អ្នកស្រី ជៀល បៃឌិន (Jill Biden) នឹងក្លាយជាស្ត្រីទី១អាមេរិកតែមួយគត់ក្នុងប្រវត្តិសាស្ត្រ២៣១ឆ្នាំរបស់ប្រជាជាតិមួយនេះ ដែលរក្សាការងារពេញម៉ោងជាគ្រូបង្រៀន ខណៈប្ដីអ្នកស្រី លោក ចូ បៃឌិន ចូលកាន់តំណែងជាប្រធានាធិបតីអាមេរិកទី៤៦។
កើតនៅខែមិថុនា ឆ្នាំ១៩៥១ ក្នុងរដ្ឋ New Jersey អ្នកស្រី ជៀល បៃឌិន ជាកូនច្បងក្នុងចំណោមបងប្អូនស្រី៥នាក់ ហើយ អ្នស្រីបានធំធាត់ឡើងក្នុងតំបន់ជាយក្រុង Willow Grove នៃរដ្ឋ Pennsylvania ។ មុនរៀបការនឹងលោក ចូ បៃឌិន អ្នកស្រីបានរួមរស់ជាមួយអតីតកីឡាបាល់ទាត់ប្រចាំមហាវិទ្យាល័យម្នាក់ ឈ្មោះថា Bill Stevenson ។
លោក បៃឌិន បានបាត់បង់ភរិយាទីមួយ និងកូនស្រីអាយុមួយឆ្នាំម្នាក់ក្នុងហេតុការណ៍គ្រោះថ្នាក់ចរាចរណ៍មួយ ក្នុងឆ្នាំ១៩៧២ ខណៈកូនប្រុសលោក២នាក់ទៀត រួមមាន Beau និង Hunter នៅរស់ ។ ៣ឆ្នាំក្រោយគ្រោះកាចនេះ អ្នកស្រី ជៀល ត្រូវបានណែនាំឲ្យស្គាល់លោកបៃឌិន តាមរយៈបងប្រុសលោកបៃដិន ឈ្មោះ Frank ។
នៅពេលនោះ លោក បៃឌិន ជាសមាជិកព្រឹទ្ធសភាអាមេរិកម្នាក់និងជាប្រុសពោះម៉ាយ ខណៈអ្នកស្រី ជៀល នៅជានិស្សិត ។ ប្រាប់សារព័ត៌មាន Vogue អំពីការណាត់ជួបលើកដំបូងរបស់ពួកគេ អ្នកស្រីនិយាយដូច្នេះថា៖«គាត់មានអាយុលើសខ្ញុំ៩ឆ្នាំ។ ក៏ប៉ុន្តែយើងបានទៅមើលរឿងស្នេហា A Man and A Woman នៅរោងភាពយន្តមួយ ក្នុងទីក្រុង Philadelphia ហើយយើងពិតជាស៊ីសង្វាក់គ្នាណាស់»។
លោក បៃឌិន ពេលណែនាំអនាគតភរិយាឲ្យកូនប្រុសទាំងពីរលោកស្គាល់ ។រូបភាពទូរទស្សន៍ CBS
និយាយពីជីវិតស្នេហា អ្នកស្រី និយាយថា ប្ដីអ្នកស្រីបានសារភាពស្នេហ៍មក៥ដង ទម្រាំតែអ្នកស្រីព្រមទទួលយក។ «ខ្ញុំមិនអាចឲ្យពួកគេ (កូនៗរបស់លោកចូ) បាត់បង់ម្ដាយម្នាក់ទៀតទេ។ ដូច្នេះខ្ញុំត្រូវតែប្រាកដក្នុងចិត្ត១០០ភាគរយសិន»។ អ្នកស្រីពន្យល់បែបនេះ។ បន្ទាប់ស្គាល់ចិត្តគ្នាអស់២ឆ្នាំរួចមក គូស្នេហ៍ទាំងពីរ បានសម្រេចរៀបការជាមួយគ្នាក្នុងទីក្រុង ញ៉ូវយ៉ក ក្នុងឆ្នាំ១៩៧៧ ហើយមានកូនស្រីម្នាក់ឈ្មោះថា Ashley ក្នុងឆ្នាំ១៩៨១។
