អន្តរជាតិ
ប្រមុខ WHO ៖ ពិភពលោកប្រហែលធុញកូវីដ-១៩ តែវាអត់ហត់នឹងយើងទេ អគ្គនាយកអង្គការសុខភាពពិភពលោក Tedros Adhanom Ghebreyesus ថ្លែងអំឡុងសន្និសីទព័ត៌មានមួយកាលពីពេលកន្លងទៅ ។ រូបភាព៖ AP
× អគ្គនាយកអង្គការសុខភាពពិភពលោក (WHO) លោក Tedros Adhanom Ghebreyesus នៅថ្ងៃទី ៩ ខែវិច្ឆិកា បានទទូចឲ្យមនុស្សគ្រប់គ្នាបន្តប្រយុទ្ធប្រឆាំងជំងឺកូវីដ-១៩ ដោយព្រមានថា ខណៈពិភពលោកប្រហែលធុញទ្រាន់នឹងវា វីរុសនេះមិននឿយហត់នឹងពិភពលោកទេ។ ទុករឿងកូវីដ-១៩មួយឡែក លោក Tedros ក៏ឆ្លៀតសាទរជ័យជម្នះរបស់លោក ចូ បៃឌិន ផងដែរ។
«យើងប្រហែលជាហត់នឿយនឹងកូវីដ-១៩។ ក៏ប៉ុន្តែវាអត់ធុញទ្រាន់នឹងយើងឡើយ»។ លោក Tedros បញ្ជាក់បែបនេះក្នុងមហាសន្និបាតប្រចាំឆ្នាំរបស់WHO មុននឹងបន្ថែមថា វាសំខាន់សម្រាប់មនុស្សរាល់គ្នាស្ដាប់តាមវិទ្យាសាស្ត្រ ហើយកុំមើលស្រាលវីរុសនេះ។
ពីកន្លែងធ្វើចត្តាឡីស័កក្រោយប៉ះពាល់ជាមួយអ្នកឆ្លងកូវីដ-១៩ ប្រមុខWHOរូបនេះ ព្រមានថា វីរុសនេះធ្វើទុក្ខខ្លាំងលើអ្នកដែលមានសុខភាពខ្សោយ តែវាក៏ប្រមាញ់លើភាពខ្សោយផ្សេងទៀតផងដែរ ដូចជា ការមិនព្រមទទួលស្គាល់ពិតជុំវិញភាពធ្ងន់ធ្ងរនៃជំងឺនេះ ក៏ដូចជាការធ្វេសប្រហែស ជាដើម។
តាមការចុះផ្សាយរបស់ទីភ្នាក់ងារព័ត៌មាន AFP លោក Tedros អះអាងថា ពិភពលោក មិនអាចចរចាជាមួយជំងឺកូវីដ-១៩ ហើយក៏មិនអាចអត់បិទភ្នែកដោយសង្ឃឹមថាជំងឺនេះរលាយសាបសូន្យខ្លួនឯងឡើយ។ «ក្តីសង្ឃឹមតែមួយគត់របស់យើង គឺ វិទ្យាសាស្ត្រ ដំណោះស្រាយ និងសាមគ្គីភាព»។ លោកសង្កត់ធ្ងន់បែបនេះ។
ការព្រមានរបស់លោក Tedros ធ្វើឡើងក្រោយជំងឺកូវីដ-១៩បានសម្លាប់មនុស្សជាង១,២៥លាននាក់ហើយ និងចម្លងមនុស្សជាង៥០លាននាក់នៅទូទាំងពិភពលោក ចាប់តាំងពីវាផ្ទុះរាលដាលដំបូងក្នុងប្រទេសចិន កាលពីចុងឆ្នាំ២០១៩មក។
ជាមួយគ្នានេះ លោកអគ្គនាយក Tedros ក៏បានព្រមានទៀតថា ជំងឺរាតត្បាតសកលនេះ បានលាតត្រដាងភាពចាំបាច់សម្រាប់ពិភពលោកស្ដារឡើងវិញនូវស្មារតីនៃគោលបំណងរួម ដែលត្រូវបានសឹករេចរិលក្នុងប៉ុន្មានឆ្នាំចុងក្រោយនេះ ដោយសារការកើនឡើងនៃរលកជាតិនិយមនិងឯកោភាគីនិយម។
ក្នុងស្មារតីនេះ លោកចូលរួមត្រេកអរលោក ចូ បៃឌិន ប្រធានាធិបតីទើបជាប់ឆ្នោតថ្មី និងអ្នកស្រី កាម៉ាឡា ហារីស អនុប្រធានាធិបតីទើបជាប់ឆ្នោតថ្មី ហើយតាងនាម WHO លោកទន្ទឹងរង់ចាំធ្វើការជាមួយរដ្ឋបាលពួកគេឲ្យដិតដល់បំផុត។
សូមបញ្ជាក់ថា កន្លងទៅ លោក បៃឌិន ធ្លាប់បង្ហើបថា រដ្ឋបាលលោក នឹងផ្លាស់ប្ដូរការសម្រេចចិត្តរបស់លោកដូណាល់ ត្រាំ ដែលដកហូតសហរដ្ឋអាមេរិកចេញពីអង្គការសុខភាពពិភពលោក។ ការដកសមាជិកភាពរបស់អាមេរិកចេញពីWHO នឹងចូលជាធរមាននាថ្ងៃទី ៦ ខែកក្កដា ឆ្នាំ២០២១ ៕
Tag:
WHO
Tedros Adhanom Ghebreyesus
កូវីដ-១៩
© រក្សាសិទ្ធិដោយ thmeythmey.com