រថយន្ត
អន្តរជាតិ
UNEP៖ ប្រទេសក្រីក្រក្លាយជាកន្លែងបោះចោលរថយន្តដែលប្រើប្រាស់រួច
× រថយន្តដឹកទំនិញ និងរថយន្តក្រុងតូចៗដែលប្រើប្រាស់រួចប្រមាណ១៤លានគ្រឿងត្រូវបាននាំចេញទៅកាន់ពិភពលោក ចន្លោះពីឆ្នាំ២០១៥ ដល់ឆ្នាំ២០១៨។ នេះបើតាមរបាយការណ៍របស់កម្មវិធីបរិស្ថានរបស់អង្គការសហប្រជាជាតិ (UNEP) ដោយបញ្ជាក់ថា ៨០ភាគរយ ត្រូវបាននាំចេញទៅកាន់ប្រទេសដែលមានប្រាក់ចំណូលទាបនិងមធ្យម។
អឺរ៉ុប សហរដ្ឋអាមេរិក និងជប៉ុន បានប្រឹងប្រែងទប់ស្កាត់ការបំពុលខ្យល់ និងបម្រែបម្រួលអាកាសធាតិនៅក្នុងប្រទេសរៀងៗខ្លួន ហើយបានបញ្ចេញរថយន្តមួយទឹករាប់លានគ្រឿងទៅកាន់ប្រទេសកំពុងអភិវឌ្ឍន៍ ជាពិសេសបណ្តាប្រទេសនៅទ្វីបអាហ្វ្រិក។
VOA បានដកស្រង់របាយការណ៍ទីភ្នាក់ងារថាមពលអន្តរជាតិដែលបង្ហាញថា រថយន្តដឹកទំនិញធុនស្រាលចំនួន ១,១ ពាន់លានគ្រឿងនៅទូទាំងពិភពលោកនាពេលសព្វថ្ងៃនេះ ត្រូវបានគេរំពឹងថា នឹងកើនទ្វេដងនៅត្រឹមឆ្នាំ២០៥០។ បើតាមអ្នកស្រី Inger Andersen ភាគច្រើននៃកំណើននេះគឺដោយសារតែការនាំចូលរថយន្តប្រើរួចរបស់បណ្តាប្រទេសកំពុងអភិវឌ្ឍន៍។
នាយិកាប្រតិបត្តិអង្គការ UNEP រូបនេះ បានកត់សម្គាល់ថា៖ «ប្រទេសកំពុងអភិវឌ្ឍន៍ជាពិសេសប្រទេសអាហ្វ្រិក នឹងដើរតួជាកន្លែងបោះចោលរថយន្តដែលតែងត្រូវបានគេចាត់ទុកថា លែងមានសុវត្ថិភាពគ្រប់គ្រាន់ឬស្អាត សម្រាប់ប្រទេសអភិវឌ្ឍន៍»។
UNEP រកឃើញថា រថយន្តមួយទឹកដែលត្រូវបាននាំចេញទៅប្រទេសកំពុងអភិវឌ្ឍន៍ជាទូទៅមិនមានសុវត្ថិភាព និងជាមូលហេតុនៃការបង្កឱ្យមានគ្រោះថ្នាក់ចរាចរណ៍ដ៏ច្រើន។ អង្គការសុខភាពពិភពលោក (WHO) បានចាត់ទុកតំបន់អនុសាហារ៉ានៅអាហ្វ្រិក ថាជាទីក្រុងដែលមានការស្លាប់ដោយសារគ្រោះថ្នាក់ចរាចរណ៍ច្រើនបំផុតក្នុងពិភពលោក។
បើតាម អ្នកស្រី Andersen អង្គការ UNEP មិនអំពាវនាវឲ្យហាមឃាត់ទាំងស្រុងលើការនាំចេញរថយន្តមួយទឹកទៅកាន់ប្រទេសកំពុងអភិវឌ្ឍន៍នោះទេ ប៉ុន្តែអ្នកស្រីលើកឡើងថា ទីផ្សារគួរតែមានបទប្បញ្ញត្តិគ្រប់គ្រងទាំងនៅក្នុងប្រទេសអភិវឌ្ឍន៍ និងប្រទេសកំពុងអភិវឌ្ឍន៍៕
© រក្សាសិទ្ធិដោយ thmeythmey.com