យច្រើនទៅ វាក៏ជួយហាត់ប្រាណដែរ»។
លោក សុខ សប្បាយណា អគ្គលេខាធិការនៃសហព័ន្ធកីឡាប៊ូល និងប៉េតង់កម្ពុជាបានឲ្យនិយមន័យនៃពាក្យ«គរុគុណ»ថា ជាគុណដ៏ធំធេង ដែលយើងគួរតបស្នងខានពុំបាន។ ជាមួយគ្នានេះ លោក បានបង្ហាញពីគោលបំណងនៃការរៀបចំការប្រកួតកីឡាប៉េតង់ដណ្តើមពានរង្វាន់«គរុគុណ»ថា គឺដើម្បីរំលឹក និងតបស្នងគុណូបការរបស់សម្តេច ស ខេង និងសម្តេច សុខ អាន និងថ្នាក់ដឹកនាំដទៃទៀត ដែលបានផ្តួចផ្តើម និងបង្កើតសហព័ន្ធកីឡាប៊ូល និងប៉េតង់កម្ពុជានៅឆ្នាំ១៩៩២។
អគ្គលេខាធិការរូបនេះ បន្ថែមថា តាំងពីកកើតមកដល់បច្ចុប្បន្នសហព័ន្ធដណ្តើមបានមេដាយលើឆាកអន្តរជាតិសរុបចំនួន៣០៦មេដាយ ក្នុងនោះមាស៨៨ ប្រាក់១០៨ និងសំរឹទ្ធ១១០។ តាមរយៈសមិទ្ធផលដ៏ត្រចះត្រចង់នេះ រួមជាមួយការគ្រងជើងឯកពិភពលោក៤ជំនាន់ជាប់គ្នារបស់លោកស្រី កែ ឡេង ជួយឲ្យពិភពលោកឲ្យតម្លៃថា កម្ពុជាជាប្រទេសមហាអំណាចលើប្រភេទកីឡាប៉េតង់។ នេះបើតាមការលើកឡើងរបស់លោក សុខ សប្បាយណា។
ការប្រកួតកីឡាប៉េតង់ដណ្តើមពានគរុគុណលើកទី១មានក្លិបសមាគមចំនួន៥៨មកពី១៦រាជធានីខេត្តចូលរួម និងមានកីឡាករកីឡាការិនីចូលរួមសរុបចំនួន៤៩៤ ដោយពួកគេប្រកួតប្រជែងគ្នាលើ៨វិញ្ញាសា។ ការប្រកួតប្រព្រឹត្តទៅចន្លោះពីថ្ងៃទី៦-៨ វិច្ឆិកា ឆ្នាំ២០២០ នៅទីលានប៉េតង់ក្នុងពហុកីឡដ្ឋានជាតិ៕