អ្នកស្រី ជៀ បៃឌិន ជាសាស្ត្រាចារ្យសកលវិទ្យាល័យម្នាក់ ដែលមានសញ្ញាប័ត្របរិញ្ញាមួយ អនុបណ្ឌិត២ និងបណ្ឌិតមួយពីសកលវិទ្យាល័យ Delaware ក្នុងឆ្នាំ២០០៧។ ក្នុងអាជីពអប់រំ អ្នកស្រីចំណាយពេលជាច្រើនឆ្នាំបង្រៀននៅសាលារដ្ឋក្នុងរដ្ឋ Delaware ក្នុងនោះក៏មាន វិទ្យាល័យ Brandywine។ ហើយនេះជាទីកន្លែងដែលអ្នកស្រីបានថ្លែងសុទ្ទរកថានៅសន្និបាតបក្សប្រជាធិបតេយ្យ ក្រោយប្ដីអ្នកស្រីត្រូវបានជាប់ឈ្មោះជាបេក្ខជនប្រធានាធិបតីអាមេរិក។
អ្វីដែលគួរឲ្យស្ញប់ស្ញែងនោះ ទោះក្លាយជាស្ត្រីទី២អាមេរិក ក្រោមរដ្ឋបាលបារ៉ាក់ អូបាម៉ា អ្នកស្រី បៃឌិន នៅបន្តធ្វើគ្រូបង្រៀនភាសាអង់គ្លេសក្នុងមហាវិទ្យាល័យសហគមន៍ Northern Virginia ៨ឆ្នាំពេញតែម្ដង។
ក្នុងកិច្ចសម្ភាសន៍ជាមួយទូរទស្សន៍ CBS ក្នុងខែសីហា អ្នកស្រី ជៀល បញ្ជាក់ថា ប្រសិនអ្នកស្រីក្លាយជាស្ត្រីទីមួយមែននោះ អ្នកស្រីនឹងបន្តបង្រៀនដដែល។ អ្នកស្រី សង្កត់ធ្ងន់ថា អ្នកស្រីចង់ឲ្យមនុស្សរាល់គ្នាឲ្យតម្លៃគ្រូបង្រៀន ហើយដឹងគុណចំពោះការរួមចំណែករបស់ពួកគេ ព្រមទាំងដើម្បីលើកតម្កើងអាជីពមួយនេះផងដែរ។
អ្នកស្រី ជៀ បៃឌិន ឈរក្បែរស្វាមីអ្នកស្រី លោក បៃឌិន កាលស្បថចូលកាន់តំណែងជាអនុប្រធានាធិបតីអាមេរិក កាលពីឆ្នាំ២០០៩ ។ រូបភាព AP
ទោះរវល់បង្រៀន អំឡុងពេលធ្វើស្ត្រីទី២អាមេរិកចន្លោះឆ្នាំ២០០៩និងឆ្នាំ២០១៧ អ្នកស្រី ជៀល ក៏បាមឆ្លៀតបម្រើការងារនយោបាយផងដែរ។ ភរិយាអតីតអនុប្រធានាធិបតី បៃឌិន បានប្រឹងប្រែងលើកកម្ពស់មហាវិទ្យាល័យសហគមន៍, ធ្វើយុទ្ធនាការសម្រាប់ក្រុមគ្រួសារទាហាន និងបង្កើនការយល់ដឹងពាក់ព័ន្ធការបង្ការជំងឺមហារីកដោះ ជាដើម។
ទន្ទឹមនេះ អ្នកស្រី ជៀល ក៏បានបង្កើតគំនិតផ្ដួចផ្ដើមមួយឈ្មោះថា រួមកម្លាំង ឬ Joining Forces ជាមួយនឹងអតីតស្ត្រីទី១ អ្នកស្រី មីឈែល អូបាម៉ា ដែលផ្តោតសំខាន់លើ ការជួយដល់អតីតយុទ្ធជន និងជួយឲ្យក្រុមគ្រួសារពួកគេទទួលបានការអប់រំគ្រប់គ្រាន់ ក៏ដូចជា ធនធានចាំបាច់ជាដើម។
មួយអាជីពជាគ្រូបង្រៀន អ្នកស្រីបាននិពន្ធសៀវភៅ២ចំណងជើង រួមមាន Don't Forget, God Bless Our Troops: With Audio Recording បោះពុម្ភឆ្នាំ២០១២ និង Joey: The Story of Joe Biden បោះពុម្ភឆ្នាំ២០២០៕
ក្រុមគ្រួសារលោក ចូ បៃឌិន នាំគ្នាមើលកាំជ្រូច ក្រោយប្រកាសថាឈ្នះឆ្នោតឆ្នាំ២០២០ ។ រូបភាព AFP