ប្រធានាធិបតីអាមេរិកទើបជាប់ឆ្នោត ចូ បៃឌិន បានចាត់ទុកការណ៍ដែលលោក ដូណាល់ ត្រាំ មិនព្រមទទួលស្គាល់បរាជ័យក្នុងការបោះឆ្នោតជារឿងដ៏អាម៉ាស់មួយ។ ទោះជាបែបនេះ លោក បៃឌិន មិនខ្វល់ឡើយ ហើយបន្តគិតគូរផែនការផ្ទេរអំណាចរបស់លោក ខណៈការស្បថចូលកាន់តំណែងសល់ជាង៧០ថ្ងៃទៀត។
មួយសប្ដាហ៍ក្រោយការបោះឆ្នោត ប្រធានាធិបតីជិតផុតអាណត្តិ ដូណាល់ ត្រាំ នៅតែរឹងទទឹងមិនបន្ទាន់ជំហរទទួលស្គាល់ថាលោកចាញ់លោក ចូ បៃឌិន ទោះជាលទ្ធផលច្បាស់ក៏ដោយ។ លោកបន្តប្រកាសក្តែងៗថានឹងទទួលជោគជ័យ ខណៈប្ដឹងតវ៉ាពាក់ព័ន្ធការកេងបន្លំសន្លឹកឆ្នោត ព្រមទាំងមិនព្រមសហការជាមួយលោកបៃឌិនក្នុងនីតិវិធីផ្ទេរអំណាចទៀតផង។
«ខ្ញុំគ្រាន់តែគិតថា ច្បាស់ណាស់ នេះជារឿងដ៏អាម៉ាស់មួយ»។ លោក បៃឌិន និយាយបែបនេះ នៅពេលឆ្លើយតបនឹងសំណួរថា លោកគិតបែបណាជុំវិញការបដិសេធមិនព្រមទទួលស្គាល់បរាជ័យរបស់លោកត្រាំក្នុងការបោះឆ្នោតថ្ងៃទី៣ វិច្ឆិកា។
ប្រាប់អ្នកសារព័ត៌មាននៅថ្ងៃទី១០ ខែវិច្ឆិកា ក្នុងទីក្រុងកំណើតលោក Wilmington រដ្ឋ Delaware លោក បៃឌិន យល់ឃើញថា ភាពរឹងរូសនេះ នឹងប៉ះពាល់ដល់កេរដំណែលរបស់លោកប្រធានាធិបតីឡើយ។ ទោះជាបែបនេះក្តី អនាគតប្រធានាធិបតីទី៤៦រូបនេះ ធានាចំពោះមុខពលរដ្ឋអាមេរិកថា ផែនការផ្ទេរអំណាចរបស់លោក នៅតែបន្តទៅមុខដោយគ្មានការរាំងស្ទះឡើយ។
លោក បៃឌិន ក៏បានជជែកពិភាក្សាតាមរយៈទូរទស្សន៍ជាមួយមេដឹកនាំអឺរ៉ុបដែលជាសម្ព័ន្ធមិត្តមួយចំនួន ដូចជា លោក បូរីស ចនសុន នាយករដ្ឋមន្ត្រីអង់គ្លេស, លោក អេម៉ានុយអែល ម៉ាក្រុង ប្រធានាធិបតីបារាំង, អធិបការបតី អាល្លឺម៉ង់ អែនជែឡា មឺហ្គែល និងនាយករដ្ឋមន្ត្រី អៀរឡង់ Micheal Martin។
ឆ្លើយសំណួរអ្នកព័ត៌មានថាលោកផ្ញើសារបែបណាទៅកាន់មេដឹកនាំនៃប្រទេសសម្ព័ន្ធមិត្តអាមេរិកទាំងនេះ លោក បៃឌិន លើកឡើងដូច្នេះថា៖«ខ្ញុំប្រាប់ឲ្យពួកគេដឹងថា អាមេរិកត្រលប់មកវិញហើយ»។
លោក ត្រាំ ដែលបន្តក្ដីស្រមៃក្ដាប់អំណាចមួយអាណត្តិទោះលទ្ធផលបញ្ជាក់ច្បាស់ថា លោកចាញ់លោក បៃឌិន បានប្រកាសលើTwitter នៅមុនសន្និសីទរបស់លោក បៃឌិន ថា៖«យើងនឹងឈ្នះ»។ លោក ទំនងសំដៅលើការប្ដឹងតវ៉ាប្រឆាំងដំណើរការបោះឆ្នោត ដែលពិបាកនឹងទទួលជ័យជម្នះ ដ្បិតលោកសឹងតែគ្មានភស្តុតាងអ្វីសោះនឹងទៅតតាំង។ «តាមដានការកេងបន្លំលើការរាប់សន្លឹកឆ្នោតដ៏សម្បើម»។ លោកសរសេរបន្ថែមបែបនេះ។
ដោយបន្ទោរតាមក្រោយលោកត្រាំ រដ្ឋមន្ត្រីការបរទេសអាមេរិក ម៉ៃ ប៉ុមប៉េអូ បានបញ្ជាក់ក្នុងសន្និសីទព័ត៌មានមួយថា លោកត្រៀមលក្ខណៈសម្រាប់ការផ្ទេរអំណាចដ៏រលូនឆ្ពោះទៅកាន់រដ្ឋបាលលោកត្រាំអាណត្តិទី២។
យ៉ាងណាមិញ លោក បៃឌិន អះអាងថា លោកនឹងមិនប្រើចំណាត់ការផ្លូវច្បាប់ចាប់បង្ខំឲ្យលោក ត្រាំ ព្រមទទួលស្គាល់លទ្ធផលឆ្នោតឡើយ ហើយចាត់ទុកការប្រឈមមុខដាក់គ្នាជារឿងអត់ប្រយោជន៍។ ជំនួសមកវិញ លោក រង់ចាំទទួលការអញ្ជើញពីលោក ត្រាំ ទៅជជែកពិភាក្សាគ្នានៅសេតវិមាន៕